କୋଲକାତା, ୫।୭ (ପି.ଟି.)- ଇଣ୍ଡିଆନ ସୁପର ଲିଗ୍ର ଆସନ୍ତା ସିଜନ ପାଇଁ ପୂର୍ବତନ ଚାମ୍ପିୟନ ଏଟିକେ ଶୁକ୍ରବାର ପୂର୍ବତନ ଭାରତୀୟ ଡିଫେଣ୍ଡର ଆନାସ ଏଦାଥୋଡିକାଙ୍କୁ ଅନୁବନ୍ଧିତ କରିଛି। ଆନାସଙ୍କ ଯୋଗଦାନ ପରେ ଏଟିକେର ଡିଫେନ୍ସ ଲାଇନ୍ ଅଧିକ ଶକ୍ତିଶାଳୀ ହୋଇପାରିଛି। ତାଙ୍କ ସହିତ ଜାତୀୟ ଦଳର ସନ୍ଦେସ ଝିଙ୍ଗାନ ଏହି ପୋଜିଶନରେ ଖେଳିବେ। ୨୦୧୧ରେ ପୁଣେ ଏଫ୍ସିରେ ଯୋଗଦାନ କରିବା ପୂର୍ବରୁ ଆନାସ ଆଇ-ଲିଗ୍ରେ ମୁମ୍ବାଇ ତରଫରୁ ଖେଳି ତାଙ୍କ କ୍ୟାରିୟର ଆରମ୍ଭ କରିଥିଲେ। ସେ ୨୦୧୩-୧୪ରେ ଦଳର ଅଧିନାୟକ ହୋଇଥିଲେ। ସେ ୨୦୧୨-୧୩ରେ ପୁଣେ ଫୁଟ୍ବଲ କ୍ଲବ ପ୍ଲେୟର ଅଫ୍ ଦି ଇୟର ପୁରସ୍କାର ଜିତିଥିଲେ। ସେ ପ୍ରଥମ ଭାରତୀୟ ତଥା ପ୍ରଥମ ଡିଫେଣ୍ଡର ଭାବେ ଏହି ପୁରସ୍କାର ଜିତିଥିଲେ। ଆଇଏସଏଲ୍ରେ ଆନାସ ୨୦୧୭-୧୮ ସିଜନରେ ଜାମଶେଦପୁର ଏଫ୍ସି ତରଫରୁ ଖେଳି ପ୍ରତିଯୋଗିତାରେ ପ୍ରଥମ ପଦାର୍ପଣ କରିଥିଲେ। ପରବର୍ତ୍ତୀ ସିଜନରେ ସେ ତାଙ୍କ ପୂର୍ବତନ ଭାରତୀୟ ଟିମ୍ମେଟ୍ ଝିଙ୍ଗାନଙ୍କ ସହିତ କେରଳ ବ୍ଲାଷ୍ଟର୍ସ ଏଫ୍ସିରେ ଯୋଗ ଦେଇଥିଲେ।
