କାମାକ୍ଷାନଗର, ୨୫।୧୦(ଡି.ଏନ୍.ଏ.)-ବିଗିଡ଼ିଯାଇଛି କାମାକ୍ଷାନଗର ଉପଖଣ୍ଡ ଚିକିତ୍ସାଳୟର ସ୍ବାସ୍ଥ୍ୟସେବା। ମେଡିକାଲ ଭିତରକୁ ପଶିବା କ୍ଷଣି ଶୁଣିବାକୁ ମିଳୁଛି କେବଳ ‘ନାହିଁ’। ବାରଣ୍ଡାରେ ପଡ଼ି ରୋଗୀ ଛଟପଟ ହେଉଥିବାବେଳେ ମନମାନି କରୁଛନ୍ତି ଡାକ୍ତର। ସ୍ବାସ୍ଥ୍ୟକେନ୍ଦ୍ର ଅଧିକାରୀଙ୍କ କଥାକୁ ବି କେହି ଖାତିର କରୁନାହାନ୍ତି। ଓଲଟି ଲମ୍ବା ଛୁଟିରେ ପଳାଇଯିବାକୁ ଧମକ ଦେଉଛନ୍ତି। ପଦବୀ ପୂରଣ ହେଉ ନ ଥିବାରୁ ରୋଗୀ ବିଶେଷଜ୍ଞଙ୍କ ଅଭାବ ଅନୁଭବ କରୁଥିବାବେଳେ ଏଠାରେ ମିଳୁଥିବା ସ୍ବାସ୍ଥ୍ୟସେବା ସମୁଦ୍ରକୁ ଶଙ୍ଖେ ବୋଲି ସାଧାରଣରେ ଆଲୋଚନା ହେଉଛି।
ଜଣେ ଉପନିର୍ଦ୍ଦେଶକ ପାହ୍ୟାର ଡାକ୍ତର ସ୍ବାସ୍ଥ୍ୟକେନ୍ଦ୍ରର ସମସ୍ତ ଦାୟିତ୍ୱ ତୁଲାଉଛନ୍ତି। ଭେଷଜ, ଆଖି, ଅସ୍ଥିଶଲ୍ୟ, ରେଡିଓଲୋଜି, ନିଦାନ ବିଭାଗ ସମେତ ୨ ସହକାରୀ ଚିକିତ୍ସକ ପଦବୀ ଫାଙ୍କା ପଡ଼ିଛି। ଏଠାରେ ନିଯୁକ୍ତି ପାଇଥିବା ଶଲ୍ୟ ବିଶେଷଜ୍ଞ ଏବଂ ନିଶ୍ଚେତକ ବିଭାଗର ଦୁଇଜଣ ଡାକ୍ତର ସରକାରଙ୍କ ନିର୍ଦ୍ଦେଶରେ ଅନ୍ୟ ଡାକ୍ତରଖାନାରେ କାମ କରୁଛନ୍ତି। ହେଲେ ସେମାନେ ଦରମା ଉପଖଣ୍ଡ ଚିକିତ୍ସାଳୟରୁ ହିଁ ନେଉଛନ୍ତି। ସେହିପରି ସ୍ତ୍ରୀ ଓ ପ୍ରସୂତି ବିଭାଗରେ ୩ ବିଶେଷଜ୍ଞଙ୍କ ସ୍ଥାନରେ ମାତ୍ର ଜଣେ ଅଛନ୍ତି। ଗୋଟିଏ ପଦବୀ ଖାଲି ଥିବାବେଳେ ଅନ୍ୟ ଜଣେ ଡେପୁଟେଶନରେ ବାହାରକୁ ଯାଉଛନ୍ତି। ଏବେ ଶିଶୁ ବିଶେଷଜ୍ଞ, ସ୍ତ୍ରୀ ଓ ପ୍ରସୂତି ବିଶେଷଜ୍ଞ, ୩ଜଣ ବରିଷ୍ଠ ଚିକିତ୍ସକଙ୍କ ସହ ଜଣେ ଦନ୍ତ ଚିକିତ୍ସକ ଭାଗ ବାଣ୍ଟି ସ୍ବାସ୍ଥ୍ୟସେବା ସମ୍ଭାଳୁଛନ୍ତି।
