ଅନୁଗୋଳ ଅଫିସ/ବଇଣ୍ଡା/ଛେଣ୍ଡିପଦା ୨୦।୪ (ଡି.ଏନ୍.ଏ/ସ୍ବ.ପ୍ର.)- ନିର୍ବାଚନୀ ପ୍ରଚାର ପାଇଁ ବିଜେଡି ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଶନିବାର ଅନୁଗୋଳ ଜିଲା ଗସ୍ତରେ ଆସୁଛନ୍ତି। ଜିଲାର ୪ଟି ନିର୍ବାଚନ ମଣ୍ଡଳୀରେ ସେ ମାରାଥନ ପ୍ରଚାର କରିବେ। ତାଳଚେରରୁ ପୂର୍ବାହ୍ନ ୧୦ଟା ୧୫ରେ ପ୍ରଚାର ଆରମ୍ଭ ହେବ। ପରେ ଛେଣ୍ଡିପଦା ମିନି ଷ୍ଟାଡିୟମ ନିକଟରେ ତହସିଲ ଅଫିସ ପଛପାଖ ପଡିଆରେ ହେଲିକପ୍ଟରରେ ଯୋଗେ ମୁଖ୍ୟମନ୍ତ୍ରୀ ପହଞ୍ଚି ଜନସାଧାରଣଙ୍କୁ ଉଦ୍ବୋଧନ ଦେବେ। ଆଠମଲ୍ଲିକ ନିର୍ବାଚନ ମଣ୍ଡଳୀ ମାଧପୁରରେ ମଧ୍ୟାହ୍ନ ୧୨ଟା ୧୫ରେ ମୁଖ୍ୟମନ୍ତ୍ରୀଙ୍କ ପ୍ରଚାର ଶେଷ ହେବାର କାର୍ଯ୍ୟକ୍ରମ ରହିଛି। ତେବେ ଏହି କାର୍ଯ୍ୟକ୍ରମରେ ଆଠମଲ୍ଲିକ ନିର୍ବାଚନ ମଣ୍ଡଳୀରେ ଦଳୀୟ ଟିକେଟ୍ରୁ ବଞ୍ଚତ୍ତ ହୋଇଥିବା ସଞ୍ଜୀବ ସାହୁଙ୍କ ଭୂମିକାକୁ ନେଇ ଦ୍ୱନ୍ଦ୍ୱ ବଢ଼ିବାରେ ଲାଗିଛି। ମୁଖ୍ୟମନ୍ତ୍ରୀଙ୍କ ସଭାକୁ ସଞ୍ଜୀବ ଆସିବେ କି ନାହିଁ ତାକୁ ନେଇ ସ୍ଥାନୀୟ ଅଞ୍ଚଳରେ ଆଲୋଚନା ଜୋର ଧରିଛି।
ଅନୁଗୋଳ ଜିଲାକୁ ନବୀନ ପଟ୍ଟନାୟକ ଦ୍ୱିତୀୟ ଥର ପାଇଁ ପ୍ରଚାରରେ ଆସୁଛନ୍ତି। ତାଳଚେରଠାରେ ଦଳୀୟ ବିଧାୟକ ପ୍ରାର୍ଥୀ ବ୍ରଜ ପ୍ରଧାନଙ୍କ ପାଇଁ ସେ ପ୍ରଚାର କରିବେ। ପରେ ରେଙ୍ଗାଳି ଠାରେ ସାଧାରଣ ସଭାରେ ଯୋଗଦେଇ ପାଲଲହଡ଼ା ବିଧାୟକ ପ୍ରାର୍ଥୀ ମୁକେଶ ପାଳଙ୍କ ପାଇଁ ଭୋଟ ମାଗିବେ। ଦୁଇ ଦିନ ତଳେ ବିଜେଡି ସଭାପତି ପାଲଲହଡ଼ା ନିର୍ବାଚନମଣ୍ଡଳୀର ଖମାର କଲେଜ ପଡ଼ିଆରେ ମୁକେଶଙ୍କ ଲାଗି ପ୍ରଚାର କରିଥିଲେ। ତେଣୁ ଦ୍ୱିତୀୟ ଥର ମୁକେଶଙ୍କ ପ୍ରଚାର ପାଇଁ ନବୀନ ଆସୁଥିବାରୁ ଏହାକୁ ନେଇ ସାଧାରଣରେ ନାନା ଆଲୋଚନା ଚାଲିଛି। ସେହିପରି ଛେଣ୍ଡିପଦାର ଦଳୀୟ ପ୍ରାର୍ଥୀ ସୁଶାନ୍ତ ବେହେରାଙ୍କ ପାଇଁ ପ୍ରଚାର ପରେ ଆଠମଲ୍ଲିକରେ ରମେଶ ସାଏଙ୍କ ପ୍ରଚାର ପାଇଁ ମୁଖ୍ୟମନ୍ତ୍ରୀ ମାଧପୁର ଗସ୍ତ କରିବେ। ଏଥିସହ ଢେଙ୍କାନାଳ ଏମ୍ପି ପ୍ରାର୍ଥୀ ମହେଶ ସାହୁ ଓ ସମ୍ବଲପୁର ଏମ୍ପି ପ୍ରାର୍ଥୀ ହୋଇଥିବା ନଳିନୀକାନ୍ତ ପ୍ରଧାନଙ୍କ ଲାଗି ମଧ୍ୟ ପ୍ରଚାର କରିବେ।
ଅନ୍ୟପକ୍ଷରେ ଚଳିତ ଥର ଟିକେଟରୁ ବଞ୍ଚିତ ହୋଇଥିବା ଆଠମଲ୍ଲିକ ବିଧାୟକ ସଞ୍ଜୀବ ସାହୁ ଏଯାଏ ନୀରବ ରହିଛନ୍ତି। ତାଙ୍କ ସମର୍ଥକଙ୍କ ମଧ୍ୟରେ ମଧ୍ୟ ଅସନ୍ତୋଷ କୁହୁଳୁଥିବା ଚର୍ଚ୍ଚା ହେଉଛି। ଏ ପରିସ୍ଥିତିରେ ସେମାନଙ୍କ ସମର୍ଥନ କାହା ପ୍ରତି ରହିଛି ତାହାକୁ ନେଇ ଚର୍ଚ୍ଚା ଜୋର ଧରିଛି। ରମେଶ ସାଏ ଓ ନଳିନୀକାନ୍ତ ପ୍ରଧାନଙ୍କ ପାଇଁ ଆଠମଲ୍ଲିକ ବ୍ଲକ ବିଜେଡି ସଭାପତି ମହେଶ୍ୱର ଦେହୁରୀ, କିଶୋରନଗର ବ୍ଲକ ଯୁବ ବିଜେଡି ସଭାପତି ପ୍ରତାପ ମାଝି, ସଞ୍ଜୀବଙ୍କ ବିରୋଧୀ ଗୋଷ୍ଠୀର ଟାଣୁଆ ନେତା ପ୍ରଚାର କରୁଥିବା ଜଣାଯାଇଛି। ଏପରି ସ୍ଥିତିରେ ସଞ୍ଜୀବ ଓ ତାଙ୍କ ଅନୁଗତମାନେ ନୀରବ ରହିବା ସହ କୌଣସି ସଭାସମିତି କିମ୍ବା ରାଜନୈତିକ ପ୍ରଚାରରେ ଅଂଶଗ୍ରହଣ କରୁ ନ ଥିବା ଦେଖିବାକୁ ମିଳୁଛି। ତେଣୁ ସେଠାରେ ପରିସ୍ଥିତି ସଜାଡିବା ପାଇଁ ବିଜେଡି କି ଆଭିମୁଖ୍ୟ ଗ୍ରହଣ କରୁଛି ତାକୁ ନେଇ ନାନା ଆଲୋଚନା ଚାଲିଛି। ଏ ସମ୍ପର୍କରେ ସଞ୍ଜୀବଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ଫୋନ ସୁଇଚ ଅଫ୍ ରହିଥିବାରୁ ମତାମତ ମିଳିପାରିନାହିଁ।
