ବ୍ରହ୍ମପୁର ଅଫିସ,୧୪ା୫: ଗଞ୍ଜାମରେ ପ୍ରବାସୀ ଓଡ଼ିଆଙ୍କ ଯୋଗୁ ଦିନକୁ ଦିନ ସଂକ୍ରମିତଙ୍କ ସଂଖ୍ୟା ବଢ଼ିବାରେ ଲାଗିଛି। ରାଜ୍ୟର କୋଣ ଅନୁକୋଣରେ ଏବେ ପ୍ରବାସୀମାନେ ପ୍ରବଳ ସମସ୍ୟାରେ ଥିବା ବେଳେ ଏହାର ଏକ ଉଦାହରଣ ଦେଖିବାକୁ ମିଳିଛି ଗଞ୍ଜାମ ଜିଲା କୋଦଳା କ୍ୱାରାଣ୍ଟାଇନ୍ ସେଣ୍ଟରରେ ଥିବା ଗର୍ଭବତୀ ପ୍ରବାସୀ ମହିଳାଙ୍କ କ୍ଷେତ୍ରରେ। ମହିଳା ଜଣକ କୋଦଳା କ୍ୱାରାଣ୍ଟାଇନ୍ରେ ଥିବା ବେଳେ ବୁଧବାର ସାରେ ପ୍ରସବ ଯନ୍ତ୍ରଣା ଅନୁଭବ କରିଥିଲେ । ଆମ୍ବୁଲାନ୍ସ ପହଞ୍ଚିବାରେ ବିଳମ୍ବ ଘଟିଥିଲା। ରାତି ୧୧ ଟା ବେଳକୁ ଗର୍ଭବତୀ ମହିଳାଙ୍କୁ ମହାରାଜା କୃଷ୍ଣଚନ୍ଦ୍ର ଗଜପତି (ଏମ୍କେସିଜି)ମେଡିକାଲକୁ ରେଫର କରାଯାଇଥିଲା । ମେଡିକାଲ ଆସିବା ବାଟରେ ମହିଳା ଜଣକ ପ୍ରସବ କରିଥିଲେ। ରାତ୍ର ସାଢ଼େ ୧୨ ଟା ବେଳେ ପ୍ରସୂତି ଓ ତାଙ୍କ ନବଜାତ ଶିଶୁପୁତ୍ରଙ୍କୁ ମେଡିକାଲରେ ଭର୍ତ୍ତି କରାଯାଇଥିଲା ବୋଲି ଏମ୍କେସିଜି ମେଡିକାଲ ଅଧୀକ୍ଷକ ପ୍ରଫେସର ଡ. ସନ୍ତୋଷ କୁମାର ମିଶ୍ର ସୂଚନା ଦେଇଛନ୍ତି। ଏବେ ଉଭୟ ପ୍ରସୂତି ଓ ତାଙ୍କ ଶିଶୁ ମେଡିକାଲ କାଜୁଆଲଟିରେ ଥିବା ସ୍ବତନ୍ତ୍ର କ୍ୱାରାଣ୍ଟାଇନ୍ କକ୍ଷରେ ଚିକିତ୍ସିତ ହେଉଛନ୍ତି। ଉଭୟ ମା’ ଓ ଶିଶୁ ସୁସ୍ଥ ଥିବା ବେଳେ ସେଠାରେ କାର୍ଯ୍ୟରତ ଡାକ୍ତରମାନେ ସେମାନଙ୍କର ଉପଯୁକ୍ତ ଯତ୍ନ ନେଉଛନ୍ତି ବୋଲି ସେ କହିଛନ୍ତି। ସେହିପରି ଉକ୍ତ ପ୍ରସୂତିଙ୍କ ସ୍ବାବ୍ ସଂଗ୍ରହ କରାଯାଇଥିବା ବେଳେ ଗୁରୁବାର ତାହା ପରୀକ୍ଷା କରାଯିବ ବୋଲି ସେ କହିଛନ୍ତି । ଅନ୍ୟପଟେ ବୁଧବାର ଜିଲାର ସିତଳାପଲି କୋଭିଡ଼-୧୯ ହସ୍ପିଟାଲରେ ଥିବା ଜଣେ କରୋନା ପଜିଟିଭ୍ ଗର୍ଭବତୀ ଏମ୍କେସିଜି ମେଡିକାଲରେ ଯାଆଁଳା ଶିଶୁ ଜନ୍ମ ଦେଇଥିଲେ। କିଛି ସମୟ ପରେ ଶିଶୁପୁତ୍ରଟିର ମୃତ୍ୟୁ ଘଟିଥିଲା। ମା’ ଓ ଶିଶୁକନ୍ୟା ଏବେ ସୁସ୍ଥ ଥିବାରୁ ତାଙ୍କୁ ଗୁରୁବାର ସନ୍ଧ୍ୟାରେ ସିତଳାପଲି କୋଭିଡ୍ ହସ୍ପିଟାଲକୁ ସ୍ଥାନାନ୍ତର କରାଯିବ ବୋଲି ଅଧୀକ୍ଷକ ସୂଚନା ଦେଇଛନ୍ତି।
