ପୁରୀ ଅଫିସ,୧।୫: ମହାମାରୀ କରୋନା ମୁକାବିଲା ପାଇଁ ରାଜ୍ୟ ସରକାର ବିଭିନ୍ନ ନିର୍ଦ୍ଦେଶାବଳୀ ଜାରି କରୁଛନ୍ତି। ପୁରୀରେ ମଧ୍ୟ ଏକାଧିକ କଟକଣା ଜାରି କରାଯାଇଛି। ତେବେ ପୁରୀରେ ଜଣେ ବିଦେଶୀ ଲକ୍ଡାଉନ କଟକଣା ଉଲ୍ଲଂଘନ କରି ବଡଦାଣ୍ଡରେ ଖୁଲମଖୁଲା ବୁଲିବା ଘଟଣା ପ୍ରଶାସନିକ ବ୍ୟବସ୍ଥାକୁ ଅଙ୍ଗୁଳି ନିର୍ଦ୍ଦେଶ କରିଛି। ବୁଧବାର ଜଣେ ବିେଦେଶୀ ସାଇକେଲରେ ବଡ଼ଦାଣ୍ଡ, ମଙ୍ଗୁମଠ କଡ଼ ଦେଇ କାକୁଡ଼ିଖାଇ ଛକ ଆଡେ ଯାଉଥିବା ଦେଖିବାକୁ ମିଳିଥିଲା। ସମ୍ପୃକ୍ତ ବିଦେଶୀ ଜଣଙ୍କ ଧଳା ରଙ୍ଗର ହାପ୍ ପ୍ୟାଣ୍ଟ, ଟି ଶାର୍ଟ ଏବଂ ଧଳା କ୍ୟାପ୍ ପିନ୍ଧିଥିବାବେଳେ ମୁହଁରେ ମାସ୍କ ବାନ୍ଧିଥିଲେ। ସାଇକେଲରେ ବଡ଼ଦାଣ୍ଡରେ ବୁଲୁଥିବା ବେଳେ ତାଙ୍କୁ ଅନ୍ୟମାନେ ଦେଖି ଚକିତ ହୋଇପଡ଼ିିଥିଲେ।
ଏ ସମ୍ପର୍କରେ ସହରର ନାଗରିକ ପ୍ରସନ୍ନ ମହାପାତ୍ର କହିଛନ୍ତି, ଲକ୍ଡାଉନ ଘୋଷଣା ହେବାର ୫ଦିନ ପୂର୍ବରୁ ଜିଲା ପ୍ରଶାସନ ସହରର ସମସ୍ତ ହୋଟେଲ ଖାଲି କରିବାକୁ ନିର୍ଦ୍ଦେଶ ଦେଇଥିଲା। ସବୁ ପର୍ଯ୍ୟଟକଙ୍କୁ ସହର ଛାଡି ଚାଲିଯିବାକୁ ମଧ୍ୟ କୁହାଯାଇଥିଲା। ହେଲେ ଯେଉଁ ବିଦେଶୀ ନାଗରିକ ବଡ଼ଦାଣ୍ଡରେ ସାଇକେଲ ଧରି ବୁଲୁଛନ୍ତି ସେ ରହୁଛନ୍ତି କେଉଁଠି? ପ୍ରଶାସନ ଏବଂ ପୋଲିସ ପାଖରେ ତାଙ୍କ ସମ୍ପର୍କରେ ସୂଚନା ଅଛି କି ନାହିଁ। ସେ କେବେ ଓ କେଉଁ ଦେଶରୁ ଆସିଛନ୍ତି? ତାଙ୍କର ସ୍ବାସ୍ଥ୍ୟ ପରୀକ୍ଷା କରାଯାଇଛି ନା ନାହିଁ? ବର୍ତ୍ତମାନ ବିଦେଶୀଙ୍କ କଥା ଶୁଣିବା ବେଳକୁ ଲୋକେ ଭୟ କରୁଛନ୍ତି। ମାତ୍ର ଲକ୍ଡାଉନ କଟକଣା ସମୟରେ ଏହି ବିଦେଶୀ ଜଣଙ୍କ କିପରି ବିନା ଦ୍ୱିଧାରେ ବୁଲୁଛନ୍ତି ତାହାର ତଦନ୍ତ କରାଯିବା ଦରକାର।
ଅନ୍ୟପକ୍ଷରେ ଜଣେ ଅଧିକାରୀ କହିଛନ୍ତି, ବହୁ ପୂର୍ବରୁ ଆସିଥିବା କେତେଜଣ ବିଦେଶୀ ପର୍ଯ୍ୟଟକ ଫ୍ଲାଇଟ୍ ବନ୍ଦ ହୋଇଯିବାରୁ ରହିଯାଇଛନ୍ତି। ପ୍ରଶାସନ ଏବଂ ପୋଲିସ ସେମାନଙ୍କ ବିଷୟରେ ଅବଗତ ଅଛନ୍ତି। ସେମାନେ ନିର୍ଦ୍ଦିଷ୍ଟ କିଛି ହୋଟେଲରେ ରହୁଥିବାବେଳେ ସରକାରଙ୍କ ଗାଇଡ଼ଲାଇନ ଅନୁସାରେ ସେମାନଙ୍କର ସ୍ବାସ୍ଥ୍ୟ ପରୀକ୍ଷା କରାଯାଇଛି। କିନ୍ତୁ ଲକ୍ଡାଉନ କଟକଣା ଥିବାରୁ ସେମାନେ ବାହାରକୁ ବାହାରିବା କଥା ନୁହେଁ। କେଉଁ ପରିପ୍ରେକ୍ଷୀରେ ସେ ବାହାରେ ବୁଲିଲେ, ସମ୍ପୃକ୍ତ ହୋଟେଲ କର୍ତ୍ତୃପକ୍ଷ ତାଙ୍କୁ ବାହାରକୁ କିପରି ଛାଡିଲେ ତାହାର ତଦନ୍ତ କରାଯିବ।
ସୂଚନାଥାଉ କି, ପୋଲିସ ଏବଂ ପ୍ରଶାସନକୁ ନ ଜଣାଇ ୩ଜଣ ବିଦେଶୀ ପର୍ଯ୍ୟଟକ ବଳିଆପଣ୍ଡାସ୍ଥିତ ହୋଟେଲ ଦେବଭୂମିରେ ରହୁଥିଲେ। ଗତ ମାସ ୨୪ ତାରିଖରେ ଏହା ଜଣାପଡ଼ିିବା ପରେ ପ୍ରଶାସନ ପକ୍ଷରୁ ଚଢାଉ କରାଯାଇ ସେହି ହୋଟେଲକୁ ସିଲ୍ କରାଯାଇଥିଲା। ଏଥିସହ ସମ୍ପୃକ୍ତ ବିଦେଶୀ ପର୍ଯ୍ୟଟକଙ୍କୁ ନିଆଯାଇ ଭୁବନେଶ୍ୱର ବିମାନ ବନ୍ଦରରେ ଛଡ଼ାଯାଇଥିଲା।
