ମସ୍କଟ, ୧୫ା୩ (ପି.ଟି.)-ଭାରତର ଉଦୀୟମାନ ଟେବୁଲ ଟେନିସ (ଟିଟି) ଖେଳାଳି ଜିତ୍ ଚନ୍ଦ୍ରା ୨୧ବର୍ଷରୁ କମ୍ ଓମାନ ଓପନ ପୁରୁଷ ସିଙ୍ଗଲ୍ସ ଟାଇଟଲ ଜିତିଛନ୍ତି। ଫାଇନାଲରେ ସେ ବିଶ୍ୱର ୨ନମ୍ବର ମାନ୍ୟତାପ୍ରାପ୍ତ ଭାରତୀୟ ଟିଟି ଖେଳାଳି ମାନବ ଠକ୍କରଙ୍କୁ ୧୧-୬, ୧୧-୭, ୧୩-୧୧ ସିଧାସଳଖ ସେଟ୍ରେ ହରାଇ ବିପର୍ଯ୍ୟୟ ସୃଷ୍ଟି କରିଛନ୍ତି। ଏହି ଅଲ୍ ଇଣ୍ଡିଆ ଫାଇନାଲ ମାତ୍ର ୨୪ ମିନିଟ୍ରେ ଶେଷ ହୋଇଯାଇଥିଲା। ୨୧ ବର୍ଷରୁ କମ୍ ପୁରୁଷ ସିଙ୍ଗଲ୍ସ ସେମିଫାଇନାଲକୁ ୪ ଜଣ ଭାରତୀୟ ଉନ୍ନୀତ ହୋଇଥିଲେ। ଚନ୍ଦ୍ରା ଓ ଠକ୍କରଙ୍କ ବ୍ୟତୀତ ଅନ୍ୟ ଦୁଇ ଜଣ ହେଲେ ମାନୁଷ ଶାହା ସୁରଭାଜୁଲା ସ୍ନେହିତ୍। ପୂର୍ବରୁ ଅନୁଷ୍ଠିତ ସିନିୟର ପୁରୁଷ ସିଙ୍ଗଲ୍ସ ପ୍ରି-କ୍ୱାର୍ଟରରେ ଭାରତର ଅଚନ୍ତା ଶରଥ କମଲ ବେଲାରୁଷର ଆଲେକ୍ସାଣ୍ଡର ଖାନିନ୍ଙ୍କୁ ହରାଇ ଦେଇଥିଲେ। ଭାରତର ଅନ୍ୟ ଜଣେ ଖେଳାଳି ହରମିତ୍ ଦେଶାଇ ମଧ୍ୟ କ୍ୱାର୍ଟରଫାଇନାଲରେ ପ୍ରବେଶ କରିଛନ୍ତି। ସେ ଇଜିପ୍ଟର ଓମାର ଆସାରଙ୍କ ବିପକ୍ଷରେ ବିଜୟ ହାସଲ କରିଛନ୍ତି। ଅନ୍ୟପକ୍ଷରେ ୩ ଭାରତୀୟ ଯୋଡି ଡବଲ୍ସ ସେମିଫାଇନନାଲକୁ ଉନ୍ନୀତ ହୋଇଛନ୍ତି।
