ଭୁବନେଶ୍ୱର,୨୩।୫(ବ୍ୟୁରୋ): ବାତ୍ୟା ‘ଅମ୍ଫନ୍’ କ୍ଷୟକ୍ଷତି ନେଇ ରାଜ୍ୟ ସରକାର ପ୍ରାଥମିକ ରିପୋର୍ଟ ଦେଇଛନ୍ତି। ବାତ୍ୟା ‘ଅମ୍ଫନ୍’ରେ ରାଜ୍ୟର ୧୦ ଜିଲା ପ୍ରଭାବିତ ହୋଇଛି। ପ୍ରାଥମିକ ରିପୋର୍ଟ ଅନୁଯାୟୀ ୯୨ ବ୍ଲକର ୯୮୩୩ ଗାଁ, ୨୨ ପୌରାଞ୍ଚଳର ୨୭୨ ଓ୍ବାର୍ଡ ପ୍ରଭାବିତ ହୋଇଛି। ବାତ୍ୟାରେ ରାଜ୍ୟର ମୋଟ ୪୪ ଲକ୍ଷ ୪୪ ହଜାର ୮୯୬ ଲୋକ ପ୍ରଭାବିତ ହୋଇଛନ୍ତି। ଏଥିରେ ୫ଶହ ଘର ଭାଙ୍ଗିଛି, ୧୫ହଜାର ଘର ଆଶିଂକ କ୍ଷତିଗ୍ରସ୍ତ ହୋଇଛି। ବାତ୍ୟାରେ ୨୮ ବଡ଼ ପଶୁ, ୯ ଛୋଟ ପଶୁ, ୩୬୮୦ କୁକୁଡ଼ାଙ୍କ ମୃତ୍ୟୁ ଘଟିଛି। ତେବେ ବାତ୍ୟାରେ କୌଣସି ମଣିଷଙ୍କ ଜୀବନ ଯାଇଥିବା ସୂଚନା ମିଳିନାହିଁ। ୩୪ କିମି ୩୩ କେଭି, ୪୫୩ କିମି ୧୧ କେଭି ବିଦ୍ୟୁତ୍ ନଷ୍ଟ ହୋଇଛି। ୬୮୦ କିମି ଏଲ୍ଟି ଲାଇନ୍, ୨୪୩୯ ଟ୍ରାନ୍ସଫର୍ମର ନଷ୍ଟ ହୋଇଛି। ୧୪ଟି ମାଛଧରା ଡଙ୍ଗା ସମ୍ପୂର୍ଣ୍ଣ ଭାଙ୍ଗିଛି, ୪୧ଟି ଆଶିଂକ କ୍ଷତିଗ୍ରସ୍ତ ହୋଇଛି। ୪ହଜାର ବିଭିନ୍ନ ଗଛ ଓ ୨ହଜାର ଝାଉଁ ଗଛ ନଷ୍ଟ ହୋଇଛି। ୧୫୧ କିମି ରାସ୍ତା କ୍ଷତିଗ୍ରସ୍ତ ହୋଇଛି। ୪୨ଟି ପୋଲ ଭାଙ୍ଗିଥିବା ରିପୋର୍ଟ ମିଳିଛି। ସେହିଭଳି ୬୪୬ ଅଙ୍ଗନଓ୍ବାଡି କେନ୍ଦ୍ର, ୧୫୫୨ ସ୍କୁଲ କୋଠା ଭାଙ୍ଗିଛି। ବାତ୍ୟାରେ ୨୯୮ ପଞ୍ଚାୟତ କୋଠା ମଧ୍ୟ ଭାଙ୍ଗିଛି। ବାତ୍ୟାରେ ପ୍ରାୟ ୧ ଲକ୍ଷ ହେକ୍ଟର ଚାଷ ଜମି କ୍ଷତି ହୋଇଥିବା ଆକଳନ କରାଯାଇଛି। ପ୍ରାଥମିକ ଆକଳନ ଅନୁସାରେ ୧ ଲକ୍ଷ ହେକ୍ଟର ଫସଲ କ୍ଷତି ହୋଇଛି। ୨୬ ତାରିଖ ସୁଦ୍ଧା ଚୁଡ଼ାନ୍ତ ରିପୋର୍ଟ ଆକଳନ ହୋଇଯିବା ନେଇ ସରକାରଙ୍କ ପକ୍ଷରୁ ଶନିବାର କୁହାଯାଇଛି।
