ବେଙ୍ଗାଲୁରୁ, ୨୩।୪(ପି.ଟି.): ଟୋକିଓ ଅଲିମ୍ପିକ୍ସ ଗୋଟିଏ ବର୍ଷ ଘୁଞ୍ଚିବା ଭାରତୀୟ ମହିଳା ହକି ଦଳ ପାଇଁ ଅନୁକୂଳ ପରସ୍ଥିତି ସୃଷ୍ଟି କରିଛି। ପ୍ରସ୍ତୁତି ପାଇଁ ଆମକୁ ଆହୁରି ଗୋଟିଏ ବର୍ଷ ଅଧିକ ମିଳିଛି। ଏହା ଦ୍ୱାରା ଆମେ ଅଧିକ ଗୋଟିଏ ବର୍ଷର ଅଭିଜ୍ଞତା ହାସଲ କରିବୁ ବୋଲି ଓଡ଼ିଆ ମହିଳା ହକି ତାରକା ନମିତା ଟୋପ୍ପୋ କହିଛନ୍ତି। ଦଳର ପସ୍ତୁତି ଆହୁରି ଶାଣିତ ହୋଇପାରିବ ଓ ଆମେ ଅଲିମ୍ପିକ ପଦକ ହାସଲ କରିବୁ ବୋଲି ଏହି ଅଭିଜ୍ଞ ମିଡ୍ଫିଲ୍ଡର ମତ ରଖିଛନ୍ତି।
କୋଭିଡ-୧୯ ମହାମାରୀ ପାଇଁ ଅଲିମ୍ପିକ୍ସକୁ ଗୋଟିଏ ବର୍ଷ ଘୁଞ୍ଚାଇ ଦିଆଯାଇଛି। ତେବେ ଏହା ଆମେ ଅଲିମ୍ପିକ୍ ପଦକ ହାସଲ କରିବା ଲକ୍ଷ୍ୟକୁ ପ୍ରଭାବିତ କରିପାରିବ ନାହିଁ। ଅଲିମ୍ପିକ ପଦକ ଜିତିବା ଆମର ମୂଳ ଲକ୍ଷ୍ୟ। ଏବେ ଏହି ଲକ୍ଷ୍ୟରେ ପରିବର୍ତ୍ତନ ହେବ ନାହିଁ। ଏହା ଦ୍ୱାରା ଆମେ ପ୍ରସ୍ତୁତ୍ ହେବା ପାଇଁ ଅଧିକ ସମୟ ପାଇବୁ ଓ ଅଲିମ୍ପିକ୍ରେ ନିଶ୍ଚିତ ଭାବେ ଭଲ ପ୍ରଦର୍ଶନ କରିବୁ ବୋଲି ୧୬୫ଟି ଅନ୍ତର୍ଜାତୀୟ ମ୍ୟାଚ୍ ଖେଳିଥିବା ନମିତା କହିଛନ୍ତି।
ଆମ ଦଳରେ କୌଣସି ବୟସ୍କ ଖେଳାଳି ନାହାନ୍ତି। ଏହି ଦଳର ଖେଳାଳି ସାଥୀ ହୋଇ ଦୀର୍ଘ ବର୍ଷ ଧରି ଖେଳିଆସୁଛନ୍ତି। ତେଣୁ ଆଉ ଗୋଟିଏ ବର୍ଷର ଅଭିଜ୍ଞତା ଆମ ପାଇଁ ସୁଯୋଗ ସୃଷ୍ଟି କରିବ। ୨୦୧୮ ଏସିଆନ ଗେମ୍ସ ଖେଳିବା ଅସରରରେ ଆଣ୍ଠୁରେ ଦେଖାଦେଇଥିବା ଆଘାତ ସମସ୍ୟା ଯୋଗୁ ସେ ପାଖାପାଖି ୧୦ ମାସ ଦଳରୁ ଦୂରେଇ ରହିଥିଲେ। ଦଳରୁ ଦୂରେଇ ରହିବା ନିଶ୍ଚିତ ଭାବେ କଷ୍ଟକର। ତେବେ ଏହା ମାନସିକ ଭାବେ ଦୃଢ ହେବାରେ ସହାୟ ହୋଇଛି ୨୪ ବର୍ଷୀୟା ନମିତା କହିଛନ୍ତି। ଗତବର୍ଷ ସେପ୍ଟେମ୍ବରରେ ଅଲିମ୍ପିକ୍ସ କ୍ୱାଲିଫାୟର ପୂର୍ବରୁ ନମିତା ଦଳକୁ ପ୍ରତ୍ୟାବର୍ତ୍ତନ କରିଥିଲେ। ଦଳକୁ ଫେରିବା ନେଇ ବ୍ୟସ୍ତ ଥିଲି। କାରଣ ଏହା କେତେ ଦିନ ସମୟ ନେବ ତାହା ଜାଣି ନ ଥିଲି। ଦଳରୁ ଦୂରେଇ ରହିଥିବା ବେଳେ ବେଶ୍ ଚିନ୍ତିତ ଥିଲି। ଯାହା ହେଲା ଭଲ ହେଲା। ଇଞ୍ଜୁରୀରୁ ମୁକୁଳିବାରେ ଦଳର ସାଥୀ ଖେଳାଳି ଓ କୋଚ୍ମାନେ ବେଶ୍ ସହାଯ୍ୟ କରିଛନ୍ତି। ଏଥିପାଇଁ ସେ ଏମାନଙ୍କୁ ବହୁତ ପ୍ରଶଂସା କରିଛନ୍ତି। କ୍ୟାରିୟରରେ ଦ୍ୱିତୀୟଥର ପାଇଁ ନମିତା ଅଲିମ୍ପିକ୍ସ ଖେଳିବାର ଲକ୍ଷ୍ୟ ରହିଛନ୍ତି। ତେବେ ଭାରତୀୟ ଦଳରେ ସାମିଲ ହେବା ଦିନ ଠାରୁ ନମିତା ବହୁ ଉତ୍ଥାନ ପତ୍ତନ ଦେଖିଛନ୍ତି। ଇଞ୍ଜୁରି ଗୁରୁତର ଥିବାରୁ ଭଲ ହେବା ପାଇଁ ସମୟ ଲାଗିବ ବୋଲି ଆମ ସାଇଣ୍ଟିଫିକ୍ ଆଡଭାଇଜନର ଓ୍ବେନ୍ ଲୋମ୍ବାର୍ଡ କହିଥିଲେ। ଦଳକୁ ଫେରି ପୁଣି ଦେଶ ପାଇଁ ଖେଳିବା ବହୁତ ସନ୍ତୋଷ ଦେଇଛି। ଇଞ୍ଜୁରିରୁ ଫେରିବା ପରେ ପ୍ରଥମେ ଇଂଲଣ୍ଡ ଗସ୍ତ ପାଇଁ ଦଳରେ ସାମିଲ ହୋଇଥିଲି ଓ ଏହା ବହୁତ ଖୁସି ଦେଇଥିଲା। ଭାରତ କିପରି ଟୋକିଓ ଅଲିମ୍ପିକ୍ସ ପାଇଁ ଯୋଗ୍ୟତା ହାସଲ କରିବ ସେ ନେଇ ପ୍ରୟାସ କରିଥିଲି। ଇଂଲଣ୍ଡ ଗସ୍ତରେ ସାମିଲ ହୋଇ ଭଲ ପ୍ରଦର୍ଶନ କରିବା ପରେ ଏଫ୍ଆଇଏଚ୍ ଅଲିମ୍ପିକ୍ସ କ୍ୱାଲିଫାୟର ସାମିଲ ହେବା ଉଚିତ୍ ମୁଖ୍ୟ କୋଚ୍ ହୃଦୟଙ୍ଗମ କରିଥିଲେ। ଅଲିମ୍ପିକ୍ସ କ୍ୱାଲିଫାୟର୍ସ ୨୦୧୯ ନଭେମ୍ବରରେ ଆୟୋଜିତ ହୋଇଥିଲା।
