ଅସ୍ତରଙ୍ଗ,୬।୩(ଡି.ଏନ୍.ଏ.): ପୁରୀ ଜିଲା ଅସ୍ତରଙ୍ଗ ବେଳାଭୂମି ଗୁଣ୍ଡଳବା ନିକଟରୁ ପ୍ରାୟ ୪୮ ଫୁଟର ଏକ ମୃତ ତିମି ଉଦ୍ଧାର ହୋଇଛି। ଘଟଣାସ୍ଥଳରେ ବନବିଭାଗ ଟିମ୍, ପ୍ରାଣୀ ଓ ମତ୍ସ୍ୟ ବିଭାଗ ଟିମ୍ ପହଞ୍ଚି ମୃତ ତିମି ସମ୍ପର୍କରେ ଅନୁସନ୍ଧାନ ଜାରି ରଖିଛନ୍ତି। ବେଳାଭୂମି ଅଞ୍ଚଳରେ ମୃତ ତିମି ଦେଖିବାକୁ ଭିଡ ଜମିଛି। ବିରାଟକାୟ ଏହି ତିମିର ସମ୍ପୂର୍ଣ୍ଣ ଅଂଶ ପଚିଯାଇଥିବା ବେଳେ ଅସ୍ତରଙ୍ଗ ପ୍ରାଣୀ ସମ୍ପଦ ବିଭାଗ ଅଧିକାରୀ ସେଠାରେ ପହଞ୍ଚି ଶବ ବ୍ୟବଚ୍ଛେଦ କରିବାକୁ ମୃତ ତିମିର ସାମ୍ପୁଲ(ନମୁନା) ସଂଗ୍ରହ କରିଥିଲେ।
ସୂଚନାମୁତାବକ, ସକାଳେ ପୀରଜାହାନିଆ ନିକଟସ୍ଥ ଗୁଣ୍ଡଳବା ଗାଁର ସମୁଦ୍ରକୂଳରେ ମୃତ ତିମିଟି ଲାଗିଥିଲା। ସ୍ଥାନୀୟ ଲୋକେ ସମୁଦ୍ରକୂଳକୁ ଯାଇଥିବା ବେଳେ ଏହି ଦୃଶ୍ୟ ଦେଖି ବନବିଭାଗକୁ ସୂଚନା ଦେଇଥିଲେ। ଖବର ପାଇ ରେଞ୍ଜର ହ୍ୟୁମେନ ନାୟକ ଏକ ଟିମ୍ ନେଇ ଘଟଣାସ୍ଥଳରେ ପହଞ୍ଚି ମୃତ ତିମିକୁ ପାଣିରୁ ଉଦ୍ଧାର କରିଥିଲେ। ଏଥିସହ ମତ୍ସ୍ୟ ଓ ପ୍ରାଣୀ ସମ୍ପଦ ବିଭାଗ ଟିମ ପହଞ୍ଚି ମୃତ ତିମି ସମ୍ପର୍କରେ ଅନୁସନ୍ଧାନ ଚଳାଇଛି। ପ୍ରାଣୀ ବିଭାଗ ମୃତ ତିମିର ଅଂଶବିଶେଷର ନମୁନା ସଂଗ୍ରହକରି ବ୍ୟବଚ୍ଛେଦ ପାଇଁ ପଠାଇଛି। ଅନ୍ୟପକ୍ଷରେ ବନବିଭାଗ ତରଫରୁ ସମୁଦ୍ର ବାଲିରେ ମୃତ ତିମିକୁ ପୋତି ଦେବା ପାଇଁ ପ୍ରସ୍ତୁତି ଆରମ୍ଭ ହୋଇଛି। ସ୍ଥାନୀୟ ପରିବେଶବିତ୍ ଶୋଭାକର ବେହେରା କୁହନ୍ତି, ବହୁଦିନ ତଳୁ ଏହି ତିମି ମୃତ୍ୟୁବରଣ କରିଥିବାରୁ ତା’ର ସମ୍ପୂର୍ଣ୍ଣ ଶରୀର ପଚିଯାଇଛି, ଯାହାର ଓଜନ ପ୍ରାୟ ୧୫ ଟନ୍ ଓ ଲମ୍ବ ୪୦ ରୁ ୪୫ ଫୁଟ ହେବ ବୋଲି ସେ ସୂଚନା ଦେଇଛନ୍ତ।
