ଲକ୍ଡାଉନରେ ଗରିବମାନଙ୍କୁ ଖାଦ୍ୟ ଓ ରାଶନ ସାମଗ୍ରୀ ଯୋଗାଇ ଦେଇ ବହୁ ବ୍ୟକ୍ତି କରୋନା ବିରୋଧୀ ଲଢେଇ ଜାରି ରଖିଥିବାବେଳେ ଏ କ୍ଷେତ୍ରରେ ବେଙ୍ଗାଲୁରୁର ଏସ୍.ବୀଣାଙ୍କ ଯୋଗଦାନ ବେଶ୍ ପ୍ରେରଣାଦାୟକ। ସେ ଜଣେ ଟ୍ରାନ୍ସଜେଣ୍ଡର। ଦେହଜୀବୀଙ୍କ କଲ୍ୟାଣ ପାଇଁ କାର୍ଯ୍ୟ କରୁଥିବା ସଲିଡାରିଟି ଫାଉଣ୍ଡେଶନରେ କାର୍ଯ୍ୟ କରୁଛନ୍ତି। ଲକ୍ଡାଉନ ଘୋଷଣା ହେବା ପୂର୍ବରୁ ବି ବୀଣା ରାସ୍ତାରେ ଯିବା ସମୟରେ ବହୁ ଅସହାୟ ଲୋକଙ୍କୁ ସାହାଯ୍ୟ କରନ୍ତି, ସେମାନଙ୍କ ସମସ୍ୟା ବି ସମାଧାନ କରିଥାନ୍ତି। କିନ୍ତୁ ଲକ୍ଡାଉନରେ ବେଙ୍ଗାଲୁରୁର ଗାନ୍ଧୀନଗର ପାଖରେ ରହୁଥିବା ୫୦୦ରୁ ଊର୍ଦ୍ଧ୍ୱ ପରିବାରକୁ ସେ ରାଶନ ସାମଗ୍ରୀ ଯୋଗାଇଦେବା ସହ ଟ୍ରାନ୍ସଜେଣ୍ଡରମାନଙ୍କୁ ରନ୍ଧାଖାଦ୍ୟ ମଧ୍ୟ ଦେଉଛନ୍ତି। ଏଥିପାଇଁ ସବୁ ଖର୍ଚ୍ଚ ସେ ନିଜ ପଟେକରୁ କରୁଛନ୍ତି। ସେ ପ୍ରତିଦିନ ୩୦୦ ଜଣଙ୍କୁ ଖାଦ୍ୟ ପାର୍ସଲ ଦେଉଛନ୍ତି। ଓକାଲିପୁରମ୍ରେ ରହୁଥିବା ଟ୍ରାନ୍ସଜେଣ୍ଡମାନଙ୍କୁ ୨୦୦ଟି ପାର୍ସଲ ଦେବା ପରେ ଆଉ ୧୦୦ଟି ବସ୍ତିବାସିନ୍ଦାଙ୍କ ପାଖରେ ପହଞ୍ଚାଉଛନ୍ତି। ଆଖପାଖ ଅଞ୍ଚଳରେ ରହୁଥିବା ଗରିବ ଲୋକମାନଙ୍କୁ ନିଜ ପରିବାର ସଦସ୍ୟ ମନେକରି ସେମାନଙ୍କୁ ସାହାଯ୍ୟ କଲେ ଏହି ଲକ୍ଡାଉନ ସମୟରେ କାହାର ବି କୌଣସି ଅସୁବିଧା ରହିବ ନାହିଁ ବୋଲି କହନ୍ତି ବୀଣା।
