ଓ୍ବାଶିଂଟନ,୩୦ା୬(ଏଏଫ୍ପି): ଇରାନ-ଆମେରିକା ବିବାଦ ବଢ଼ିବାରେ ଲାଗିଛି। ପ୍ରଥମ ଥର ଲାଗି ଆମେରିକା କାତାରରେ ଏହାର ଏଫ୍-୨୨ ଲଢ଼ୁଆ ବିମାନ ମୁତୟନ କରିଛି। ଆମେରିକା ସ୍ବାର୍ଥର ସୁରକ୍ଷା ଲାଗି ଯୁଦ୍ଧବିମାନ ମୁତୟନ କରାଯାଇଥିବା ଏହାର ବାୟୁସେନା କେନ୍ଦ୍ରୀୟ ମିଲିଟାରୀ କମାଣ୍ଡ କହିଛନ୍ତି। କାତାର ଅଲ୍ ଉଦେଇଦ୍ ଏୟାରବେସ୍ ଉପରେ ୫ଟି ଲଢ଼ୁଆ ବିମାନ ଉଡୁଥିବା ଦେଖାଯାଇଛି। ଉପସାଗରୀୟ ଜଳରାଶିରେ ଉଡୁଥିବା ଆମେରିକାର ଏକ ଗୋଇନ୍ଦା ଡ୍ରୋନ୍କୁ ଇରାନ ଖସାଇଦେବା ପରେ ଦୁଇ ଦେଶ ମଧ୍ୟରେ ଉତ୍ତେଜନା ବୃଦ୍ଧି ପାଇଛି। ପାରସ୍ୟ ଉପସାଗରରେ ତୈଳବାହୀ ଜାହାଜ ଉପରେ ହୋଇଥିବା ଆକ୍ରମଣ ପାଇଁ ଓ୍ବାଶିଂଟନ ତେହେରାନକୁ ଦାୟୀ କରିଥିଲା। ଆମେରିକା ଓ ଇରାନ ମଧ୍ୟରେ ବିବାଦ ଦିନକୁ ଦିନ ଅଧିକ ତୀବ୍ର ହେବାରେ ଲାଗିଛି। ଉଭୟ ଯୁଦ୍ଧ ଆଡ଼କୁ ଅଗ୍ରସର ହେଉଛନ୍ତି। ଡ୍ରୋନ ଖସାଇବା ପରେ ଇରାନ ବିରୋଧରେ ସାମରିକ କାର୍ଯ୍ୟାନୁଷ୍ଠାନ ଲାଗି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ସେନାକୁ ନିର୍ଦ୍ଦେଶ ଦେଇ ଶେଷ ମୁହୂର୍ତ୍ତରେ ପ୍ରତ୍ୟାହାର କରିନେଇଥିଲେ। ଏହା ପରେ ସେ ଇରାନ ଉପରେ ସାନି ଅର୍ଥନୈତିକ କଟକଣା ଲାଗୁ କରିଛନ୍ତି।
