ନାଉଗାଁ,୧୮ା୨(ସ୍ବ.ପ୍ର.): ନାଉଗାଁ ବ୍ଲକ ଅଧୀନ ଶ୍ରୀଜଗନ୍ନାଥ କଲେଜ ବାର୍ଷିକ ଉତ୍ସବକୁ ନେଇ ଦୁଇ ଛାତ୍ର ଗୋଷ୍ଠୀଙ୍କ ମଧ୍ୟରେ ଛକାପଞ୍ଝା ଲାଗିରହିଛି। ଗୋଟିଏ ଛାତ୍ର ଗୋଷ୍ଠୀ ବାର୍ଷିକ ଉତ୍ସବ ପାଇଁ ପ୍ରସ୍ତୁତ ଚଳାଇଥିବା ବେଳେ ଅନ୍ୟ ଗୋଷ୍ଠୀ ଉତ୍ସବ ବନ୍ଦ କରିବାକୁ ଦାବିକରି ଅଧ୍ୟକ୍ଷଙ୍କ ଫାଟକ ସମ୍ମୁଖରେ ସୋମବାର ଧାରଣାରେ ବସିଥିଲେ। ଦୀର୍ଘ ସମୟ ଧରାଣାରେ ବସିବାପରେ ଅପରାହ୍ନରେ ଘଟଣାସ୍ଥଳକୁ ନାଉଗାଁ ଥାନାଧିକାରୀ ଗୋବର୍ଦ୍ଧନ ସାହୁ ପହଞ୍ଚତ୍ ଛାତ୍ରମାନଙ୍କୁ ବୁଝାଶୁଝା କରିଥିଲେ। ଏହାପରେ ଛାତ୍ରମାନେ ଧାରଣାରୁ ଓହରି ଯାଇଥିଲେ। ଉତ୍ସବ ନ କରିବାପାଇଁ ଛାତ୍ର ବିକାଶ ନାୟକ, ସ୍ମୃତିରଞ୍ଜନ ଜେନା, ବୁଲୁ ସ୍ବାଇଁ, ଅମନଦୀପ ରାଉତ, ହିରଣ୍ୟ ଜେନା ପ୍ରମୁଖ ଲିଖିତ ଭାବେ ଜିଲାପାଳଙ୍କୁ ଅଭିଯୋଗ କରିଛନ୍ତି। ଅଭିଯୋଗ ଅନୁସାରେ, ସରକାରଙ୍କ ନିୟମାନୁସାରେ ମହାବିଦ୍ୟାଳୟ ବାର୍ଷିକ ଉତ୍ସବ ଜାନୁୟାରୀ ପ୍ରଥମ କିମ୍ବା ୨ୟ ସପ୍ତାହରେ ହେବା କଥା। କିନ୍ତୁ ଏହି ସମୟରେ କରା ନ ଯାଇ ଅଧ୍ୟକ୍ଷ ଅସଦ ଉପାୟରେ ବର୍ତ୍ତମାନ ଉତ୍ସବ କରିବାପାଇଁ ଯୋଜନା କରୁଛନ୍ତି। ଛାତ୍ରୀଛାତ୍ରଙ୍କ ପରୀକ୍ଷା ଅଳ୍ପ ଦିନ ଥିବା ବେଳେ କିପରି ଉତ୍ସବ ଆୟୋଜନ କରାଯାଉଛି। ତେଣୁ ଉତ୍ସବକୁ ବନ୍ଦ କରିବା ପାଇଁ ଅଭିଯୋଗରେ ଦର୍ଶାଯାଇଛି। ଅଧ୍ୟକ୍ଷ କଲେଜ କାର୍ଯ୍ୟରେ ବାହାରକୁ ଯାଇଥିବାରୁ ଛାତ୍ରମାନେ ଫାଟକ ନିକଟରେ ବସି ରହିଥିଲେ। ଏ ସମ୍ପର୍କରେ ଥାନାଧିକାରୀ ସାହୁଙ୍କୁ ପଚାରିବାରେ ସେ କହିଥିଲେ, ଆସନ୍ତା ୧୯ ତାରିଖରେ ଛାତ୍ରୀଛାତ୍ର ଓ ଅଧ୍ୟକ୍ଷ ବସି ଉତ୍ସବ ବିଷୟରେ ଆଲୋଚନା କରିବାକୁ ପ୍ରତିଶ୍ରୁତି ଦେବା ପରେ ପିଲାମାନେ ଧାରଣାରୁ ଓହରି ଯାଇଛନ୍ତି।
ସୂଚନାଯୋଗ୍ୟ, ଉତ୍ସବ ଆୟୋଜନ ନିମନ୍ତେ ଅନୁମତି ପାଇଁ ଯୁକ୍ତ ୩ ଓ ଯୁକ୍ତ ୨ର ଛାତ୍ରୀଛାତ୍ର କାଜଲ ସ୍ବାଇଁ, ଦୀପିକା ଲେଙ୍କା, ସ୍ବର୍ଣ୍ଣପ୍ରଭା ପରିଡା, କାବେରୀ ସ୍ବାଇଁ, ରଚନା ପ୍ରଧାନ, ମାନସୀ ମଲିକ, ସରୋଜ ଦାସ, ସୁଧୀର ଦାସ ଅଧ୍ୟକ୍ଷଙ୍କୁ ଗତ ଶନିବାର ଲିଖିତ ଭାବେ ଜଣାଇଥିଲେ। ସେହିପରି ମହାବିଦ୍ୟାଳୟର ବିଭିନ୍ନ ସମସ୍ୟା ନେଇ କିଛି ଛାତ୍ରୀଛାତ୍ର ଭୁବନେଶ୍ୱର ଆଞ୍ଚଳିକ ଶିକ୍ଷା ନିର୍ଦ୍ଦେଶାଳୟର ନିର୍ଦ୍ଦେଶକଙ୍କୁ ଗତ ଶୁକ୍ରବାର ଲିଖିତଭାବେ ଜଣାଇଥିଲେ। ଏ ସମ୍ପର୍କରେ କଲେଜ ଅଧ୍ୟକ୍ଷ ଡ. ଚାଇନା ପ୍ରଧାନଙ୍କୁ ପଚାରିବାରେ କଲେଜ ଗଭର୍ନିଂ ବଡିର ପ୍ରେସିଡେଣ୍ଟ ଉପଜିଲାପାଳ ରହିଛନ୍ତି। ତେଣୁ ଉପଜିଲାପାଳଙ୍କ ସହ ଆଲୋଚନା କରାଯାଇ ଯାହା ପଦକ୍ଷେପ ନିଆଯିବ ବୋଲି ପ୍ରକାଶ କରିଥିଲେ।
