ବିଜେପୁର, ୩।୩ (ଡି.ଏନ୍.ଏ.)-
ଗଁାଗଁଲିର ମେଧାବୀ ପିଲାକୁଁ ଉଚ ଧରନ୍ର ଶିକ୍ଷା ଦେବାକେ ସବୁ ବ୍ଲକରେ ଆଦର୍ଶ ବିଦ୍ୟାଳୟ ଥାପନା କରବାକେ ରାଏଜ୍ ସରକାର୍ ଯୋଜନା କରିଛନ୍। ଇଥିରଲାଗି ସରକାର ରାଜ୍କୋଷନୁ ପାଏନ୍ ମିତାର ଟଁକା ଖରଚ୍ କରୁଛନ୍। ହେଲେ ବିଭାଗୀୟ ଅଧିକାରୀମାନକଁର ଉଦାସୀନତା ଲାଗି କେନ୍ଠାନେ କୁଠା ତ ଆର୍ କେନ୍ଠାନେ ଶିକ୍ଷକ୍ ସମସିଆ ରହିଛେ। ଏନ୍ତାଥି ସରକାରକଁର ଇ ମହତ୍ ଯୋଜନା ଫସର ଫାଟୁଥିବାର ଅଭିଯୋଗ ହେଉଛେ। ଏନ୍ତା ଗୁଟେ ଉଦାହରନ୍ ଦେଖ୍ବାକେ ମିଲିଛେ ବରଗଡ଼ ଜିଲା ବିଜେପୁର ବ୍ଲକ ସଦରଥି।
ସୂଚନା ଅନ୍ସାରେ ୨୦୨୦-୨୧ ଶିକ୍ଷା ବଛରରେ ବିଜେପୁର ବ୍ଲକରେ ଆଦର୍ଶ ବିଦ୍ୟାଳୟ ମୂଲ ହେବାକେ ଯାଉଛେ। ଇଥିରଲାଗି ଏମ.ଗଣ୍ଡପାଲି ଗଁା ସାମନାରେ ୩୨୩.୨୫ ଲାଖ୍ ଟଁକାରେ ସ୍କୁଲ କୁଠା ତିଆରି ହେଉଛେ। ଆଏବା ଶିକ୍ଷାବଛର ଏପ୍ରିଲ ମାସେ ଇଠାନେ ୬ଷ୍ଠ ଶ୍ରେଣୀ ଖୁଲବା। ସେନ୍ତା ଇଠାନେ କୁଲ ୮୦ ଝନ୍ ଛାତ୍ରୀଛାତ୍ର ପାଠ୍ପଢ଼ବାର ଯୋଜନା ଅଛେ। ନୂତନ ଶିକ୍ଷା ବଛର ମୂଲ ହେବାକେ ଆର କୁଲ ୩୦ ଦିନ ବାକି ଅଛେ। ହେଲେ ଏଭ୍ତକ କୁଠା ତିଆରି କାମ୍ ନୁହେ ସରେ। ଏନ୍ତାଥି ନଁା ଲେଖା ପିଲାକର ପାଠ୍ପଢ଼ାରେ ପଢ଼ାକୁଠି ଅଭାବଟା ବାଧକ ହେବା ବଲି ଆଶଁକା ଦେଖାଦେଇଛେ। ହେଲେ ଏପ୍ରିଲ ମାସୁ ଥାନୀଅ ସରକାରୀ ହାଇସ୍କୁଲରେ ପିଲାକୁ ପାଠ୍ ପଢ଼ାବାର ଯୋଜନା କରାଯାଇଥିବାର ଭିତରିଆ ହିସାବେ ଜନାପଡ଼ିଛେ। ଇଆଡ଼େ ଇ ହାଇସ୍କୁଲଥି ଛାତ୍ରୀଛାତ୍ରକଁର ଲାଗି ପଢ଼ାକୁଠି ସମସିଆ ରହିଥିଲାବେଲେ ଇଠାନେ କେନ୍ଥେଇ ଆଦର୍ଶ ସ୍କୁଲର ଛାତ୍ରୀଛାତ୍ର ପାଠ୍ ପଢ଼ବେ ବଲି ସାଧାରନରେ ଚରଚା ହେଉଛେ। ଇ ବାବ୍ଦେ ଛାତ୍ରୀର ଅଭିଭାବକ ଭରତ ସାହୁକୁଁ ପଚ୍ରାଲାରୁ ମୋର ଝି’ ଆଦର୍ଶ ବିଦ୍ୟାଲୟରେ ନଁା ଲେଖାବାର ଲାଗି ପରୀକ୍ଷା ଦେଇଛେ। ପରୀକ୍ଷା ବି ଭଲ କରିଛେ, ପାସ୍ ବି କରବା। ହେଲେ ଏଭ୍ତକ ଇ ସ୍କୁଲର କୁଠା ତିଆରି କାମ୍ ନୁହେ ସରେ କି ଶିକ୍ଷକ ନିଯୁକ୍ତ ନୁହେ ହୁଅନ୍। ତ ଏନ୍ତାଥି ପାଠ୍ପଢ଼ା କେନ୍ଠାନେ ହେବା ଆର କେନ୍ଥେଇ ହେବା କେଜାନେ। ଇ ଦିଗେ ଜିଲାପାଳ ଦୁରୁଷ୍ଟି ଦେଇ ପଦକ୍ଷେପ ନେବାର କଥା ବଲି ସେ କହିଥିଲେ। ସେନ୍ତା ଇ ବାବ୍ଦେ ଭାରପ୍ରାପ୍ତ ଗୋଷ୍ଠୀ ଶିକ୍ଷା ଅଧ୍କାରୀ ଅମୂଲ୍ୟ ପଧାନକୁଁ ପଚ୍ରାଲାରୁ ଆମକୁ ଖାଲି ପରୀକ୍ଷା ପରିଚାଲନା କରବାକେ ନିରଦେଶ ରହିଛେ। ବାକି ବିଷେଥି ମୁଇଁ ନାଇଁ ଜାନି ବଲି ସେ କହିଥିଲେ। ଇ ବାବ୍ଦେ ଆର୍ଡି ଏସ୍ଡିଓ ଜଗନ୍ନାଥ ମହାନ୍ତିକୁଁ ପଚ୍ରାଲାରୁ ଚଲତି ମାର୍ଚ୍ଚ ମାସ ଭିତରେ କାମ୍ ଶେଷ କରବାକେ ଠିକାଦାରକୁଁ ଟାର୍ଗେଟ ଦିଆଯାଇଛେ। ସୂଚନା ଫଲକଟେ ଲଗାଯାଇଥିଲା, ହେଲେ କିଏ ଭାଂଗି ଦେଇଛେ। ନୂଅଁା ସୂଚନା ଫଲକଟେ ଲଗା ଯିବା ବଲି ସେ କହିଥିଲେ।
