ନୂଆଦିଲ୍ଲୀ,୧୮।୫- ଆଇସିସି ବିଶ୍ୱକପ୍ ଭଳି ବୃହତ୍ ଟୁର୍ନାମେଣ୍ଟ ଲାଗି ଭାରତୀୟ ଖେଳାଳିମାନେ ସ୍ବତନ୍ତ୍ର ଭାବେ ପ୍ରସ୍ତୁତ ହେଉଛନ୍ତି। ସେମାନେ ଅଭ୍ୟାସ କରିବା ବଦଳରେ ବିଶ୍ରାମ ନେଉଛନ୍ତି। ମିଳିଥିବା ରିପୋର୍ଟ ଅନୁଯାୟୀ ଚଳିତ ମାସ ୨୧ ତାରିଖରେ ଏକାଠି ହେବା ପୂର୍ବରୁ ବିଶ୍ୱକପ୍ ଦଳରେ ସାମିଲ ଥିବା ଖେଳାଳିଙ୍କୁ ପରିବାର ସହ ଭଲ ସମୟ ବିତାଇବାକୁ କୁହାଯାଇଥିଲା। ଭାରତୀୟ ଦଳର ଉପ ଅଧିନାୟକ ରୋହିତ ଶର୍ମା ମାଳଦ୍ୱୀପରେ ପରିବାର ସହ ଛୁଟି କଟାଉଛନ୍ତି। ସେହିଭଳି ଲେଗ୍ ସ୍ପିନର ୟୁଜବେନ୍ଦ୍ର ଚହଲ ଗୋଆରେ ସମୟ ବିତାଉଛନ୍ତି। ପ୍ରାୟ ଖେଳାଳିମାନେ ୧୯ ତାରିଖରେ ଘରକୁ ଫେରିବେ। ଭାରତୀୟ ଦଳର ସପୋର୍ଟ ଷ୍ଟାଫ ଏହି ଯୋଜନାକୁ ଆରମ୍ଭ କରିଛନ୍ତି। ପୂର୍ବରୁ ଶୁଣିବାକୁ ମିଳୁଥିଲା ଯେ, ଇଂଲଣ୍ଡ ଗସ୍ତ ପୂର୍ବରୁ ଭାରତୀୟ ଦଳର ଖେଳାଳିଙ୍କ ଲାଗି ଛୋଟିଆ ଅଭ୍ୟାସ ଶିବିର ଆୟୋଜନ କରାଯିବା। କିନ୍ତୁ ଆଇପିଏଲ ଭଳି ବ୍ୟସ୍ତବହୁଳ ଟୁର୍ନାମେଣ୍ଟ ପରେ ଖେଳାଳିଙ୍କୁ ବିଶ୍ରାମ ନ ଦେବା ଉଚିତ ହେବ ନାହିଁ। ଏଣୁ ଖେଳାଳିଙ୍କୁ ଛୁଟି ବିତାଇବା ପାଇଁ କୁହାଯାଇଥିଲା ବୋଲି ସୂତ୍ରରୁ ଜଣାପଡ଼ିଛି। ବିଶ୍ୱକପ୍ ପୂର୍ବରୁ ଅନ୍ୟ ଦଳଗୁଡ଼ିକ ଅନ୍ତର୍ଜାତୀୟ ସିରିଜ୍ ଖେଳୁଛନ୍ତି କିମ୍ବା ଜାତୀୟ କ୍ୟାମ୍ପରେ ଅଭ୍ୟାସ କରୁଛନ୍ତି। ଇଂଲଣ୍ଡ ଓ ପାକିସ୍ତାନ ଦୁଇପାକ୍ଷିକ ସିରିଜ୍ ଖେଳୁଥିବାବେଳେ ବାଂଲାଦେଶ ଓ ଓ୍ବେଷ୍ଟଇଣ୍ଡିଜ ତ୍ରିରାଷ୍ଟ୍ରୀୟ ସିରିଜ୍ ଖେଳୁଥିଲେ। ଏପରି କି ନ୍ୟୁଜିଲାଣ୍ଡ ଓ ଅଷ୍ଟ୍ରେଲିଆ କିଛି ବନ୍ଧୁତ୍ୱପୂର୍ଣ୍ଣ କ୍ରିକେଟ ଖେଳି ୫୦ ଓଭର ବିଶିଷ୍ଟ ଫର୍ମାଟ ପାଇଁ ପ୍ରସ୍ତୁତ ହେଉଛନ୍ତି। କିନ୍ତୁ ଆଇପିଏଲ ପରେ ବିଶ୍ୱକପ୍ ହେବାକୁ ଯାଉଥିବାରୁ ଭାରତୀୟ ଦଳ ନିକଟରେ କୌଣସି ବିକଳ୍ପ ନାହିଁ।
