ଭୁବନେଶ୍ୱର,୨୮।୫ (ବ୍ୟୁରୋ): ଦେଶରେ କରୋନା ସଂକ୍ରମଣ ବଢ଼ୁଥିବାବେଳେ ଚତୁର୍ଥ ପର୍ଯ୍ୟାୟ ଲକ୍ଡାଉନ୍ ବଳବତ୍ତର ରହିଛି। ଏଥିଯୋଗୁ ସାମାଜିକ ତଥା ଆର୍ଥିକ ସ୍ଥିତି ବିଗିଡି ଯାଉଥିବାରୁ କଟକଣାରେ କିଛିଟା କୋହଳ କରାଯାଇଛି। ହେଲେ ଓଡ଼ିଶାର ଲୋକେ ବିଶେଷକରି କଟକ ଓ ଭୁବନେଶ୍ୱରର ଅଧିକାଂଶ ବାସିନ୍ଦା ଖୁଲମ୍ଖୁଲା ନିୟମ ଉଲ୍ଲଂଘନ କରୁଛନ୍ତି। ଏହାକୁ ନେଇ ପୋଲିସ କମିଶନର ସୁଧାଂଶୁ ଷଡ଼ଙ୍ଗୀ ଉଦ୍ବେଗ ପ୍ରକାଶ କରିବା ସହ ସ୍ଥିତିର ସମୀକ୍ଷା କରିଛନ୍ତି। ବୁଧବାର କମିଶନରେଟ ପୋଲିସ ମୁଖ୍ୟାଳୟରେ ଅନୁଷ୍ଠିତ ଖବରଦାତା ସମ୍ମିଳନୀରେ କମିଶନର ଷଡ଼ଙ୍ଗୀ ଚେତାବନୀ ଶୁଣାଇଛନ୍ତି। ସେ କହିଛନ୍ତି, ପ୍ରତିଦିନ ୭୦୦ରୁ ଊର୍ଦ୍ଧ୍ୱ ନିୟମ ଉଲଂଘନକାରୀଙ୍କଠାରୁ ଜରିମାନା ଆଦାୟ କରାଯାଉଛି। ତଥାପି ଲୋକେ ସଚେତନ ହେଉ ନ ଥିବାରୁ ଆଗାମୀ ଦିନରେ ଆହୁରି କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଅନେକ ଲୋକ ପୋଲିସକୁ ଦେଖି ମାସ୍କ ପିନ୍ଧୁଛନ୍ତି। ବଜାରରେ ଏକାଠି ହୋଇ ଚା ପିଇବା ସହ ସାମାଜିକ ଦୂରତା ରଖୁନାହାନ୍ତି। ଆଉକିଛି ଲୋକ ମାସ୍କକୁ ହାତ ଓ ବେକରେ ଝୁଲାଇ ନାକ ପାଟି ଖୋଲା ରଖି ବୁଲୁଛନ୍ତି। ସର୍ବସାଧାରଣ ସ୍ଥାନରେ ପାନ ଛେପ ପକାଉଛନ୍ତି। ଏହା ସଂକ୍ରମଣ ବିପଦକୁ ନିମନ୍ତ୍ରଣ କରୁଛି। ଯଦି ଲୋକଙ୍କ ମନରେ ଏଭଳି ଢ଼ିଲା ମନୋଭାବ ରହିବ ଓ ସେମାନେ ନିୟମ ଉଲ୍ଲଂଘନ କରିବେ ତେବେ ପରିବାର ଓ ସମାଜ ପାଇଁ ବିପଦ ମାଡ଼ି ଆସିବ। ଅମାନିଆମାନେ ଜାଣିବା ଦରକାର ଯେ, ପୋଲିସ ସବୁ ସ୍ଥାନରେ ଜଗିବା ଓ ସଚେତନ କରିବା ସମ୍ଭବପର ନୁହେଁ। ତେଣୁ ଦୈତ୍ୟନଗରୀବାସୀ ସରକାରଙ୍କ ସମସ୍ତ ନିୟମ ଓ କଟକଣାକୁ ଠିକ ପାଳନ କରନ୍ତୁ ଓ ସୁରକ୍ଷିତ ରୁହନ୍ତୁ ବୋଲି ଷଡ଼ଙ୍ଗୀ ପରାମର୍ଶ ଦେଇଛନ୍ତି।
