ଅଧାରୁ ପାଠ ଛାଡ଼ି ନିଶା କବଳରେ ପଡ଼ିଯାଉଥିବା ପିଲାମାନଙ୍କ ଜୀବନରେ ନୂଆ ଆଶା ଭରି ଦେଉଛନ୍ତି ନାଗାଲାଣ୍ଡର ଜେନ୍ପୁ ରୋଙ୍ଗ୍ମେଇ। ଡିମାପୁର ନିବାସୀ ଜେନ୍ପୁ ଏଭଳି ୧,୦୦୦ରୁ ଊର୍ଦ୍ଧ୍ୱ ପିଲାଙ୍କୁ ପୁଣି ସମାଜର ମୁଖ୍ୟ ଧାରାରେ ସାମିଲ କରିପାରିଛନ୍ତି। ଜେନ୍ପୁ ୨୦୧୦ରେ ଆରମ୍ଭ କରିଥିଲେ‘ୟଙ୍ଗସ କ୍ଲବ୍’। ପରେ ୨୦୧୩ରେ ଏହାକୁ ପଞ୍ଜୀକରଣ କରିବା ସହ ଏହାର ନାମ ପରିବର୍ତ୍ତନ କରି ରଖିଥିଲେ ‘କ୍ୟାନ୍ ୟୁଥ୍’। ଏହା ମାଧ୍ୟମରେ ପାଠ ଛାଡ଼ିଥିବା ପିଲାମାନଙ୍କୁ ପୁଣି ସ୍କୁଲ୍ ଓ କଲେଜରେ ନାମ ଲେଖାଇବାର ବ୍ୟବସ୍ଥା କରୁଛନ୍ତି। ୩୬ ବର୍ଷୀୟ ଜେନ୍ପୁ ଏହି ସଂସ୍ଥା ମାଧ୍ୟମରେ କ୍ରୀଡା ଶିବିର, ରାକ୍ତଦାନ ଶିବିର ତଥା ଧନ୍ଦାମୂଳକ ପ୍ରଶିକ୍ଷଣ କ୍ୟାମ୍ପ ଆଦି ଆୟୋଜନ କରୁଛନ୍ତି। ଅର୍ଥାଭାବରୁ ଆଦୌ ସ୍କୁଲ ଯାଇପାରୁ ନ ଥିବା ପିଲାମାନଙ୍କୁ ବି ସେ ସାହାଯ୍ୟ ଯୋଗାଇ ଦେଉଛନ୍ତିି। ତାଙ୍କ ୟଙ୍ଗ ଟିମ୍ରେ ସ୍ନାତକ ଡିଗ୍ରୀଧାରୀ ମହିଳାଙ୍କ ସମେତ ୧୧ ଜଣ ବୋର୍ଡ ମେମ୍ବର ରହିଛନ୍ତି। ଏବେ ଲକ୍ଡାଉନ୍ରେ ‘କ୍ୟାନ୍ ୟୁଥ୍’ ଅସହାୟ ଲୋକମାନଙ୍କୁ ରାଶନ ସାମଗ୍ରୀ ବଣ୍ଟନ କରୁଛି। ୨୦୧୮ରେ ବିଶ୍ୱବ୍ୟାଙ୍କ ଦ୍ୱାରା କରାଯାଇଥିବା ଏକ ସର୍ଭେରୁ ଜଣାପଡିଥିଲା ଯେ ନାଗାଲାଣ୍ଡରେ ଡ୍ରପ୍ଆଉଟ ହାର ଜାତୀୟ ହାରର ୪ଗୁଣ। ଏଭଳି ସ୍ଥିତିରେ ପରିବର୍ତ୍ତନ ଆଣିବାରେ ଜେନ୍ପୁଙ୍କ ଭଳି ଯୁବକଙ୍କ ପ୍ରୟାସ ନିଶ୍ଚିତ ଭାବେ ପ୍ରଶଂସନୀୟ।
