ଲଣ୍ଡନ,୯।୪: କରୋନା ସଂକ୍ରମଣ ଏବେ ସାରା ବିଶ୍ୱ ପାଇଁ ଚିନ୍ତାର କାରଣ ହୋଇଥିବା ବେଳେ କେତେ ଗୁଡିଏ ଦେଶରେ ଏହି ମହାମାରୀର ସଂକ୍ରମଣ ଫଳରେ ଦିନକୁ ଶହ ଶହ ଲୋକଙ୍କ ଜୀବନ ଯାଉଛି। ଏହି ଦେଶମାନଙ୍କ ମଧ୍ୟରୁ ବ୍ରିଟେନ ଅନ୍ୟତମ। ଏଠାରେ ପ୍ରତିଦିନ ହଜାର ହଜାର ଲୋକ କରୋନାରେ ସଂକ୍ରମିତ ହେଉଥିବା ବେଳେ ଶହ ଶହ ଲୋକଙ୍କ ମୃତ୍ୟୁ ମଧ୍ୟ ହେଉଛି। ଏବେ ଏଠାରେ କରୋନା ମୃତ୍ୟୁ ସଂଖ୍ୟା ୭ ହଜାର ଅତିକ୍ରମ କରି ସାରିଲାଣି। କୁହାଯାଉଛି ଏଠାରେ କରୋନାର ଭୟାବହତାକୁ ଦେଖି ଅନ୍ୟ ରୋଗୀଙ୍କ ଚିକିତ୍ସାରେ ଅବହେଳା କରାଯାଉଛି। ଖବର ଅନୁଯାୟୀ ସେଠାରେ ଥିବା ମେରୀ କ୍ୟୁରି ହସ୍ପିଟାଲରେ ଥିବା ଶହ ଶହ କ୍ୟାନସର ରୋଗୀଙ୍କ ଚିକିତ୍ସାକୁ ଅଧାରେ ଅଟକାଇ ଦିଆଯାଇଥିବା କୁହାଯାଉଛି। ଦ ଇଣ୍ଡିପେଣ୍ଡେଣ୍ଟରେ ପ୍ରକାଶିତ ଏକ ଖବର ଅନୁଯାୟୀ, ଉକ୍ତ ହସ୍ପିଟାଲରେ ଶହ ଶହ କ୍ୟାନସର ରୋଗୀ ଥିବା ବେଳେ ଘରେ ମଧ୍ୟ କେତେଜଣଙ୍କ ଚିକିତ୍ସା ଲାଗି ସେହି ହସ୍ପିଟାଲର ନର୍ସ ସେମାନଙ୍କ ଦେଖାରଖା ପାଇଁ ଯାଉଥିଲେ। ହେଲେ ଏବେ ଏମାନଙ୍କୁ କରୋନା ରୋଗୀଙ୍କ ଚିକିତ୍ସା ପାଇଁ ଲଗାଯାଇଥିବାରୁ ସେମାନେ କ୍ୟାନସର ରୋଗୀଙ୍କ ଚିକିତ୍ସା କରିପାରୁ ନ ଥିବା କୁହାଯାଉଛି। ଅନ୍ୟପଟେ ଏଭଳି ରୋଗୀଙ୍କୁ ଏବେ ଘରୋଇ ହସ୍ପିଟାଲ ଯିବାକୁ ମଧ୍ୟ ପରାମର୍ଶ ଦିଆଯାଉଛି। ଏହା ଜଣାପଡିବା ପରେ ବ୍ରିଟେନ ସ୍ବାସ୍ଥ୍ୟମନ୍ତ୍ରୀ ଏ ଦିଗରେ ଆଲୋଚନା କରିବେ ବୋଲି ଜଣାପଡିଛି।
