ତିର୍ତ୍ତୋଲ,୨୮।୨ (ଡି.ଏନ୍.ଏ.): ଜଗତ୍ସିଂହପୁର ଜିଲା ତିର୍ତ୍ତୋଲ ବ୍ଲକ ଅଧୀନ ତେନ୍ତୁଳିପଦା ପଞ୍ଚାୟତରେ ପ୍ରଧାନମନ୍ତ୍ରୀ ଆବାସ ଯୋଜନାରେ ବ୍ୟାପକ ଅନିୟମିତତା ହୋଇଥିବା ଅଞ୍ଚଳବାସୀ ଜିଲାପାଳଙ୍କ ନିକଟରେ ଅଭିଯୋଗ କରିଛନ୍ତି। ପଞ୍ଚାୟତ ଅଞ୍ଚଳରେ ଅନେକ ଅଯୋଗ୍ୟଙ୍କୁ ଆବାସ ଯୋଜନାରେ ସାମିଲ କରାଯାଇଥିବା ବେଳେ ଯୋଗ୍ୟ ହିତାଧିକାରୀ ଏଥିରୁ ବାଦ୍ ପଡ଼ିଛନ୍ତି। ତେବେ ତୁରନ୍ତ ଏ ଦିଗରେ ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସ୍ଥାନୀୟ ଅଞ୍ଚଳବାସୀ ଦାବି କରିଛନ୍ତି। ଏ ନେଇ ଜିଲାପାଳଙ୍କୁ ପ୍ରଦାନ କରାଯାଇଥିବା ଦାବିପତ୍ରର ନକଲ ବିଭାଗୀୟ ସଚିବ, ଜଗତ୍ସିଂହପୁର ପିଡି, ତିର୍ତ୍ତୋଲ ବିଡିଓଙ୍କୁ ପ୍ରଦାନ କରାଯାଇଛି। ଦାବିପତ୍ରରେ ପଞ୍ଚାୟତର ଆଶିଷ ମହାନ୍ତି, ବିଜୟ ବିଶ୍ୱାଳ, ଶିଶିର ବିଶ୍ୱାଳ, ଶିଶିର ପୁହାଣ, ସୁବ୍ରତ ବିଶ୍ୱାଳ, ଭବାନୀ ଶଙ୍କର ସାହୁ, ରବୀନ୍ଦ୍ର ଚୌଧୁରୀଙ୍କ ସମେତ ୫୦ରୁ ଊର୍ଦ୍ଧ୍ୱ ଅଧିବାସୀଙ୍କ ଦସ୍ତଖତ ରହିଛି।
ଅଭିଯୋଗ ମୁତାବକ, ପଞ୍ଚାୟତ ଅଞ୍ଚଳର ବହୁ ସ୍ବଚ୍ଛଳ ପରିବାର, ସରକାରୀ ପେନ୍ସନଧାରୀ ଆବାସ ଯୋଜନା ହାତେଇଥିବା ବେଳେ କେତେକ ପରିବାର ଦୁଇ ଥର ଘର ପାଇଛନ୍ତି। ସେହିପରି ସ୍ବାମୀସ୍ତ୍ରୀ ଉଭୟଙ୍କ ନାଁରେ ପ୍ରଧାନମନ୍ତ୍ରୀ ଆବାସ ଯୋଜନାରେ ଘର ପ୍ରଦାନ କରାଯାଇଛି ବୋଲି ଅଭିଯୋଗପତ୍ରରେ ଦର୍ଶାଯାଇଛି। ଅନ୍ୟପଟେ ଏ ସମ୍ପର୍କରେ ବାରମ୍ବାର ଅଭିଯୋଗ କରାଯିବା ପରେ ବି କିଛି ସୁଫଳ ମିଳୁନି। ତେଣୁ ଏହାର ତଦନ୍ତ କରାଯାଇ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବା ସହ ଯୋଗ୍ୟ ହିତାଧିକାରୀମାନଙ୍କୁ ଘର ଯୋଗାଇ ଦେବାକୁ ଅଭିଯୋଗ ପତ୍ରରେ ଉଲ୍ଲେଖ କରାଯାଇଛି। ଏ ସମ୍ପର୍କରେ ବିଡିଓ ରଞ୍ଜନ କୁମାର ପରିଡ଼ାଙ୍କୁ ପଚାରିବାରେ ଅଭିଯୋଗ ସମ୍ପୂର୍ଣ୍ଣ ଭିତ୍ତିହୀନ। ଉଦ୍ଦେଶ୍ୟମୂଳକ ଭାବେ କେତେଜଣ ବ୍ୟକ୍ତି ଏଭଳି ଅଭିଯୋଗ କରୁଛନ୍ତି। ଉଚ୍ଚ ପଦସ୍ଥ ଅଧିକାରୀମାନେ ଯାହା ପଦକ୍ଷେପ ନେବେ ତାକୁ ସ୍ବାଗତ କରାଯିବ ବୋଲି କହିଛନ୍ତି।
