ନୂଆଦିଲ୍ଲୀ,୨୭-୭: ଦେଶର ସୂଚନା ପ୍ରଯୁକ୍ତି(ଆଇଟି) କ୍ଷେତ୍ରରେ ଶୀର୍ଷ କମ୍ପାନୀଗୁଡ଼ିକର ସିଇଓ ତଥା କର୍ମଚାରୀଙ୍କ ମଧ୍ୟରେ ବେତନ ତାରତମ୍ୟ କ୍ରମାଗତ ବଢ଼ିଚାଲିଛି। ଆର୍ଥିକ ବର୍ଷ ୨୦୧୮-୧୯ରେ ଏହି ପ୍ରଭେଦ ବହୁ ଅଧିକ ଥିବା ଜଣାପଡିଛି। କର୍ମଚାରୀଙ୍କ ଦରମା ନାମମାତ୍ର ବଢ଼ିଥିବା ବେଳେ ସିଇଓମାନେ ବମ୍ପର ବେତନ ପାଇଛନ୍ତି। ଆଇଟି କମ୍ପାନୀ ଓ୍ବିପ୍ରୋ ସିଇଓ ଆବିଦାଲି ନିମୁଚଓ୍ବାଲାଙ୍କ ଦରମା କମ୍ପାନୀର ସାଧାରଣ କର୍ମଚାରୀଙ୍କ ହାରାହାରି ବେତନ ତୁଳନାରେ ୪୫୫ ଗୁଣା ବୃଦ୍ଧି ପାଇଛି। ଗତବର୍ଷ ଏହା ୩୩୭ ଗୁଣା ଅଧିକ ଥିଲା। ସେହିପରି ଟାଟା କନସଲଟାନ୍ସି ସର୍ଭିସେସ୍(ଟିସିଏସ୍) ସିଇଓ ରାଜେଶ ଗୋପୀନାଥନଙ୍କ ବେତନ କର୍ମଚାରୀଙ୍କ ଦରମା ଠାରୁ ୨୬୨ ଗୁଣ ଅଧିକ, ଯାହା କି ଗତବର୍ଷ ୨୧୧ ଗୁଣ ଥିଲା। ସେହିପରି ଇନ୍ଫୋସିସ୍ ସିଇଓ ସଲିଲ ପାରେଖ ୨୦୧୮-୧୯ରେ ୨୭୩ ଗୁଣ ଅଧିକ ବେତନ ନେଇଛନ୍ତି। ଏହି ଟ୍ରେଣ୍ଡ ବିଶ୍ୱର ଅନ୍ୟ କମ୍ପାନୀଙ୍କ ଅପେକ୍ଷା ସମ୍ପୂର୍ଣ୍ଣ ଭିନ୍ନ। ଆମେରିକା କମ୍ପେସେଶନ ରିସର୍ଚ୍ଚ ଫାର୍ମ ଇକ୍ୱିଲିୟର ପକ୍ଷରୁ କୁହାଯାଇଛି ଯେ, ରସେଲ ୩୦୦୦ କମ୍ପାନୀ(ମାର୍କେଟ କ୍ୟାପିଟାଲାଇଜେଶନ ଆଧାରିତ ଇକୁଇଟି ଇଣ୍ଡେକ୍ସ)ର ମେ’ର ତଥ୍ୟ ଅନୁଯାୟୀ ଟେକ୍ କମ୍ପାନୀଙ୍କ ସିଇଓ ଓ କର୍ମଚାରୀଙ୍କ ବେତନ ବୃଦ୍ଧି ଭିତରେ ପ୍ରାୟ ସମାନତା ରହିଛି।
