ଦେଶରେ ଲକ୍ଡାଉନ ଆରମ୍ଭ ହେବାଠାରୁ ଅଦ୍ୟାବଧି ପ୍ରାୟ ୨୦୦ ଲୋକଙ୍କୁ ସେମାନଙ୍କ ଘରେ ପହଞ୍ଚାଇବାରେ ପ୍ରମୁଖ ଭୂମିକା ନେଇଛନ୍ତି ମହାରାଷ୍ଟ୍ରର ବିଦ୍ୟା ଶେଲ୍କେ। ମୁମ୍ବାଇର ଉପାନ୍ତ ଅଞ୍ଚଳ ମୁଲନ୍ଦରେ ତାଙ୍କ ସ୍ବାମୀ ଓ ଦୁଇ ସନ୍ତାନଙ୍କ ସହ ରହନ୍ତି ୨୭ ବର୍ଷୀୟା ବିଦ୍ୟା। ସେ ଚାକିରି କରିଥିଲେ। କିନ୍ତୁ କୋଭିଡ୍-୧୯ ମହାମାରୀ ଯୋଗୁ ତାହା ହରାଇଲେ। ଏହି ବିପର୍ଯ୍ୟୟ ତାଙ୍କ ପାଇଁ ସୁଯୋଗ ବି ଆଣିଦେଲା। କିଶୋରୀ ଅବସ୍ଥାରେ ଡ୍ରାଇଭିଂ ଶିଖିଥିବା ବିଦ୍ୟା ପୁଣି ଟ୍ୟାକ୍ସି ଚଳାଇବା ଆରମ୍ଭ କରି ପରିବାର ପ୍ରତିପୋଷଣ କରିବା ସହ ଅସହାୟ ଲୋକମାନଙ୍କୁ ସୁରକ୍ଷିତ ଭାବେ ସେମାନଙ୍କ ଘରେ ପହଞ୍ଚାଉଛନ୍ତି। ଅସହାୟମାନଙ୍କୁ ଠିକଣା ସ୍ଥାନରେ ପହଞ୍ଚାଇବା ସମ୍ପର୍କରେ ପ୍ରଥମେ ଏକ ଭିଡିଓ ମେସେଜ୍କୁ ସୋସିଆଲ ମିଡିଆରେ ଅପ୍ଲୋଡ କରିବା ପରେ ଲୋକମାନେ ତାଙ୍କ ସହଯୋଗ ଲୋଡିଥିଲେ। ଅପ୍ଲୋଡ କରିବାର ମାତ୍ର ୧୦ ମିନିଟ୍ ପରେ ବରିଷ୍ଠ ନାଗରିକ, ଗର୍ଭବତୀ ମହିଳା, ପ୍ରବାସୀ ଶ୍ରମିକଙ୍କ ପରିବାରଙ୍କଠାରୁ କଲ୍ ପାଇଥିଲେ ଓ ତାଙ୍କୁ ସାହାଯ୍ୟ କରିବା ଲାଗି ବାହାରି ପଡିଥିଲେ। ସେବେଠାରୁ ପ୍ରତିକୂଳ ପରିସ୍ଥିତିରେ ସାହସିକତାର ପରିଚୟ ଦେଇଆସୁଛନ୍ତି ବିଦ୍ୟା। ଏମିତି କି ଶହ ଶହ କିଲୋମିଟର ଦୂରରେ ଲୋକମାନଙ୍କୁ ପହଞ୍ଚାଉଛନ୍ତି। ମହାମାରୀ ଯୋଗୁ ବିଭିନ୍ନ ସ୍ଥାନରେ କଟକଣା ଲାଗୁ କରାଯାଉଥିଲେ ବି ପ୍ରଶାସନର ଅନୁମତି ନେଇ ସେ ଲୋକମାନଙ୍କୁ ନେଉଛନ୍ତି।
