ଆଲ୍ଲାହାବାଦରେ ଅନୁଷ୍ଠିତ ସର୍ବପୁରାତନ ରାମଲୀଳା ମହୋତ୍ସବରେ ମୁସଲମାନଙ୍କ ଯୋଗଦାନ ସାମ୍ପ୍ରଦାୟିକ ସଦ୍ଭାବନାର ପ୍ରତୀକ ସାଜିଛିି। ଏହି ମହୋତ୍ସବରେ ହନୁମାନଙ୍କ ପ୍ରତିକୃତି ଗଢିଥାନ୍ତି ଏକ ମୁସଲମାନ ପରିବାର। ରାମଲୀଳା ଲାଗି ଆକର୍ଷଣୀୟ ରଥ ଓ ପାରମ୍ପରିକ ଅସ୍ତ୍ରଶସ୍ତ୍ର ମଧ୍ୟ ତିଆରି କରନ୍ତି ଏମାନେ। ଆଲ୍ଲାହାବାଦର ପାଥରଛତିରେ ଅନୁଷ୍ଠିତ ଏହି ରାମଲୀଳାରେ ନିସାର ଅହମ୍ମଦ ଓ ତାଙ୍କ ପରିବାରର ୮ ଜଣ ସଦସ୍ୟ ଭାଗନେବା ଭାଇଚାରାର ବାର୍ତ୍ତା ଦେଉଛି। ନିସାରଙ୍କୁ ଏବେ ୫୬ ବର୍ଷ ବୟସ ଓ ସେ ଜଣେ ପେଣ୍ଟର ଭାବେ ଧୁମନଗଞ୍ଜରେ କାର୍ଯ୍ୟ କରନ୍ତି। ୨୧ ବର୍ଷ ବୟସରୁ ସେ ଏହି କାର୍ଯ୍ୟ କରିଆସୁଛନ୍ତିି। ତାଙ୍କୁ ଏହି କାର୍ଯ୍ୟରେ ସାହାଯ୍ୟ କରିବା ପାଇଁ ଦୁଇ ଜଣ ବ୍ୟକ୍ତିଙ୍କୁ ବି ଆଣିଥାନ୍ତି। ଏମାନଙ୍କ ମଧ୍ୟରୁ ଜଣଙ୍କର ନାମ ହନୁମାନ ଓ ଆଉ ଜଣଙ୍କର ନାମ ମିଥିଳେଶ। ସେମାନେ ନିସାରଙ୍କ ସହ ୨୦ ବର୍ଷ ହେବ କାର୍ଯ୍ୟ କରୁଛନ୍ତି। ଆସୁରିକ ଶକ୍ତି ଉପରେ ସତ୍ୟର ଜୟ ବୋଲି ରାମଲୀଳାକୁ ସେଠାକାର ବହୁ ମୁସଲମାନ ଗ୍ରହଣ କରନ୍ତି। ଏହି ରାମଲୀଳାରେ ୬୫ ବର୍ଷୀୟ ଇକ୍ବାଲ ଅହମ୍ମଦ ରାମଙ୍କୁ ଗଙ୍ଗାନଦୀ ପାର କରିଥିବା କୈବର୍ତ୍ତ ଭୂମିକାରେ ଅଭିନୟ କରନ୍ତି। ସୁହେଲ ଖାନ୍ ବି ରାଜା ଦଶରଥ ଭୂମିକାରେ ଅଭିନୟ କରୁଛନ୍ତି। ରାମାୟଣ ମୁସଲମାନଙ୍କ ମଧ୍ୟରେ ଆଦୃତ ଓ ଏଥିପାଇଁ ସେମାନେ ରାମାୟଣର ବିଭିନ୍ନ ଚରିିତ୍ରରେ ସହଜରେ ଅଭିନୟ କରିପାରୁଛନ୍ତି ବୋଲି କୁହନ୍ତି ସୋହେଲ। ।
