ଭୁବନେଶ୍ୱର,୧୬।୩(ବ୍ୟୁରୋ): ଜାତୀୟ ଓ ଅନ୍ତର୍ଜାତୀୟସ୍ତରର ବିଭିନ୍ନ ବିଉଟି ପାଜେଣ୍ଟରେ ଓଡ଼ିଶାର ପ୍ରତିଯୋଗୀମାନେ ବାଜି ମାରିଛନ୍ତି। ମିସ୍ରୁ ମିସେସ୍ ପର୍ଯ୍ୟନ୍ତ, ସବୁକ୍ଷେତ୍ରରେ ଓଡ଼ିଆ ପ୍ରତିଭାଙ୍କ ଲମ୍ବା ତାଲିକା ରହିଛି। ଏବେ ଜଣେ ଓଡ଼ିଶା ଜନ୍ମିତ ଆଦିବାସୀ ଝିଅ ରେହା ରେଶମ ବରୀ ଫ୍ୟାଶନ କ୍ଷେତ୍ରରେ ପାଲଟିଛନ୍ତି ପରିଚିତ ଚେହେରା। ‘ହୋ’ ଜନଜାତି ସମ୍ପ୍ରଦାୟର ରେହା ଏକ ବିଶ୍ୱସ୍ତରୀୟ ଫ୍ୟାଶନ ଶୋ’ରେ ଅଂଶଗ୍ରହଣ କରିବାର ସୁଯୋଗ ପାଇ ସମଗ୍ର ଦେଶର ଦୃଷ୍ଟି ଆକର୍ଷଣକରିଛନ୍ତି।
ରେହା ୨୦୧୬ରେ ‘ଓ୍ବାର୍ଲଡ୍ ସୁପର ମଡେଲ୍ ଇଣ୍ଡିଆ’ ପ୍ରତିଯୋଗିତାରେ ରନର୍ସଅପ୍ ହୋଇ କୃତିତ୍ୱ ଅର୍ଜନ କରିଥିଲେ। ଓଡ଼ିଶାରୁ ପ୍ରତିନିଧିତ୍ୱ କରି ସେ ଏଥିରେ ‘ଫେସ୍ ଅଫ୍ ଦି ପାଜେଣ୍ଟ’ ଟାଇଟଲ୍ ଜିତିଥିଲେ। କେବଳ ଏତିକି ନୁହେଁ, ଏମ୍ ଟିଭିରେ ପ୍ରସାରିତ ଲୋକପ୍ରିୟ ରିୟାଲିଟି ଶୋ’ ‘ଇଣ୍ଡିଆସ୍ ନେକ୍ଷ୍ଟ ଟପ୍ ମଡେଲ’ରେ ଅଂଶଗ୍ରହଣ କରି ସେ ଦେଶର ଜଣେ ଖ୍ୟାତିସମ୍ପନ୍ନ ମଡେଲ୍ଭାବେ ନିଜକୁ ପ୍ରତିଷ୍ଠିତ କରିଥିଲେ। ସେହିପରି ୨୦୧୭ରେ ରେହା ମିସ୍ ମହାରାଷ୍ଟ୍ର କୁଇନ୍ କ୍ରାଉନ୍ ଜିତିବା ସହ ୨୦୧୬ରେ ଚେନ୍ନାଇର ମେଗା ମଡେଲ୍ ହଣ୍ଟ୍ ପ୍ରତିଯୋଗିତାର ବିଜେତା ହୋଇଥିଲେ।
୨୦୧୬ରେ ଓ୍ବାର୍ଲଡ୍ ସୁପର ମଡେଲ୍ ପାଜେଣ୍ଟର ସଫଳତା ପରେ ମଡେଲିଂ ଏବଂ ଫ୍ୟାଶନ ଜଗତରେ ସେ ଆଉ ପଛକୁ ଫେରି ନ ଥିଲେ। ଗୋଟିଏ ପରେ ଗୋଟିଏ ଟାଇଟଲ୍ ଓ କ୍ରାଉନ୍ ସହ ସେ ଜାତୀୟ ଏବଂ ଅନ୍ତର୍ଜାତୀୟସ୍ତରୀୟ ବହୁ ଫ୍ୟାଶନ ଶୋ’ ଯୋଗଦେଇ ଓଡ଼ିଶାକୁ ଗୌରବାନ୍ବିତ କରିଛନ୍ତି। ଲାକ୍ମୀ ଫ୍ୟାଶନ ଓ୍ବିକ୍, ଟେକ୍ ଫ୍ୟାଶନ ଟୁର୍, ଇଣ୍ଡିଆ ବିଚ୍ ଫ୍ୟାଶନ ଓ୍ବିକ୍, ବ୍ଲେଣ୍ଡର୍ସ ପ୍ରାଇଡ୍ ଫ୍ୟାଶନ ଟୁର୍ ଭଳି ଏକାଧିକ ଶୋ’ରେ ତାଙ୍କୁ ଦେଖିବାକୁ ମିଳିଛି। ଏଥିସହିତ ଦେଶର ବହୁ ଖ୍ୟାତନାମା ଡିଜାଇନରଙ୍କ ପାଇଁ ସେ କାମ କରିଛନ୍ତି। ଅନୀତା ଡଙ୍ଗ୍ରୀ, ମନୀଷ ଅରୋରା, ରକି ଷ୍ଟାର୍, ବିକ୍ରମ ଫଡ୍ନିସ୍, ନିଧି ମୁନିମ୍, ଅର୍ଚ୍ଚନା କୋଚର୍, ଲଳିତ ଡାଲ୍ମିଆ, ନିଖିଲ ଥାମ୍ପି, ଅନୁପମା ଦୟାଲଙ୍କ ଭଳି ବହୁ ଡିଜାଇନରଙ୍କ ଆଗଧାଡ଼ିର ମଡେଲ ରହିଛନ୍ତି ରେହା। ଭାରତୀୟ ଫ୍ୟାଶନ ଜଗତର ଏହି ପରିଚିତ ଚେହେରା ଗଲଙ୍ଗ ଗବାନ୍, ଅର୍ଚ୍ଚନା କୋଚ୍ଚର ଏବଂ ନିକିତା ମହେସଲ୍କରଙ୍କ ଭଳି ଡିଜାଇନରଙ୍କ ପାଇଁ କାଟାଲଗ୍ ଶୁଟ୍ ମଧ୍ୟ କରିଛନ୍ତି।
କଠିନ ପରିଶ୍ରମରେ ବିଶ୍ୱାସ ରଖୁଥିବା ରେହା ଅଭିନୟ ଓ ମଡେଲିଂ ନିଶାରେ ଅଧାରୁ ପାଠପଢା ଛାଡ଼ି ୧୭ବର୍ଷ ବୟସରେ ଫ୍ୟାଶନ ଶୋ’ରେ ଅଂଶଗ୍ରହଣ କରିଥିଲେ। ପରବର୍ତ୍ତୀ ସମୟରେ ଅନୁପମ ଖେର୍ଙ୍କ ‘ଦି ସ୍କୁଲ୍ ଅଫ୍ ଆକ୍ଟର୍ସ’ରୁ ଆକ୍ଟିଂରେ ଡିଗ୍ରୀ ହାସଲ କରିଥିବା ରେହା ଆଗକୁ ଯାଇ ଜଣେ ସୁପର ମଡେଲ୍ ସହ ଅଭିନେତ୍ରୀ ହେବାକୁ ଲକ୍ଷ୍ୟ ରଖିଛନ୍ତି। ଅନୁଗୋଳର କେରଜାଙ୍ଗ ଗ୍ରାମର ରେହା ଏବେ ମୁମ୍ବାଇରେ ରହୁଥିବା ବେଳେ ଗାଇବା ଓ ନୃତ୍ୟରେ ଆଗ୍ରହ ରଖିଛନ୍ତି। ସୁଯୋଗ ଥାଇ ମଧ୍ୟ ଅନେକେ ସଫଳତା ପାଉନାହାନ୍ତି। କିନ୍ତୁ ରେହା କଠିନ ପରିଶ୍ରମ ବଳରେ ଗ୍ଲାମର ଭଳି ଦୁନିଆରେ ସଫଳତାର ଶୀର୍ଷରେ ପହଞ୍ଚତ୍ଛନ୍ତି। ଆଗକୁ ସେ ଭିକ୍ଟୋରିଆ ସିକ୍ରେଟ୍ ଏଞ୍ଜେଲ୍ ହେବାକୁ ଲକ୍ଷ୍ୟ ରଖିଛନ୍ତି।
ଇପିକଲ୍ ଏମ୍ଡି ତଥା ପ୍ରଶାସନିକ ଅଧିକାରୀ ନିତିନ ଜାଓ୍ବଲେ ରେହାଙ୍କ ଏହି ସଫଳତାରେ ଅଭିନନ୍ଦନ ଜଣାଇବା ସହ ସୌନ୍ଦର୍ଯ୍ୟ କ୍ଷେତ୍ରରେ ଥିବା ପୁରାତନ ଚିନ୍ତାଧାରାକୁ ପଛରେ ପକାଇ ରେହା ଅନ୍ୟମାନଙ୍କ ପାଇଁ ଉଦାହରଣ ସୃଷ୍ଟି କରିଥିବା କହିଛନ୍ତି।
