ଜୟପୁର,୧୯ା୧(ଡି.ଏନ୍.ଏ.):ଜୟପୁର ବ୍ଲକ ସଦର ଉପକଣ୍ଠ ବାରିଣିପୁଟ ପଞ୍ଚାୟତ ପରଜା ସାହିରେ ଏକ ନିର୍ଜନ ଚାଷଜମିରେ ବେଆଇନ ଇଟାଭାଟି ଗଢ଼ି ଉଠିଛି। ତାରି ଭିତରେ ରହିଛି ଅଙ୍ଗନୱାଡ଼ି କେନ୍ଦ୍ର ା ସରକାର ଅଙ୍ଗନୱାଡ଼ି କେନ୍ଦ୍ର ସ୍ଥାପନ ପାଇଁ ଲକ୍ଷାଧିକ ଟଙ୍କା ଖର୍ଚ୍ଚ କରି ଗୃହ ନିର୍ମାଣ କରୁଛନ୍ତି। କିନ୍ତୁ ନିର୍ମାଣ ପୂର୍ବରୁ କେନ୍ଦ୍ରର ଆଖାପଖ ପରିବେଶ, ଗମନାଗମନ ଓ ଅନ୍ୟ ବ୍ୟବସ୍ଥାକୁ ଅଣଦେଖା କରି ସରକାରୀ ଅଧିକାରୀ ଜମି ଚିହ୍ନଟ ସହ ଗୃହ ନିର୍ମାଣ କରୁଛନ୍ତି। ଫଳରେ ଏହା ଅବ୍ୟବହୃତ ଭାବେ ପଡ଼ି ରହୁଛି। ଶେଷରେ ଭାଙ୍ଗି ଯାଉଛି କିମ୍ବା ଜବରଦଖଲକୁ ଚାଲିଯାଉଛି। ବାରିଣିପୁଟ ପଞ୍ଚାୟତରେ ଥିବା ଅଙ୍ଗନୱାଡ଼ି କେନ୍ଦ୍ର ସମଦଶା ଭୋଗିଛି। ଚାରିପାଖ ଚାଷଜମି ଥିବାବେଳେ ଯାତାୟାତ ପାଇଁ ରାସ୍ତାଟିଏ ନାହିଁ। ବେଆଇନ ଭାଟିରେ ଧାନ ଚଷୁ ଦ୍ୱାରା ଇଟା ପୋଡ଼ା ହେଉଥିବା ଅଞ୍ଚଳରେ ପ୍ରଦୂଷଣ ବଢୁଛି। ଭାଟି ପାଇଁ ମାଟି ଖୋଳାଯାଇ ବଡ଼ବଡ଼ ଗାତ ସୃଷ୍ଟି ହୋଇଛି। ନୂତନ ଭାବେ ନିର୍ମିତ ଏହି କେନ୍ଦ୍ରକୁ ଦୁଇ ମାସ ତଳେ ସ୍ଥାନାନ୍ତର କରାଯାଇଛି। ପୁରୁଣା ଘର ଭାଙ୍ଗିବା ଅବସ୍ଥାରେ ଥିବା ଯୋଗୁ ନୂତନ ଘରର ଲାଟ୍ରିନ କବାଟ ଚୋରି ହୋଇଯାଇଛି। ସେହିପରି ବାହାର ପଟେ କେବଳ ଚୂନ ଲଗାଯାଇଥିବା ବେଳେ ଭିତରେ କକ୍ଷ କାନ୍ଥରେ ଚୂନ ଲଗାଯାଇ ନାହିଁ। ନିମ୍ନମାନର କାର୍ଯ୍ୟ ଯୋଗୁ କାନ୍ଥରୁ ପ୍ଲାଷ୍ଟର ଖସୁଛି। ଏନେଇ କେନ୍ଦ୍ରର ମହିଳା କର୍ମୀ କହିଛନ୍ତି, ଦାୟିତ୍ୱରେ ଥିବା କନିଷ୍ଠ ଯନ୍ତ୍ରୀଙ୍କ ସମେତ ଅନ୍ୟ ଅଧିକାରୀଙ୍କୁ ସମସ୍ୟା କୁହାଯାଇଥିଲେ ମଧ୍ୟ କିଛି ପଦକ୍ଷେପ ନିଆଯାଇ ନାହିଁ। କେନ୍ଦ୍ରରେ ୩୦ ଜଣ ଶିଶୁ ଥିଲେ ମଧ୍ୟ ମାତ୍ର ୧୫ରୁ ୨୦ ଜଣ ଆସୁଛନ୍ତି।
