କାବୁଲ,୪ା୩(ଏଏଫ୍ପି): ଆଫଗାନିସ୍ତାନର ସେନା ଘାଟି ଉପରେ ତାଲିବାନ ପକ୍ଷରୁ ଏକାଧିକ ଆକ୍ରମଣ କରାଯାଇଛି। ଫଳରେ ଆମେରିକା-ଆଫଗାନିସ୍ତାନ ଶାନ୍ତି ଆଲୋଚନାର ସଫଳତାକୁ ନେଇ ପ୍ରଶ୍ନବାଚୀ ସୃଷ୍ଟି କରିଛି। ସୋମବାର ରାତିରେ ଆଫଗାନିସ୍ତାନର ୧୩ଟି ସ୍ଥାନରେ ଥିବା ସେନା ଘାଟି ଉପରେ ତାଲିବାନ ପକ୍ଷରୁ ଆକ୍ରମଣ ହୋଇଛି। କାନ୍ଦାହାର ପ୍ରଦେଶରେ ହୋଇଥିବା ଆକ୍ରମଣରେ ୨ ଜଣ ସୈନ୍ୟ ନିହତ ହୋଇଛନ୍ତି। ସେହିପରି କାବୁଲ ନିକଟବର୍ତ୍ତୀ ଲୋଗାର ପ୍ରଦେଶରେ ହୋଇଥିବା ଆକ୍ରମଣରେ ୫ ସୁରକ୍ଷା କର୍ମୀ ପ୍ରାଣ ହରାଇଛନ୍ତି।
କାତାର ରାଜଧାନୀ ଦୋହାରେ ଆମେରିକା ଓ ତାଲିବାନ ମଧ୍ୟରେ ଗତ ଶନିବାର ହୋଇଥିବା ଶାନ୍ତି ଚୁକ୍ତିନାମା ଅନୁଯାୟୀ ଉଗ୍ରପନ୍ଥୀ ଓ ଆଫଗାନ ସରକାରଙ୍କ ମଧ୍ୟରେ ମାର୍ଚ୍ଚ ୧୦ରୁ ବୁଝାମଣା ଆରମ୍ଭ ହୋଇଥାନ୍ତା। ତାହା ପୂର୍ବରୁ ତାଲିବାନ ପକ୍ଷରୁ ସେନା ଘାଟି ଉପରେ ଆକ୍ରମଣ ଫଳରେ ଆଲୋଚନାର ସଫଳତାକୁ ନେଇ ସନ୍ଦେହ ସୃଷ୍ଟି ହୋଇଛି। ସେହିପରି ଆଲୋଚନା ପୂର୍ବରୁ ବନ୍ଦୀ ହସ୍ତାନ୍ତରକୁ ନେଇ ମଧ୍ୟ ପ୍ରଶ୍ନବାଚୀ ସୃଷ୍ଟି ହୋଇଛି। ରାଜିନାମା ଅନୁଯାୟୀ ତାଲିବାନମାନେ ୧୦୦୦ ବନ୍ଦୀଙ୍କୁ ମୁକ୍ତ କରିବେ ବୋଲି ପ୍ରତିଶ୍ରୁତି ଦେଇଥିଲେ। ଏହା ବଦଳରେ ଆଫଗାନ ସରକାର ପାଖାପାଖି ୫୦୦୦ ଆତଙ୍କବାଦୀଙ୍କୁ ମୁକ୍ତ କରିଥାନ୍ତେ। ଆଲୋଚନା ପୂର୍ବରୁ ଏହାକୁ ପ୍ରାକ୍ସର୍ତ୍ତ ରଖାଯାଇଥିଲା। ତେବେ ରାଷ୍ଟ୍ରପତି ଅଶ୍ରଫ ଗନି ବୁଝାମଣା ଆରମ୍ଭ ପୂର୍ବରୁ ବନ୍ଦୀ ହସ୍ତାନ୍ତର ଲାଗି ମନା କରିଦେଇଛନ୍ତି।
