ନୂଆପଡା ଅଫିସ/ତରବୋଡ,୧।୧୦(ଡି.ଏନ.ଏ.)
ସମାଜରେ ଶିକ୍ଷାର ଆବଶ୍ୟକତା ରହିଛି । ଶିକ୍ଷିତ ହୋଇ ସଙ୍ଗଠିତ ହେବା। ଏକତ୍ରିତ ହୋଇ ନିଜର ସାମ୍ବିଧାନିକ ଅଧିକାର ପ୍ରତି ସଜାଗ ହୋଇ ଲଢିବା ଦରକାର ବୋଲି ମତ ପ୍ରକାଶ ପାଇଛି। ନୂଆପଡ଼ା ଜିଲା କୋମନା ବ୍ଲକ ତରବୋଡଠାରେ ଆୟୋଜିତ ଡମ, ଗଣା ସମାଜର ନୂଆଁଖାଇ ଭେଟଘାଟ କାର୍ଯ୍ୟକ୍ରମରେ ଯୋଗଦେଇ ଅତିଥିମାନେ ଏହି ମତ ରଖିଛନ୍ତି । ଆୟୋଜକ ଆମ୍ବେଡକର ଯୁବୋଦୟ କ୍ଲବ ପକ୍ଷରୁ ରାଜେଶ କୁମାର ଜଗତ ସଭାପତିତ୍ୱ କରିଥିବାବେଳେ ଭୁବନେଶ୍ୱରରୁ ଆସିଥିବା ମୂଲନିବାସୀ ସମତା ପରିଷଦର ରାଜ୍ୟ ସଭାପତି ଅଭିରାମ ମଲ୍ଲିକ ମୁଖ୍ୟଅତିଥି, କଳାହାଣ୍ଡିରୁ ଦୟାନିଧି ନାୟକ, ଜିଲା ପରିଷଦ ସଭ୍ୟା ଭୁଗୁଲି ସୁନାନୀ, ଯୁବନେତା କାର୍ତ୍ତିକ ଦୀପ, ନୂଆଁଖାଇ ଭେଟ କାର୍ଯ୍ୟକ୍ରମ ପରିଚାଳନା କମିଟିସଭାପତି ରବୀନ୍ଦ୍ର ମଙ୍ଗରାଜ ପ୍ରମୁଖ ସମ୍ମାନିତ ଅତିଥି ଭାବେ ଯୋଗଦେଇଥିଲେ । କାର୍ଯ୍ୟକ୍ରମ ପ୍ରାରମ୍ଭରେ ଏକ ବିଶାଳ ଶୋଭାଯାତ୍ରା ସହର ପରିକ୍ରମା କରିଥିଲା । ଏଥିରେ ତରବୋଡ ସମେତ ଆଖପାଖ ଅଞ୍ଚଳର ଶତାଧିକ ମହିଳା ପୁରୁଷମାନେ ଯୋଗଦେଇଥିଲେ । ଡ. ଭୀମରାଓ ବାବାସାହେବ ଆମ୍ବେଡକରଙ୍କ ନୀତି ଓ ଆଦର୍ଶରେ ଅନୁପ୍ରାଣୀତ ହୋଇ ଜାତି ପ୍ରତି ଉତ୍ସର୍ଗୀକୃତ ଭାବେ କାମ କରିବାକୁ ବକ୍ତାମାନେ ଆହ୍ବାନ ଦେଇଥିଲେ। ଏହି ଅବସରରେ ଠୁଳ ହୋଇଥିବା ସମସ୍ତ ପରିବାର ପାରମ୍ପରିକ ଭାବେ ନୂଆଁଖାଇଥିଲେ। ପରେ ପରସ୍ପର ମଧ୍ୟରେ ନୂଆଁଖାଇ ଭେଟଘାଟ କରିଥିଲେ। ଏହି ଅବସରରେ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ହୋଇଥିଲା। ସମାଜର ବିଭିନ୍ନ କ୍ଷେତ୍ରରେ ଉଲ୍ଲେଖନୀୟ କାର୍ଯ୍ୟକଳାପ ସକାଶେ ପୁରସ୍କୃତ କରାଯାଇଥିଲା । ଏଥିରେ ସମସ୍ତ ସାମାଜିକ କଳାକାରମାନେ ନିଜର କୃତୀତ୍ୱ ପ୍ରଦର୍ଶନ କରିଥିଲେ। କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ଢୋର୍ଲା ସରପଞ୍ଚ ସାନ ମହାନନ୍ଦ, ସାମାଜିକ କର୍ମୀ ଉପାସୁ ସୁନାନୀ ପ୍ରମୁଖ ଯୋଗଦେଇଥିଲେ। କାର୍ଯ୍ୟକ୍ରମ ଶେଷରେ ରବୀନ୍ଦ୍ର ମଙ୍ଗରାଜ ଧନ୍ୟବାଦ ଜ୍ଞାପନ କରିଥିଲେ।
