ବାସୁଦେବପୁର, ୨୩।୬ (ଡି.ଏନ.ଏ.) – ଭଦ୍ରକ ଜିଲା ବାସୁଦେବପୁର ସହର ପୌରପାଳିକାର ମାନ୍ୟତା ଲାଭ କରିଥିଲେ ମଧ୍ୟ ସହରବାସୀଙ୍କ ସର୍ବନିମ୍ନ ସମସ୍ୟା ସମାଧାନ ହୋଇପାରୁ ନାହିଁ। ଏ ଦିଗରେ ପୌରପାଳିକା ଧ୍ୟାନ ଦେଉ ନ ଥିବା ସହରବାସୀ ଅଭିଯୋଗ କରି ଅସନ୍ତୋଷ ପ୍ରକାଶ କରିଛନ୍ତି। ବାସୁଦେବପୁର ସହର ସମେତ ୨୩ ୱାର୍ଡରେ ଏବେ ଡ୍ରେନେଜ ସମସ୍ୟା ଲୋକଙ୍କ ଚିନ୍ତା ବଢ଼ାଇ ଦେଇଛି। ମୌସୁମୀ ବାୟୁ ସକ୍ରିୟ ହୋଇସାରିଥିଲା ବେଳେ ଅଦ୍ୟାବଧି ସହରାଞ୍ଚଳର କୌଣସି ଡ୍ରେନକୁ ସଫାସୁତୁରା କରାଯାଇପାରି ନାହିଁ। ଗତ ଦୁଇଦିନ ଧରି ଲଘୁଚାପଜନିତ ଲଗାଣ ବର୍ଷା ହୋଇଥିବା ବେଳେ ଏହାର ପ୍ରଭାବରେ ସହରର ମୁଖ୍ୟରାସ୍ତା ଟ୍ରାଫିକ ଛକଠାରେ ଅଳିଆ ଆବର୍ଜନା ପାଣି ମୁଖ୍ୟଛକରେ ଜମି ରହିଛି। ବଳକା ବର୍ଷା ଜଳ ଡ୍ରେନକୁ ନ ଯାଇ ରାସ୍ତା ଉପରେ ଜମି ରହୁଥିତ୍ବାରୁ ଲୋକେ ଯାତାୟାତ ପାଇଁ ହଇରାଣ ହେଉଛନ୍ତି।
ବାସୁଦେବପୁର ସହରରେ ଡ୍ରେନେଜ ବ୍ୟବସ୍ଥା ବିପର୍ଯ୍ୟସ୍ତ ହୋଇପଡ଼ିଛି। ସହର ମଧ୍ୟରେ ଏହି ଅଳିଆ ଆବର୍ଜନାପୂର୍ଣ୍ଣ ପାଣି ଜମି ରହି ସହରର ଟ୍ରାଫିକ ଛକରେ ପୁତି ଗନ୍ଧମୟ ପରିବେଶ ସୃଷ୍ଟି କରୁଛି। ସେହିପରି ସହରର ବିଭିନ୍ନ ସ୍ଥାନରେ ବଳକା ବର୍ଷାପାଣି ଜମି ରହୁଛି। ଉଲ୍ଲେଖନୀୟ ଯେ, ଟ୍ରାଫିକ ଛକଠାରୁ ପୂର୍ବକୁ ହାଟସାଗରବସ୍ତି ପର୍ଯ୍ୟନ୍ତ ଖୋଳାଯାଇଥିବା ମୁଖ୍ୟ ଡ୍ରେନ୍ର ଅବସ୍ଥା ଅତ୍ୟନ୍ତ ଶୋଚନୀୟ। ଡ୍ରେନ୍ଟି ପୋତି ହୋଇ ରହିବା ସହ ତଳ ମୁହଁ ଖୋଲାଯାଇ ନ ଥିବାରୁ ଏଥିରେ ଜଳ ନିଷ୍କାସନ ହୋଇପାରୁ ନାହିଁ। ଏହାଛଡ଼ା ଡ୍ରେନ୍ର ପ୍ଲେଟଗୁଡିକ ଭାଙ୍ଗି ନଷ୍ଟ ହୋଇଗଲାଣି। ସେହିପରି ବ୍ଲକ ରୋଡ ଦେଇଯାଇଥିବା ଡ୍ରେନ ମଧ୍ୟ ପୋତି ହୋଇପଡ଼ିଛି। ୩ ବର୍ଷ ଧରି ଏହି ଡ୍ରେନ ସଫା ହୋଇ ନ ଥିବା ଜଣାପଡ଼ିଛି। ଫଳରେ ଡ୍ରେନରୁ ଦୁର୍ଗନ୍ଧ ବାହାରୁଥିବା ସହିତ ଜଳ ନିଷ୍କାସିତ ହୋଇପାରୁନି। ମାଛହାଟ ଡ୍ରେନର ମଧ୍ୟ ଅନୁରୂପ ଅବସ୍ଥା। ସହର ମଧ୍ୟରେ ଥିବା ବିଭିନ୍ନ ଡ୍ରେନ ଓ ଗ୍ରାମାଞ୍ଚଳର ଡ୍ରେନର ମୁହଁ ପୋତି ପଡ଼ିଥିବାରୁ ବର୍ଷର ଜଳ ନିଷ୍କାସିତ ହୋଇ ନ ପାରି ଜମି ରହୁଛି। ତେବେ ବର୍ଷାଦିନ ପୂର୍ବରୁ ଡ୍ରେନ ସଫା କରିବା ପୌରପାଳିକାର ପ୍ରାଥମିକ ଦାୟିତ୍ୱ ଥିବାବେଳେ ଏଥିପ୍ରତି ଦୃଷ୍ଟି ଦିଆଯାଇ ନ ଥିବା ଅଭିଯୋଗ ହେଉଛି। ବର୍ଷାଦିନ ଆସିସାରିଥିବାରୁ ତୁରନ୍ତ ସହରର ବିଭିନ୍ନ ଡ୍ରେନକୁ ସଫା କରାଯିବାକୁ ବ୍ୟବସାୟୀ ମୃତ୍ୟୁଞ୍ଜୟ ଅଗସ୍ତୀ, ସୁଶାନ୍ତ ବେହେରା, ବରିଷ୍ଠ ସାମାଜିକ କର୍ମୀ କିଶୋର କୁମାର ମହାପାତ୍ର ପ୍ରମୁଖ ଦାବି କରିଛନ୍ତି। ଏ ସମ୍ପର୍କରେ ପୌରନିର୍ବାହୀ ଅଧିକାରୀ ତାପସ ରଞ୍ଜନ ଜେନାଙ୍କୁ ପଚାରିବାରୁ ଖୁବ୍ଶୀଘ୍ର ଡ୍ରେନ ସଫେଇ କାର୍ଯ୍ୟ କରାଯିବ ବୋଲି କହିଛନ୍ତି।
