ନୂଆଦିଲ୍ଲୀ, ୧୩।୬-
ଏସିଆ କପ୍ କ୍ରିକେଟ ଟୁର୍ନାମେଣ୍ଟର ଆଗାମୀ ସଂସ୍କରଣ ପାକିସ୍ତାନ ପରିବର୍ତ୍ତେ ଶ୍ରୀଲଙ୍କାରେ ଆୟୋଜନ ହେବା ସମ୍ଭାବନା ବଢ଼ିଛି। ପ୍ରକୃତରେ ପାକିସ୍ତାନ ଏହି ଟୁର୍ନାମେଣ୍ଟ ଆୟୋଜନ ଅଧିକାର ପାଇଥିଲା। ତେବେ ଭାରତ ସହିତ ଉତ୍ତେଜନାମୂଳକ ପରିସ୍ଥିତି ଏବଂ କୋଭିଡ-୧୯ ସଂକ୍ରମଣକୁ ଦୃଷ୍ଟିରେ ରଖି ଏହାକୁ ଆୟୋଜନ ପାଇଁ ଶ୍ରୀଲଙ୍କାକୁ ଅଫର ଦେଇଛି। ପ୍ରତି ବଦଳରେ ପାକିସ୍ତାନ ୨୦୨୨ ଏସିଆ କପ୍ ଆୟୋଜନ କରିବା ଲକ୍ଷ୍ୟରେ ରହିଛି। ଚଳିତବର୍ଷ ସେପ୍ଟେମ୍ବରରେ ଏସିଆ କପ୍ ଆୟୋଜନ ଆଶା କ୍ଷୀଣ ରହିଛି। ମାତ୍ର ଯଦି ଏହା ଆୟୋଜନ ହୁଏ ତେବେ ପାକିସ୍ତାନରେ ନ ହୋଇ ଶ୍ରୀଲଙ୍କାରେ ହେବ। ପାକିସ୍ତାନ କ୍ରିକେଟ ବୋର୍ଡ(ପିସିବି) ଶ୍ରୀଲଙ୍କା କ୍ରିକେଟ ବୋର୍ଡ(ଏସଏଲସି) ସହିତ ଏସିଆ କପ୍ ଆୟୋଜନ ଅଧିକାର ଅଦଳ ବଦଳ କରିଛି। ତେବେ ଏସିଆନ କ୍ରିକେଟ କାଉନସିଲ (ଏସିସି) କାର୍ଯ୍ୟନିର୍ବାହୀ କମିଟି ଏହି ଅଦଳ ବଦଳକୁ ଅନୁମୋଦନ ଦେଇନାହିଁ। ଚଳିତ ମାସ ଶେଷ ବେଳକୁ ଆୟୋଜନ ଅଧିକାର ଯୋଜନାର ସ୍ପଷ୍ଟ ଚିତ୍ର ମିଳିବ। ଶ୍ରୀଲଙ୍କା ୨୦୧୦ ପରଠାରୁ ଏହି ଟୁର୍ନାମେଣ୍ଟ ଆୟୋଜନ କରିନାହିଁ। ତେଣୁ ସୁଯୋଗର ସଦ୍ବ୍ୟବହାର କରି ଘରୋଇ ଦର୍ଶକଙ୍କୁ ଆକୃଷ୍ଟ କରିବାକୁ ଚାହିଁବ। ପ୍ରତିଯୋଗିତାର ପୂର୍ବ ସଂସ୍କରଣରେ ଭାରତ ଚାମ୍ପିୟନ ହୋଇଥିଲା। ଜୁନ ୯ରେ ଭିଡିଓ କନ୍ଫରେନ୍ସ ମାଧ୍ୟମରେ ଏସିସିର କାର୍ଯ୍ୟନିର୍ବାହୀ ବୋର୍ଡ ବୈଠକ ବସିଥିଲା। ୨୦୨୦ ଏସିଆ କପ୍ ସମ୍ପର୍କରେ ଉଚିତ ସମୟରେ ନିଷ୍ପତ୍ତି ନିଆଯିବ ବୋଲି ମତପ୍ରକାଶ ପାଇଥିଲା।
