ଲଣ୍ଡନ,୧୮।୩: ଚାଇନାରୁ ଆରମ୍ଭ ହୋଇଥିବା କରୋନା ସଂକ୍ରମଣ ଏବେ ପୃଥିବୀର ୧୬୫ ଦେଶରେ ପହଞ୍ଚିଛି। ପ୍ରତିଦିନ ସଂକ୍ରମିତଙ୍କ ସଂଖ୍ୟା ବଢ଼ିବା ସହିତ ମୃତ୍ୟୁ ସଂଖ୍ୟା ମଧ୍ୟ ବଢ଼ିଚାଲିଛି। ଏହି ମର୍ମରେ ଇଂଲଣ୍ଡର ଲଣ୍ଡନ ଇମ୍ପାରିଆଲ କଲେଜର ଗବେଷକଙ୍କ ପକ୍ଷରୁ କରାଯାଇଥିବା ଏକ ପୂର୍ବାନୁମାନ ଗବେଷଣା ରିପୋର୍ଟ ପ୍ରକାଶ ପାଇଛି। ଏଥିରେ ଦର୍ଶାଯାଇଛି କରୋନାକୁ ରୋକିବାରେ ଅସଫଳ ହେଲେ ଏହାଯୋଗୁ ଆମେରିକାର ୨୨ ଲକ୍ଷରୁ ଅଧିକ ଲୋକଙ୍କ ମୃତ୍ୟୁ ହେବାର ଆଶଙ୍କା ରହିବ। ସେହିପରି ବ୍ରିଟେନ୍ର ୫ ଲକ୍ଷରୁ ଅଧିକ ଲୋକଙ୍କର ଏହି ମହାମାରୀ ଯୋଗୁ ମୃତ୍ୟୁ ହେବାର ଆଶଙ୍କା ରହିଥିବା ରିପୋର୍ଟରେ କୁହାଯାଇଛି। ମ୍ୟାଥମେଟିକାଲ ବାୟୋଲୋଜି ପ୍ରଫେସର ନେଲ୍ ଫେରଗୁସନ୍ଙ୍କ ନେତୃତ୍ୱରେ ହୋଇଥିବା ଏହି ପୂର୍ବାନୁମାନ ଗବେଷଣା ରିପୋର୍ଟ ନେଇ ଅନ୍ତର୍ଜାତୀୟସ୍ତରରେ ଚର୍ଚ୍ଚା ଆରମ୍ଭ ହୋଇଛି। ରିପୋର୍ଟ ଆଧାରରେ ବ୍ରିଟେନ୍ ସରକାର ସାମାଜିକ କ୍ଷେତ୍ରରେ କଡ଼ା କଟକଣା ଜାରି କରିଛନ୍ତି। ଇତିମଧ୍ୟରେ ପ୍ରଧାନମନ୍ତ୍ରୀ ବୋରସ୍ ଜନସନ୍ କ୍ୱାରାଣ୍ଟାଇନ୍ ପ୍ରକ୍ରିୟା ଉପରେ ଗୁରୁତ୍ୱାରୋପ କରିଛନ୍ତି।