କାମାକ୍ଷାନଗର ଉପଖଣ୍ଡ ଚିକିତ୍ସାଳୟ ଉପରେ ୪ ବ୍ଲକର ଲକ୍ଷାଧିକ ଜନସାଧାରଣ ନିର୍ଭର କରୁଛନ୍ତି। ବ୍ଲକ ଦେଇ ଯାଇଥିବା ବ୍ୟସ୍ତବହୁଳ ଜାତୀୟ ରାଜପଥରେ ଦୈନିକ ଛୋଟବଡ଼ ଦୁର୍ଘଟଣା ଘଟୁଛି। ବୁହାହୋଇ ଆସୁଥିବା ଗୁରୁତର ରୋଗୀ ତୁରନ୍ତ ଚିକିତ୍ସିତ ହୋଇପାରୁ ନ ଥିବାରୁ ସେମାନଙ୍କ ମୃତ୍ୟୁ ଘଟୁଥିବା ନଜିର ରହିଛି। ଅନ୍ୟପଟେ ରେଡିଓଲୋଜି ବିଭାଗରେ କେହି ନ ଥିବାରୁ ଦୁର୍ଘଟଣାଗ୍ରସ୍ତ ରୋଗୀ, ଟିବି ରୋଗୀଙ୍କ ଏକ୍ସ-ରେ ହୋଇପାରୁନାହିଁ। ଅଧିକାଂଶ ସମୟରେ ସେମାନଙ୍କୁ ଜିଲା ମୁଖ୍ୟ ଚିକିତ୍ସାଳୟକୁ ରେଫର କରିଦିଆଯାଉଛି। ଅଲ୍ଟ୍ରାସାଉଣ୍ଡ ମେଶିନ ଅଚଳ ହୋଇପଡ଼ିଥିବାରୁ ପ୍ରଧାନମନ୍ତ୍ରୀ ସୁରକ୍ଷିତ ମାତୃତ୍ୱ ଅଭିଯାନର ସଫଳ ରୂପାୟନ ହୋଇପାରୁନାହିଁ। ଅପେକ୍ଷା ଗୃହ ନ ଥିବାରୁ ପ୍ରସୂତିମାନେ ଅସ୍ବାସ୍ଥ୍ୟକର ପରିବେଶରେ ବାରଣ୍ଡାରେ ପଡ଼ିରହୁଛନ୍ତି। ଯକ୍ଷ୍ମା ରୋଗର ନିଦାନ ଲାଗି ସ୍ବତନ୍ତ୍ର ଓ୍ବାର୍ଡ ନ ଥିବାରୁ ବିଭାଗୀୟ କର୍ମଚାରୀ ଏଠିସେଠି ବସି କାମ ଚଳାଉଛନ୍ତି।
ରାଜ୍ୟରେ ରୁଗ୍ଣ ସ୍ବାସ୍ଥ୍ୟସେବାକୁ ନୂଆ ଦିଶା ଦେଖାଇବାକୁ ସରକାରଙ୍କ ପକ୍ଷରୁ ‘୫-ଟି’ କାର୍ଯ୍ୟକାରୀ କରାଯାଉଛି। ସଚିବମାନେ ମାରାଥନ ଗସ୍ତ କରି ଭିତ୍ତିଭୂମି ପରଖୁଛନ୍ତି। କାମରେ ଖିଲାପ କରୁଥିବା ଅଧିକାରୀଙ୍କୁ ଦଣ୍ଡିତ କରୁଛନ୍ତି। ହେଲେ ଉପଖଣ୍ଡ ଚିକିତ୍ସାଳୟରେ ଏହା କାମ କରୁ ନ ଥିବା ଅଞ୍ଚଳର ବୁଦ୍ଧିଜୀବୀମାନେ ଅଭିଯୋଗ କରିଛନ୍ତି। ଏ ନେଇ ସ୍ବାସ୍ଥ୍ୟକେନ୍ଦ୍ର ଅଧିକାରୀ ଡା. ରତ୍ନାକର ସାମଲ କୁହନ୍ତି, ସମସ୍ୟା କେବଳ ଏହି ଡାକ୍ତରଖାନାର ନୁହେଁ, ଏହା ରାଜ୍ୟର ସମସ୍ୟା। ସରକାର ଚାହିଁଲେ ଏହାର ସମାଧାନ ହୋଇପାରିବ। ବର୍ତ୍ତମାନ ସମସ୍ୟା ବେଶି ବଢ଼ିଯାଇଛି। ହାତଗଣତି ଡାକ୍ତର ଥିବାରୁ କାହାରିକୁ କିଛି କହିହେଉନାହିଁ। ତାଗିଦ୍ କଲେ ସେମାନେ ଛୁଟିରେ ପଳାଇଯିବାକୁ ଧମକ ଦେଉଛନ୍ତି।
