ଆଡିଲେଡ୍,୧୮।୧୨: ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ଚାରି ମ୍ୟାଚ ବିଶିଷ୍ଟ ବର୍ଡର-ଗାଭାସ୍କର ଟ୍ରଫି ଆରମ୍ଭ ହୋଇଛି। ସିରିଜର ପ୍ରଥମ ଟେଷ୍ଟ ମ୍ୟାଚ ଆଡିଲେଡରେ ଖେଳାଯାଉଛି। ଏହି ଦିବାରାତ୍ର ଟେଷ୍ଟ ମ୍ୟାଚର ପ୍ରଥମ ଦିନରେ ଭାରତୀୟ କ୍ରିକେଟ ଦଳର ଅଧିନାୟକ ବିରାଟ କୋହଲି ଅଧିନାୟକତ୍ୱର ଆଉ ଏକ ରେକର୍ଡ ଭାଙ୍ଗିଛନ୍ତି। ଏହି ରେକର୍ଡ ପୂର୍ବରୁ ପୂର୍ବତନ ଅଧିନାୟକ ମନସୁର ଅଲି ଖାନ ପଟୌଦିଙ୍କ ନାମରେ ଥିଲା। କରୋନା ଯୋଗୁ ଦୀର୍ଘ ସମୟ ପରେ ଭାରତୀୟ ଅଧିନାୟକ କୋହଲି ଟେଷ୍ଟ କ୍ରିକେଟରେ ପ୍ରତ୍ୟାବର୍ତ୍ତନ କରିଥିଲେ। ସେ ୭୪ ରନର ଏକ ଇନିଂସ ସ୍କୋର କରିଥିଲେ। ଭାରତୀୟ ‘ରନ ମେସିନ’ ଭାବେ ଜଣାଶୁଣା ବିରାଟ କୋହଲି ଅଷ୍ଟ୍ରେଲିଆ ବିପକ୍ଷରେ ସର୍ବାଧିକ ଟେଷ୍ଟ ରନ ସ୍କୋର କରିଥିବା ଭାରତୀୟ ଅଧିନାୟକ ହୋଇଛନ୍ତି। ବିରାଟ ଅଧିନାୟକ ଭାବରେ ଅଷ୍ଟ୍ରେଲିଆ ବିପକ୍ଷରେ ୮୫୧ ରନ ସଂଗ୍ରହ କରିଛନ୍ତି। ଏଥି ସହିତ, ପଟୌଦି ଅଷ୍ଟ୍ରେଲିଆ ବିପକ୍ଷରେ ଅଧିନାୟକ ଭାବରେ ୧୦ଟି ଟେଷ୍ଟରେ ୮୨୯ରନ ସଂଗ୍ରହ କରିଥିଲେ। କୋହଲି ମଧ୍ୟ ବର୍ଡର ଗାଭାସ୍କର ଟ୍ରଫିରେ ୮୧୩ ରନ ସଂଗ୍ରହ କରିଥିବା ମହେନ୍ଦ୍ର ସିଂ ଧୋନୀଙ୍କ ଅଧିନାୟକତ୍ୱର ରେକର୍ଡ ଭାଙ୍ଗିଛନ୍ତି।
