ପଦ୍ମପୁର, ୨୮।୫ (ଡି.ଏନ୍.ଏ.)ପଲିଥିନ୍ର ବିଷବଳୟ ମଧ୍ୟରେ ପଦ୍ମପୁର ସହର। କାଟୁ କରୁନି ସରକାରଙ୍କ କଟକଣା। ପ୍ରଦୁଷିତ ହେଉଛି ପରିବେଶ। ଛୋଟ ଚା’ ଦୋକାନଠାରୁ ଆରମ୍ଭ କରି ବଡ ବଡ ବ୍ୟବସାୟିକ ଅନୁଷ୍ଠାନ, ସବୁଠି ପଲିଥିନ୍ର ବ୍ୟବହାର। ଚା’, ଲସି ଓ ଜଳଖିଆ ଦୋକାନରେ ପଲିଥିନ୍ ଓ ପ୍ଲାଷ୍ଟିକ କପ୍ର ବ୍ୟବହାର ହେଉଛି। ରାସ୍ତାଘାଟରେ ପଡିଥିବା ପଲିଥିନ୍ ଖାଇ ଗୋରୁଗାଈମାନେ ମୃତ୍ୟୁମୁଖରେ ପଡୁଥିବା ଅଭିଯୋଗ ହେଉଛି। ପଲିଥିନ୍ ବ୍ୟବହାର ଉପରେ କଟକଣା ଲଗାଇଛନ୍ତି ସରକାର, କିନ୍ତୁ ବ୍ୟବସାୟୀମାନେ ଏହାକୁ ଖାତିର କରୁ ନାହାନ୍ତି। ଫଳରେ ପଦ୍ମପୁର ବଜାର ସାହିଗଳି କନ୍ଦିରେ ସବୁଠି କୁଢକୁଢ ଅଳିଆ ଓ ପଲିଥିନ୍। ପଲିଥିନ୍ଗୁଡିକ ଡ୍ରେନ୍ ଭିତରେ ପଶିବାରୁ
ସାମାନ୍ୟ ବର୍ଷା ହେଲେ ଡ୍ରେନ୍ ପାଣି ରାସ୍ତାରେ ଯାତାୟାତ କରୁଛି। ୫୦ ମାଇକ୍ରୋନ୍ରୁ ଅଧିକ ପଲିଥିନ୍ ବ୍ୟବହାର ହୋଇପାରିବ ବୋଲି ଦେଶର ସର୍ବୋଚ୍ଚ କୋର୍ଟ ନିର୍ଦ୍ଦେଶ ଦେଇଥିବା ବେଳେ ଏହି ଅଞ୍ଚଳରେ ତାହା କାମ ହେଉନାହିଁ। ୨୦୧୫-୧୬ରେ ପଦ୍ମପୁର ଅଞ୍ଚଳରେ ତତ୍କାଳୀନ ତହସିଲଦାର ଟି. ପଦ୍ମନାଭ ଦୋରା, ସ୍ବର୍ଗତ ଖବରଦାତା ପ୍ରଦୀପ କୁମାର କର ଓ ଅଞ୍ଚଳର ବୁଦ୍ଧିଜୀବୀମାନେ ପଲିଥିନ୍ ବ୍ୟବହାରକୁ ନେଇ ଲୋକଙ୍କୁ ସଚେତନ କରୁଥିଲେ। ଏଥିସହ ତହସିଲଦାର ନିଜେ ମାଜିଷ୍ଟ୍ରେଟ୍ ଦାୟିତ୍ୱରେ ରହି ବ୍ୟବସାୟିକ ଅନୁଷ୍ଠାନଗୁଡିକରେ ଚଢ଼ାଉ କରି ପଦ୍ମପୁର ଅଞ୍ଚଳରେ ପଲିଥିନ୍ ବ୍ୟବହର ଉପରେ କଟକଣା ଲାଗୁ କରିଥିଲେ। ଫଳରେ ବ୍ୟବସାୟୀମାନେ ପେପର ଠୋଲା ବ୍ୟବହାର କରୁଥିଲେ। ପ୍ରଶାସନ ମଧ୍ୟ ଏବେ ଲୋକଙ୍କୁ ସଚେତନ କରିବାକୁ କୌଣସି ପଦକ୍ଷେପ ନେଉନି। ବର୍ଷାଦିନେ ଇନ୍ଦୁପୁର ସାଗର ଜଳ ଓ ସହରର ବର୍ଷା ଜଳ ପୁରାତନ ସୁନାରିଘାଇ ଦେଇ ପ୍ରବାହିତ ହେଉଥିଲା। ଏହି ଘାଇ ଏବେ ପ୍ଲାଷ୍ଟିକ୍, ପଲିଥିନ୍ ଓ ଆବର୍ଜନାରେ ପୋତି ହେବାକୁ ବସିଲାଣି। ବର୍ଷାଦିନେ ଜଳ ନିଷ୍କାସନ ଏକ ବଡ଼ ସମସ୍ୟା ହେବ ବୋଲି ଆଲୋଚନା ହେଉଛି। ପ୍ରଶାସନ ଏ ସବୁ ପ୍ରତି ଦୃଷ୍ଟି ଦେଇ ପଦ୍ମପୁର ଅଞ୍ଚଳକୁ ପଲିଥିନ୍ ବିଷବଳୟରୁ ମୁକ୍ତ କରିବା ପାଇଁ ପଦକ୍ଷେପ ନେବାକୁ ସାଧାରଣରେ ଦାବି ହେଉଛି।
