ଓ୍ବାଶିଂଟନ/ରୋମ୍/ଲଣ୍ଡନ,୯।୪: ବିଶ୍ୱ ଏବେ କରୋନା କବଳିତ। ଚାରିଆଡ଼େ ତ୍ରାହି ତ୍ରାହି ଡାକ। ମୁଣ୍ଡ ପରେ ମୁଣ୍ଡ ଗଡ଼ିଚାଲିଥିଲେ ବି ଏଭଳି ଯମଯନ୍ତ୍ରଣାରୁ ମୁକୁଳିବା ଲାଗି ଅଣ୍ଟା ସଳଖ କରିପାରୁନି କୌଣସି ଦେଶ। ସବୁଠାରୁ ବିତ୍ତଶାଳୀ ଦେଶ ଆମେରିକା ଅଣନିଃଶ୍ୱାସୀ ହୋଇପଡ଼ିଲାଣି। ପ୍ରାଣଘାତୀ କରୋନା ଉପରେ ବିଜୟ ଲାଗି ପ୍ରୟାସ ଜାରି ରହିଥିବା ବେଳେ ମୃତ୍ୟୁକୁ ରୋକାଯାଇ ପାରୁନାହିଁ। ଏବେ ଆମେରିକାରେ ଆକ୍ରାନ୍ତଙ୍କ ସଂଖ୍ୟା ୪ ଲକ୍ଷ ୪ ହଜାର ଟପିଛି। ଏଠାରେ ୧୨,୯୩୩ ଜୀବନ ଗଲାଣି। ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କରୋନା ଭୂତାଣୁର ଏଭଳି ସ୍ଥିତିକୁ ଦେଖି ଅସହାୟ ହୋଇପଡ଼ିଛନ୍ତିି। ଗୋଟିଏ ଦିନରେ ୪ ହଜାର ମାମଲା ସାମ୍ନାକୁ ଆସିଥିବା ବେଳେ ୧୫୦ ମୁଣ୍ଡ ଏଠାରେ ଗଡ଼ିଛି। ଫଳରେ ଟ୍ରମ୍ପଙ୍କ ମୁଣ୍ଡ ବ୍ୟଥା ବଢ଼ିଯାଇଛି। ବିଶ୍ୱର ୨୦୯ ଦେଶ କରୋନା କବଳିତ ହୋଇଥିବା ବେଳେ ୮୩,୬୭୦ ଲୋକଙ୍କ ଏପର୍ଯ୍ୟନ୍ତ ପ୍ରାଣହାନି ଘଟିଲାଣି। ସଂକ୍ରମିତଙ୍କ ସଂଖ୍ୟା ୧୪.୫୬ ଲକ୍ଷକୁ ବୃଦ୍ଧିପାଇଛି। ପରିସ୍ଥିତି ଏକ୍ଦମ୍ ଅଣାୟତ୍ତ ହୋଇପଡ଼ିଛି।
ସ୍ପେନ୍ରେ ମଧ୍ୟ ଅନୁରୂପ ସ୍ଥିତି। ଏଠାରେ ମୃତ୍ୟୁସଂଖ୍ୟା ୧୪,୫୬୦ରେ ପହଞ୍ଚି ଥିବାବେଳେ ସଂକ୍ରମିତଙ୍କ ସଂଖ୍ୟା ବଢ଼ି ୧ ଲକ୍ଷ ୪୭ ହଜାର ହେଲାଣି। ଗୋଟିଏ ଦିନରେ ଏଠାରେ ୪,୭୫୬ ବ୍ୟକ୍ତି କରୋନା ସଂକ୍ରମିତ ହୋଇଥିବା ବେଳେ ୫୧୫ ଜୀବନ ଯାଇଛି। ଇଟାଲୀରେ ୧୭,୧୭୬ ଜୀବନ ଯାଇଥିବା ବେଳେ ସଂକ୍ରମିତଙ୍କ ସଂଖ୍ୟା ୧.୩୬ ଲକ୍ଷରେ ପହଞ୍ଚିଛି। ଜର୍ମାନୀରେ ମଧ୍ୟ ୧.