ପରିବାର ସଦସ୍ୟଙ୍କ ସହ ଶିକାରକୁ ଯାଉଥିବା ପିଲାଟିର ମନରେ ବିରାଟ ପରିବର୍ତ୍ତନ ଆସିବା ପରେ ସେ ଆଉ ଶିକାର ନ କରି ପ୍ରାଣୀମାନଙ୍କ ଉଦ୍ଧାର କାର୍ଯ୍ୟରେ ଲାଗିପଡ଼ିଛନ୍ତି। ସେ ହେଉଛନ୍ତି ନାଗାଲାଣ୍ଡର ରୁଭୌତୋ ବେଲ୍ହୋ। ୨୦୦୩ରୁ ସେ ଏହି କାର୍ଯ୍ୟରେ ଲାଗିଛନ୍ତି। ଗୋଟିଏ ବିରଳ ପ୍ରଜାତିର ପକ୍ଷୀ ଶିକାର କରିବା ପରେ ସେ ଆଉ ଏହି କାର୍ଯ୍ୟ ନ କରିବାକୁ ପ୍ରତିଶ୍ରୁତିବଦ୍ଧ ହୋଇଥିଲେ। କେବଳ ସେତିକି ନୁହେଁ, ବେଲ୍ହୋ ଉଦ୍ଧାର କରୁଥିବା ପଶୁପକ୍ଷୀଙ୍କ ଚିକିତ୍ସା ଖର୍ଚ୍ଚ ନିଜେ ବହନ କରୁଛନ୍ତି। ସେମାନଙ୍କୁ ଚିକିତ୍ସା ପରେ ପୁନର୍ବାର ଜଙ୍ଗଲରେ ଛାଡ଼ିଦେଇଆସୁଛନ୍ତି। ସେ ଘରେ ମଧ୍ୟ ବିଲୁପ୍ତ ହୋଇଯାଉଥିବା ୬୦ଟି ପ୍ରଜାତିର ପଶୁ ଓ ପକ୍ଷୀ ରଖିଛନ୍ତି। ଏଥିପାଇଁ ୧ ଏକର ଜମିରେ ଘର କରି ତାହାକୁ ଏକ ମିନି ଚିଡ଼ିଆଖାନା କରିଛନ୍ତି। ସେଠାରେ ଅଛନ୍ତି ବିଭିନ୍ନ ବିରଳ ପ୍ରଜାତିର ବଗ, ପେଚା, ମାଙ୍କଡ଼, ଶୁଆ, ହରିଣ, ଚିତାବାଘ ଓ ଭାରତର କଳା କଇଁଛ ।
ଲୋକମାନଙ୍କୁ ଦେଖିବା ଲାଗି ସୁଯୋଗ ଦେଉଛନ୍ତି। ସବୁଠୁ ବଡ଼ କଥା ହେଉଛି, ଲୋପ ପାଇଯାଉଥିବା ଏହିସବୁ ପ୍ରଜାତିର ଜୀବଙ୍କ ପାଇଁ ସେ ସ୍ବତନ୍ତ୍ର ଯତ୍ନ ନେଉଛନ୍ତି। ଏବେ ସେ ଆଉ ଏକ ଜମି କିଣି ତାଙ୍କ ମିନି ଚିଡ଼ିଆଖାନାକୁ ବଢ଼ାଇବା ଲାଗି ଯୋଜନା କରିଛନ୍ତି।
