ନୂଆଦିଲ୍ଲୀ,୧୫।୫: ଲକ୍ଡାଉନ ଯୋଗୁ ଦେଶର ବିଭିନ୍ନ ସ୍ଥାନରେ ଲୋକମାନେ ଫସି ରହିଛନ୍ତି। ଏପରି କି କାମଧନ୍ଦା ପାଉ ନ ଥିବାରୁ ଅନେକ ପ୍ରବାସୀ ଶ୍ରମିକ ଅର୍ଥାଭାବ ମଧ୍ୟ ଦେଇ ଗତି କରୁଛନ୍ତି। ତେଣୁ ଅଧିକାଂଶ ନିଜ ଭିଟାମାଟିକୁ ଫେରି ଯିବାକୁ ଚେଷ୍ଟା କରୁଛନ୍ତି। ଇତିମଧ୍ୟରେ ପ୍ରବାସୀ ଶ୍ରମିକଙ୍କୁ ନିଜ ରାଜ୍ୟକୁ ଫେରିଯିବାକୁ ସରକାର ସ୍ବତନ୍ତ୍ର ଟ୍ରେନ୍ ସେବା ମଧ୍ୟ ଆରମ୍ଭ କରିଛନ୍ତି। ହେଲେ ଯେଉଁମାନଙ୍କ ନିକଟରେ ରେଳ ଭଡ଼ା ଦେବାକୁ ଟଙ୍କା ନାହିଁ ସେମାନଙ୍କ ପାଇଁ କେନ୍ଦ୍ର ଓ ରାଜ୍ୟ ସରକାର କ’ଣ ପଦକ୍ଷେପ ନେଇଛନ୍ତି ତାହା ସ୍ପଷ୍ଟ ହୋଇନାହିଁ। ଅନେକ ପ୍ରବାସୀ ଶ୍ରମିକଙ୍କ ନିକଟରେ ରେଳ ଭଡ଼ା ଦେବାକୁ ଅର୍ଥ ନ ଥିବାରୁ ସେମାନେ ନିଜ ରାଜ୍ୟକୁ ଫେରିପାରୁ ନାହାନ୍ତି। ଏହି କ୍ରମରେ ଏକ ଆବେଦନର ଶୁଣାଣି କରି କର୍ନାଟକ ହାଇକୋର୍ଟ ଗୁରୁତ୍ୱପୂର୍ଣ୍ଣ ରାୟ ପ୍ରକାଶ କରିଛନ୍ତି। ଯେଉଁ ପ୍ରବାସୀ ଶ୍ରମିକଙ୍କ ନିକଟରେ ଟ୍ରେନ୍ ଟିକେଟ ପାଇଁ ଅର୍ଥ ନାହିଁ ସେମାନଙ୍କୁ ରେଳ ଯାତ୍ରାରୁ ବଞ୍ଚତ୍ତ କରା ନ ଯାଉ ବୋଲି ମୁଖ୍ୟ ବିଚାରପତି ଅଭୟ ଓକା ଏବଂ ବିଚାରପତି ବି.ଭି. ନାଗରଥନାଙ୍କୁ ନେଇ ଗଠିତ ଖଣ୍ଡପୀଠ କହିଛନ୍ତି। ଏଭଳି ଏକ ଘଡ଼ିସନ୍ଧି ମୁହୂର୍ତ୍ତରେ ପ୍ରବାସୀ ଶ୍ରମିକଙ୍କ ସାମ୍ବିଧାନିକ ଅଧିକାରକୁ ଧ୍ୟାନରେ ରଖି ହାଇକୋର୍ଟ ଏହି ରାୟ ପ୍ରକାଶ କରିଛନ୍ତି। କାୈଣସି ପ୍ରବାସୀ ଯେପରି ନିଜ ରାଜ୍ୟକୁ ଫେରିବାରୁ ବଞ୍ଚତ୍ତ ନ ହୁଅନ୍ତୁ, ସେମାନଙ୍କ ପାଇଁ ଉଭୟ କେନ୍ଦ୍ର ଏବଂ ରାଜ୍ୟ ସରକାର ସହଯୋଗର ହାତ ବଢ଼ାଇବା ଆବଶ୍ୟକ ବୋଲି ଖଣ୍ଡପୀଠ କହିଛନ୍ତି।
