ବରୀ,୧୬ା୩(ଡି.ଏନ୍.ଏ.): ଉନ୍ନୟନ କାର୍ଯ୍ୟକୁ ନେଇ ଯାଜପୁର ଜିଲା ବରୀ ବ୍ଲକ୍ରେ ବିଭିନ୍ନ ସମୟରେ ବିଶୃଙ୍ଖଳା ସୃଷ୍ଟି ହେଉଛି। ଏହି ପରିପ୍ରେକ୍ଷୀରେ ଗୁରୁବାର ବ୍ଲକ୍ର କନିଷ୍ଠ ଯନ୍ତ୍ରୀ ବିପ୍ଲବ ପରିଜା ଏବଂ ୨୨ ନମ୍ବର ଜୋନ୍ ଜିଲା ପରିଷଦ ସଭ୍ୟଙ୍କ ମଧ୍ୟରେ ହାତାହାତି ହୋଇଛି। ଏନେଇ କନିଷ୍ଠ ଯନ୍ତ୍ରୀ ଏବଂ ଜିଲାପରିଷଦ ସଭ୍ୟ ବରୀ ଥାନାରେ ଲିଖିତ ଅଭିଯୋଗ କରିଛନ୍ତି।
ସୂଚନା ମୁତାବକ, ମହାକାଳପଡ଼ା ପଞ୍ଚାୟତରେ ଏକ ଖଳା ନିର୍ମାଣରେ ନିମ୍ନମାନର କାର୍ଯ୍ୟ ହେଉଥିବା ଅଭିଯୋଗ ହୋଇଥିଲା। ଏନେଇ ଦାୟିତ୍ୱରେ ଥିବା କନିଷ୍ଠ ଯନ୍ତ୍ରୀ ଘଟଣାସ୍ଥଳକୁ ଆସିଥିଲେ। କାର୍ଯ୍ୟ ନିମ୍ନମାନର ହେଉଥିବା ଯୋଗୁ ଦାୟିତ୍ୱରେ ଥିବା ଠିକାଦାରଙ୍କୁ ସଠିକ୍ କାର୍ଯ୍ୟ ନ ହେଲେ ବିଲ୍ କରିବେ ନାହିଁ ବୋଲି ରୋକ୍ଠୋକ୍ ଶୁଣାଇ ଦେଇଥିଲେ। ପରବର୍ତ୍ତୀ ଅବସ୍ଥାରେ ୨୨ ନମ୍ବର ଜୋନ୍ ଜିଲା ପରିଷଦ ସଭ୍ୟ ଘଟଣାସ୍ଥଳରେ ପହଞ୍ଚିବା ପରେ ଉଭୟଙ୍କ ମଧ୍ୟରେ ବଚସା ହୋଇଥିଲା।
ଅଭିଯୋଗ ମୁତାବକ, କନିଷ୍ଠ ଯନ୍ତ୍ରୀ ଜିଲାପରିଷଦ ସଭ୍ୟଙ୍କୁ ଗାଳି ଗୁଲଜ କରିବା ଯୋଗୁ ଘଟଣାସ୍ଥଳରେ ଉତ୍ତେଜନା ପରିସ୍ଥିତି ସୃଷ୍ଟି ହୋଇଥିଲା। ଉଭୟଙ୍କ ମଧ୍ୟରେ ହାତାହାତି ହେବା ପରେ କେତେକ ଲୋକ କନିଷ୍ଠ ଯନ୍ତ୍ରୀଙ୍କୁ ମାରଧର କରି ଘଟଣାସ୍ଥଳରୁ ଉଠାଇ ନେଇ ଏକ କୋଠରୀରେ ଅଟକ ରଖିଥିଲେ। ବ୍ଲକ ପ୍ରଶାସନଠାରୁ ଖବର ପାଇ ବରୀ ପୋଲିସ ଘଟଣାସ୍ଥଳରେ ପହଞ୍ଚି କନିଷ୍ଠ ଯନ୍ତ୍ରୀ ବିପ୍ଲବ ପରିଜାଙ୍କୁ ଉଦ୍ଧାର କରିବା ସହ ଥାନାରେ ରଖିଥିବା ସୂଚନା ମିଳିଛି। ଅପରପକ୍ଷେ ୨୨ ନମ୍ବର ଜିଲା ପରିଷଦସଭ୍ୟ ଦିଲୀପ ମହାନ୍ତି କନିଷ୍ଠ ଯନ୍ତ୍ରୀଙ୍କ ଦୁର୍ବବ୍ୟବାର ଏବଂ ତାଙ୍କୁ ଆକ୍ରମଣ କରିଥିବା ଘଟଣାକୁ ନେଇ ବରୀ ରାମଚନ୍ଦ୍ରପୁର ଥାନାରେ ଲିଖିତ ଅଭିଯୋଗ କରିଥିବା ବେଳେ କନିଷ୍ଠ ଯନ୍ତ୍ରୀ ପରିଜା ନିମ୍ନମାନର କାର୍ଯ୍ୟ ତଦାରଖ କରିବା ସମୟରେ ଜିଲା ପରିଷଦ ସଭ୍ୟ ଓ ତାଙ୍କ ସମର୍ଥକ ତାଙ୍କୁ ଆକ୍ରମଣ କରିଥିବା ଲିଖିତ ଅଭିଯୋଗ କରିଛନ୍ତି। ଖବର ଲେଖା ହେଲା ପର୍ଯ୍ୟନ୍ତ କନିଷ୍ଠ ଯନ୍ତ୍ରୀ ପରିଜା ଓ ଜିଲାପରିଷଦ ସଭ୍ୟ ମହାନ୍ତି ଥାନାରେ ଥିବା ସୂଚନା ମିଳିଛି।
ଏନେଇ ବରୀ ଥାନା ଅଧିକାରୀ ମନୋଜ କୁମାର ସ୍ବାଇଁଙ୍କୁ ପଚାରିବାରୁ ଅଭିଯୋଗକୁ ଭିତ୍ତିକରି ପୋଲିସ ତଦନ୍ତ କରୁଛି। ତଦନ୍ତ ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି।
