ମୁମ୍ବାଇ: କରୋନା ଭାଇରସ୍ ସଂକ୍ରମଣ ପାଇଁ ସାରା ଦେଶରେ ଲକ୍ଡାଉନ୍ ଘୋଷଣା କରାଯାଇଛି। ଏହି ସମୟରେ ବହୁଲୋକ କାମ ନ ଥିବାରୁ ଖାଇବାକୁ ପାଉନାହାନ୍ତି। ଏମାନଙ୍କୁ ସାହାଯ୍ୟ କରିବା ପାଇଁ ବଲିଉଡ୍ ତାରକାମାନେ ଯଥାସମ୍ଭବ ଚେଷ୍ଟା କରୁଛନ୍ତି। ବଲିଉଡ୍ ଅଭିନେତ୍ରୀ ରିଚା ଚଡ୍ଡା ତାଙ୍କ ଘର ନିକଟରେ ଥିବା ଏକ ଗୁରୁଦ୍ୱାରରେ ରହୁଥିବା ଅସହାୟଙ୍କୁ ଖାଦ୍ୟ ଦେବା ପାଇଁ ଯାଇଥିଲେ। କିନ୍ତୁ ସେମାନଙ୍କ ନିକଟରେ କିଛି ସମୟ ରହି ଜାଣି ପାରିଥିଲେ ଯେ, ସେମାନଙ୍କ ପାଖରେ ରାଶନ ସାମଗ୍ରୀ ମଧ୍ୟ ନାହିଁ। ତେଣୁ ସେ ତୁରନ୍ତ ରାଶନ ସାମଗ୍ରୀ ନେଇ ସେଠାରେ ପହଞ୍ଚି ଯାଇଥିଲେ। ସେ ଏହି ସମୟରେ ମାସ୍କ ପିନ୍ଧିଥିଲେ ଓ ସାମାଜିକ ଦୂରତା ମଧ୍ୟ ପାଳନ କରିଥିଲେ। ରିଚା ଏହାକୁ ସୋସିଆଲ ମିଡିଆରେ ଶେୟାର କରି ଉଲ୍ଲେଖ କରିଛନ୍ତି ଯେ, ବର୍ତ୍ତମାନ ମନୁଷ୍ୟ କଠିନ ପରିସ୍ଥିତିରେ ଗତି କରୁଛି। ଏହାପରେ ଭଲ ସମୟ ନିଶ୍ଚୟ ଆସିବ। ସେତେବେଳ ପର୍ଯ୍ୟନ୍ତ ଆମକୁ ଧୈର୍ଯ୍ୟ ଧରିବାକୁ ପଡ଼ିବ। ଏହି ସମୟରେ ଶତ୍ରୁତାକୁ ଭୁଲି ସମସ୍ତଙ୍କୁ ସହଯୋଗ କରିବାକୁ ପଡ଼ିବ।