ଦେଶର ଭିତ୍ତିଭୂମି ଏବଂ ଅର୍ଥନୈତିକ ବିକାଶରେ ଶ୍ରମିକଙ୍କ ଗୁରୁତ୍ୱପୂର୍ଣ୍ଣ ଯୋଗଦାନ ରହିଛି। ଉଭୟ ସରକାରୀ ଓ ଘରୋଇ ପ୍ରକଳ୍ପରେ ପ୍ରବାସୀ ଶ୍ରମିକମାନେ କାର୍ଯ୍ୟ କରୁଛନ୍ତି। ଦେଶର ବିକାଶରେ ସେମାନଙ୍କ ଯୋଗଦାନକୁ ଅଣଦେଖା କରାଯାଇ ନ ପାରେ। ଲକ୍ଡାଉନ ସମୟରେ ସେମାନେ ବହୁତ ଅସୁବିଧାର ସମ୍ମୁଖhନ ହେଉଛନ୍ତି। ତେଣୁ ଏଭଳି ସ୍ଥିତିରେ ସରକାର ସହଯୋଗର ହାତ ବଢ଼ାଇ ସେମାନଙ୍କୁ ନିଜ ରାଜ୍ୟକୁ ପଠାଇବା ପାଇଁ ବ୍ୟବସ୍ଥା କରିବା ଆବଶ୍ୟକ। କୌଣସି ବି ପ୍ରବାସୀ ଶ୍ରମିକ ଯେପରି ନିଜ ଭିଟାମାଟିକୁ ଫେରିବାରୁ ବଞ୍ଚତ୍ତ ନ ହେବେ ସେଥିପ୍ରତି ସରକାର ଯତ୍ନବାନ ହେବା ଆବଶ୍ୟକ। ପ୍ରବାସୀ ଶ୍ରମିକମାନେ ଏବେ ଟ୍ରେନ୍ ଭଡ଼ା ଦେଇ ଯାତାୟାତ କରିବା ଅବସ୍ଥାରେ ନାହାନ୍ତି। ତେଣୁ ଗତ ୨ତାରିଖରେ ରେଳ ମନ୍ତ୍ରଣାଳୟ ପକ୍ଷରୁ ଜାରି କରାଯାଇଥିବା ନିର୍ଦ୍ଦେଶରେ ରାଜ୍ୟ ସରକାର ନିଜ ବ୍ୟବସ୍ଥାରେ ଶ୍ରମିକ ଏକ୍ସପ୍ରେସ ଚଳାଇବା ସହ ଏହାର ଟିକେଟ ମୂଲ୍ୟ ବହନ କରିବାକୁ କୁହାଯାଇଥିଲା। ଏପରି କି ସରକାର ଏହାର କିଛିଟା ସମାଧାନର ବାଟ ବାହାର କରିବା ଆବଶ୍ୟକ। ଟ୍ରେଡ ୟୁନିୟନ୍, କର୍ମସଂସ୍ଥା ମାଲିକ ସଂଗଠନ ଏବଂ ଏନ୍ଜିଓକୁ ନେଇ ରାଜ୍ୟ ସରକାର ତୁରନ୍ତ ଏକ ବୈଠକ ଡକାଇ ଯେଉଁ ପ୍ରବାସୀ ଶ୍ରମିକମାନେ ରେଳ ଭଡ଼ା ଦେବାକୁ ସକ୍ଷମ ନାହାନ୍ତି, ସେମାନଙ୍କୁ ସହଯୋଗ କରିବାକୁ ଖଣ୍ଡପୀଠ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି।
