ତାଳଚେର, ୩୦ା୭ (ନି.ପ୍ର.)
ଅନୁଗୋଳ ଜିଲା କଣିହାଁ ସ୍ଥିତ ମହାରତ୍ନ କମ୍ପାନୀ ଏନ୍ଟିପିସି ବିଦ୍ୟୁତ୍ ପ୍ରକଳ୍ପରେ ଘୋର କୋଇଲା ସଙ୍କଟ ଦେଖାଦେଇଛି। ଭରତପୁର କୋଇଲା ଖଣିଠାରେ ଅତଡା ଖସିବା ଘଟଣା ପରେ ଗତ ୨୫ ତାରିଖରୁ ସମସ୍ତ ଖଣି ବନ୍ଦ ରହିଛି। ଫଳରେ ପ୍ରକଳ୍ପକୁ କୋଇଲା ପହଞ୍ଚିପାରୁ ନ ଥିବାରୁ ଷ୍ଟକ ସରିଆସିଲାଣି। ଆବଶ୍ୟକ ପରିମାଣର କୋଇଲା ନ ଥିବା ଯୋଗୁ ପ୍ରକଳ୍ପରେ ୩ଟି ୟୁନିଟ୍କୁ ବନ୍ଦ କରିଦିଆଯାଇଥିବା ଜଣାପଡିଛି। ତୁରନ୍ତ କୋଇଲା ଯୋଗାଣ ନ ହେଲେ ପ୍ରକଳ୍ପର ଅନ୍ୟ ୟୁନିଟ୍ଗୁଡିକ ବନ୍ଦ ହୋଇଯିବାର ଆଶଙ୍କା ଉପୁଜିଛି।
କଣିହାଁରେ ୩ ହଜାର ମେଗାଓ୍ବାଟ (୫ ଶହ ମେଗାୱାଟ ବିଶିଷ୍ଟ ୬ଟି) ବିଦ୍ୟୁତ୍ ଉତ୍ପାଦନ ୟୁନିଟ ରହିଛି। ଏହି ପ୍ରକଳ୍ପ ପାଇଁ ଦୈନିକ ୫୫ ହଜାର ମେଟ୍ରିକ ଟନ କୋଇଲା ଆବଶ୍ୟକ ହୋଇଥାଏ। କଣିହାଁ କୋଇଲା ଖଣିରୁ ୨୫/୩୦ ହଜାର ଓ ତାଳଚେର ଲିଙ୍ଗରାଜରୁ ୨୫/୩୦ ହଜାର ମେଟ୍ରିକ ଟନ କୋଇଲା ମିଳିଥାଏ। ହେଲେ ଭରତପୁର ଦୁର୍ଘଟଣା ପରେ ଗତ ୨୫ ତାରିଖରୁ ସମସ୍ତ କୋଇଲା ଖଣି ବନ୍ଦ ରହିଛି। ଫଳରେ ଏନ୍ଟିପିସିକୁ ଆଦୌ କୋଇଲା ଯୋଗାଣ ହୋଇପାରୁନାହିଁ। ଷ୍ଟକରେ ଗଚ୍ଛିତ କୋଇଲାକୁ ଗତ କିଛି ଦିନ ହେଲା ବିଦ୍ୟୁତ୍ ଉପତ୍ାଦନ ନିମନ୍ତେ ବ୍ୟବହାର କରାଯାଉଥିଲା। ଏବେ ଷ୍ଟକରେ ୫୦ ହଜାର ମେଟ୍ରିକ ଟନରୁ କମ କୋଇଲା ଥିବା ଏନଟିପିସି ସୂତ୍ରରୁ ଜଣାପଡିଛି, ଯାହା ଅଧା ଦିନ ପାଇଁ ମଧ୍ୟ ଯଥେଷ୍ଟ ନୁହେଁ। ଆବଶ୍ୟକ ପରିମାଣରେ କୋଇଲା ମିଳୁ ନ ଥିବା ଓ ଷ୍ଟକ ଶେଷ ହୋଇଯାଉଥିବା କାରଣରୁ ପ୍ରକଳ୍ପ କର୍ତ୍ତୃପକ୍ଷ ପ୍ଲାଣ୍ଟର ୧, ୪ ଓ ୫ ନମ୍ବର ୟୁନିଟକୁ ବନ୍ଦ କରି ସାରିଲେଣି। ଏଭଳି ସ୍ଥିତି ଜାରି ରହିଲେ ଅନ୍ୟ ୟୁନିଟଗୁଡିକୁ ଏନ୍ଟିପିସି କର୍ତ୍ତୃପକ୍ଷ ବନ୍ଦ କରିବାକୁ ବାଧ୍ୟହେବେ ବୋଲିି ଜଣାପଡିଛି ା ରବିବାର କାର୍ଯ୍ୟକ୍ଷମ ୩ଟି ୟୁନିଟରୁ ୧୫ଶହ ମେଗାୱାଟ ବଦଳରେ ୯୮୦.୯୪ ୟୁନିଟ ବିଦ୍ୟୁତ୍ ଉପତ୍ାଦନ ହୋଇଥିଲା। ପ୍ଲାଣ୍ଟରୁ ଦୈନିକ ଓଡ଼ିଶାକୁ ୫୨୩ ମେଗାୱାଟ ବିଦ୍ୟୁତ୍ ଯୋଗାଣ ହୋଇଥାଏ ା ଓଡ଼ିଶା ବ୍ୟତୀତ ତାମିଲନାଡୁ, କେରଳ, କର୍ନାଟକ, ତେଲେଙ୍ଗାନା, ବିହାର, ପଶ୍ଚିମବଙ୍ଗ, ଝାଡଖଣ୍ଡ ସମେତ ଉତ୍ତର, ଦକ୍ଷିଣ ଓ ପୂର୍ବ ଭାରତର ପ୍ରାୟ ୧୭ ରାଜ୍ୟକୁ ବିଦ୍ୟୁତ୍ ଯୋଗାଣ ହୋଇଥାଏ। ହେଲେ ଏହି ସବୁ ଜୋନକୁ ଏବେ ବିଦ୍ୟୁତ୍ ଯୋଗାଣ ବାଧାପ୍ରାପ୍ତ ହେବାର ଆଶଙ୍କା ଉପୁଜିଛି। ଏ ସମ୍ପର୍କରେ ଏନ୍ଟିପିସିର ଜନସମ୍ପର୍କ ଅଧିକାରୀ ଅମିତ କୁମାର ବେହେରା କହିଛନ୍ତି, ରବିବାର ୧ ହଜାର ମେଗାୱାଟରୁ କମ୍ ବିଦ୍ୟୁତ୍ ଉପତ୍ାଦନ ହୋଇଛି ା କୋଇଲା ନ ମିଳିଲେ ଅନ୍ୟ ୟୁନିଟଗୁଡିକୁ ବନ୍ଦ କରିବାକୁ ପଡିବ।
ତେବେ ବାରମ୍ବାର ଏପରି ପରିସ୍ଥିତି ଉପୁଜୁଥିବା ସତ୍ତ୍ୱେ କାହିଁକି ପ୍ରକଳ୍ପ କର୍ତ୍ତୃପକ୍ଷ ବିକଳ୍ପ ବ୍ୟବସ୍ଥା କରୁନାହାନ୍ତି ସେ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି। ଏଥିପାଇଁ ପ୍ଲାଣ୍ଟ ଅଧିକାରୀଙ୍କ ଅବହେଳା ଦାୟୀ ବୋଲି ଅଭିଯୋଗ ହୋଇଛି।
