କଟକ ଅଫିସ,୨୧ା୬- ଅଲ୍ ଇଣ୍ଡିଆ ଫୁଟ୍ବଲ ଫେଡେରେଶେନ(ଏଆଇଏଫ୍ଏଫ) ଆନୁକୂଲ୍ୟରେ କଟକରେ ଚାଲିଥିବା ସବ୍ଜୁନିୟର ବାଳିକା ଜାତୀୟ ଫୁଟବଲ ଚାମ୍ପିୟନଶିପରେ ଝାଡ଼ଖଣ୍ଡ ଚାମ୍ପିୟନ ହୋଇଛି। ଗୁରୁବାର ଅନୁଷ୍ଠିତ ଫାଇନାଲ ମୁକାବିଲାରେ ଝାଡ଼ଖଣ୍ଡ ୪-୦ ଗୋଲରେ ଅରୁଣାଚଳପ୍ରଦେଶକୁ ହରାଇ ଦେଇଛି। ଏକତରଫା ଭାବେ ଝାଡ଼ଖଣ୍ଡ ଏହି ମ୍ୟାଚ୍ରେ ବିଜୟୀ ହୋଇଥିଲା। ପ୍ରଥମାର୍ଦ୍ଧର ୧୫ତମ ମିନିଟରେ ସୋନୀ ମୁଣ୍ଡା ଓ ୨୩ତମ ମିନିଟରେ ବାସନ୍ତୀ ଲାକ୍ରା ଗୋଟିଏ ଲେଖାଏ ଗୋଲ ସ୍କୋର କରିଥିଲେ। ସୋନୀ ଓ ବାସନ୍ତୀ ଦ୍ୱିତୀୟାର୍ଦ୍ଧରେ ମଧ୍ୟ ଗୋଟିଏ ଲେଖାଏ ଗୋଲ ଦେଇ ଦଳକୁ ସହଜ ବିଜୟ ପ୍ରଦାନ କରିଛନ୍ତି। ବାସନ୍ତୀ ୫୮ତମ ମିନିଟରେ ଓ ସୋନୀ ୮୫ତମ ମିନିଟରେ ବ୍ୟକ୍ତିଗତ ଦ୍ୱିତୀୟ ଗୋଲ ଦେଇ ଝାଡ଼ଖଣ୍ଡକୁ ୪-୦ ଗୋଲରେ ଏକତରଫା ଭାବେ ବିଜୟୀ କରାଇଥିଲେ। ପୂର୍ବତନ ଅର୍ନ୍ତଜାତୀୟ ଫୁଟବଲ ଖେଳାଳି ଆର୍.ପି, ସିଂ ଉଦ୍ଯାପନୀ ଉତ୍ସବରେ ମୁଖ୍ୟ ଅତିଥି ଭାବେ ଯୋଗ ଦେଇଥିବା ବେଳେ ଫୁଟବଲ ଆସୋସିଏଶନ ଅଫ ଓଡ଼ିଶା(ଫାଓ) ଉପସଭାପତି ଭକ୍ତ ବଲ୍ଲଭ ଦାସ, ଏଆଇଏଫ୍ଏଫ୍ର ସହକାରୀ ମ୍ୟାନେଜର ସ୍ବପ୍ନା ସମ୍ମାନିତ ଅତିଥି ଭାବେ ଉପସ୍ଥିତ ରହିଥିଲେ। ଫାଓ ସମ୍ପାଦକ ସଞ୍ଜୟ ବେହେରା ଟୁର୍ନାମେଣ୍ଟକୁ ସଫଳପୂର୍ଣ୍ଣ କରିଥିବାରୁ ସମସ୍ତଙ୍କୁ ଧନ୍ୟବାଦ ଜଣାଇଥିଲେ।