୧୦ ଲକ୍ଷ ଭୂତାଣୁ ସଂକ୍ରମିତ। ଏଠାରେ ଗଲାଣି ୨,୦୯୬ ଜୀବନ। ଫ୍ରାନ୍ସରେ ଦ୍ରୁତ ଗତିରେ ବ୍ୟାପୁଛି ଏହି ମହାମାରୀ ଭୂତାଣୁ। ଏଠାରେ ସଂକ୍ରମିତଙ୍କ ସଂଖ୍ୟା ୧.୧୦ ଲକ୍ଷ ଛୁଇଁଥିବା ବେଳେ ମୃତକଙ୍କ ସଂଖ୍ୟା ବଢ଼ି ୧୦,୩୩୦ରେ ପହଞ୍ଚିଛି। ସଂକ୍ରମଣର କେନ୍ଦ୍ରସ୍ଥଳ ଚାଇନାରେ ସଂକ୍ରମିତଙ୍କ ସଂଖ୍ୟା ୮୧ ହଜାର ଉପରେ ରହିଥିବା ବେଳେ ମୃତ୍ୟୁସଂଖ୍ୟା ୩,୩୩୩ ରହିଛି। ଇରାନ ଓ ବ୍ରିଟେନରେ ଉତ୍କଟ ପରିସ୍ଥିତି ଦେଖାଦେଇଛି। ଇରାନରେ ୩,୯୯୩ ଜଣଙ୍କ ମୃତ୍ୟୁ ହୋଇଥିବା ବେଳେ ପ୍ରାୟ ୬୫ ହଜାର ଆକ୍ରାନ୍ତ ଅଛନ୍ତି। ବ୍ରିଟେନରେ ୫୫ ହଜାରରୁ ଊର୍ଦ୍ଧ୍ୱ ସଂକ୍ରମିତ ଥିବା ଜଣାପଡ଼ିଛି। ଏଠାରେ ଅଦ୍ୟାବଧି ୬,୧୬୦ ମୁଣ୍ଡ ଗଡ଼ିଲାଣି। ଏହାବାଦ୍ ବେଲଜିୟମରେ ୨,୨୪୦, ନେଦରଲାଣ୍ଡ୍ସରେ ୨,୨୪୮, ତୁର୍କୀରେ ୭୨୫, ସୁଇଜରଲାଣ୍ଡରେ ୮୫୮, ବ୍ରାଜିଲରେ ୬୯୯, ସ୍ବିଡେନରେ ୬୮୯, ଇଣ୍ଡୋନେସିଆରେ ୨୪୦, ଫିଲିପାଇନ୍ସରେ ୨୮୭ ଲୋକଙ୍କ ମୃତ୍ୟୁ ହୋଇସାରିଲାଣି। ହଜାର ହଜାର ସଂଖ୍ୟାରେ ଲୋକ ଆକ୍ରାନ୍ତ ହେଉଥିବା ବେଳେ ଆବଶ୍ୟକ ଚିକିତ୍ସା ସୁବିଧା ଯୋଗାଇ ଦିଆଯାଇ ପାରୁନାହିଁ। ଚିକିତ୍ସା ଉପକରଣ, ହସ୍ପିଟାଲର ଅଭାବ ସହ ଲକ୍ଡାଉନ୍ ଯୋଗୁ ଅତ୍ୟାବଶ୍ୟକ ସାମଗ୍ରୀର ଦରଦାମ ବୃଦ୍ଧି ପରିସ୍ଥିତିକୁ ଅଧିକ ବିଷମୟ କରିପକାଇଛି। କରୋନା ଭୂତାଣୁରୁ ରକ୍ଷାପାଇବା ଲାଗି କୌଣସି ଔଷଧ ବାହାରି ନ ଥିବାବେଳେ ଆକ୍ରାନ୍ତଙ୍କ ସଂଖ୍ୟା ଅହେତୁକ ଭାବେ ବୃଦ୍ଧିପାଇବା ସମସ୍ୟାକୁ ଦ୍ୱିଗୁଣିତ କରିପକାଇଛି। ବିଶ୍ୱସ୍ତରୀୟ ସଙ୍ଗଠନଗୁଡ଼ିକ ଅସହାୟ ହୋଇପଡ଼ିଛନ୍ତି। କେବଳ ସାମାଜିକ ଦୂରତ୍ୱ ରକ୍ଷା ଓ ଲକ୍ଡାଉନ୍କୁ ମାନି ଘର ରହିବା ଲାଗି ପରାମର୍ଶ ଦିଆଯାଉଛି।