ଲାଠୋର, ୯ା୭ (ଡି.ଏନ୍.ଏ): ବଲାଙ୍ଗୀର ଜିଲା ଖପ୍ରାଖୋଲ ବ୍ଲକ ଅଧୀନ ଲାଠୋର ହାଟପଦାପଡ଼ା ସରକାରୀ ପ୍ରାଥମିକ ବିଦ୍ୟାଲୟ ଅବେବସ୍ତା ଘେରରେ ରହିଛେ। ଇଥିରଲାଗି ଛାତ୍ରୀଛାତ୍ର, ଶିକ୍ଷକ ନାନା ସମସିଆର ସାମନା କରୁଥିବାର ଅଭିଯୋଗ ହେଉଛେ।ସୂଚନା ଅନ୍ସାରେ ୧୯୭୯ ସାଲେ ଥାପିତ ଇ ସ୍କୁଲରେ ୧ମରୁ ୫ମ ଶ୍ରେଣୀ ତକ୍ ପାଠ୍ପଢ଼ାର ବେବସ୍ତା ଅଛେ। ଏହେଦେ ସ୍କୁଲରେ ୯୨ ଝନ୍ ଛାତ୍ରୀଛାତ୍ର ପାଠ୍ ପଢ଼ୁଥିଲାବେଲେ ୩ ଝନ୍ ଶିକ୍ଷୟିତ୍ରୀ ଶିକ୍ଷକ ରହିଛନ୍। ହେଲେ ସ୍କୁଲରେ ପାଠ୍ପଢ଼ାର ଲାଗି ବଖରେ ଘର ରହିଛେ। ଇ କୁଠାଥି ଅଫିସ୍ କାମ, ଏମ୍ଡିଏମ୍ ସାମାନ ରଖାଥୁଆ ସଂଗେ ପିଲାକର ପାଠ୍ପଢ଼ା ହେଉଛେ। ସ୍କୁଲରେ କୋଲ ଇଣ୍ଡିଆ ତରଫୁ ଗୁଟେ ଶୌଚାଲୟ ତିଆର ହେଇ ସିନଟେକ୍ସ ଟ୍ୟାଙ୍କ ବସାଯାଇଛେ। ହେଲେ ପାଏନ୍ର ବେବସ୍ତା ନାଇଁଥିବାର ଲାଗି ଶୌଚାଲୟଟା ପଡ଼ିରହି ଖତ ଖାଉଛେ। ଇଆଡ଼େ ଛାତ୍ରୀଛାତ୍ର ଶୌଚର ଲାଗି ବାହାରକେ ଯାଉଛନ୍। ସେନ୍ତା ସ୍କୁଲ ବାଡ଼ାକେ ଲାଗି ବିପଦ୍ ଅବସ୍ତାରେ ଖୁଲାରେ ଦୁଇଟା ଟ୍ରାନ୍ସଫର୍ମର ରହିଥିଲାବେଲେ ସ୍କୁଲକେ ଲାଗି ବିଦ୍ୟୁତ୍ ତାର ଯାଇଛେ। ବରଷା ଦିନେ ସ୍କୁଲର ନଲ୍ଚୁଅଁାରୁ ପାଏନ୍ ମାଏଲାବେଲେ କେତେବେଲେ କେନ୍ତା ଝଟକା ମାରୁଥିବାର ଛାତ୍ରୀଛାତ୍ର, ଶିକ୍ଷୟିତ୍ରୀ ଶିକ୍ଷକ କହିଛନ୍। ଏମ୍ଡିଏମ୍ ଲାଗି ୫ ବଛର ତଲେ ସ୍କୁଲରେ ଗୁଟେ ରଁଧାଘର ତିଆର ହେଇଥିଲା। ହେଲେ କାମ୍ଟା ଏତେ ହଲକା ହେଇଥିଲାଯେ ଘରଟା ପୂରା ହେବାର ଆଗ୍ରୁ ଛାତ୍ ଦବି ଯାଇଥିଲା। ସେ ବିପଦ୍ ଅବସ୍ତାରେ ଥିବାର ଘରେ ଏହେଦେ ଛାତ୍ରୀଛାତ୍ରକଁର ଏମ୍ଡିଏମ୍ ରଁଧାବଢ଼ା ହେଉଛେ। ସ୍କୁଲରେ ଲାଗି ରହିଥିବାର ଇ ସବୁ ସମସିଆକେ ନେଇ ଗଲା ୯.୧.୨୦୧୬ରେ ପ୍ରଧାନ ଶିକ୍ଷୟିତ୍ରୀକଁର ଅଧ୍ୟକ୍ଷତାରେ ସ୍କୁଲ ପରିଚାଲନା କମିଟି ଆର ଅଭିଭାବିକା, ଅଭିଭାବକମାନକୁ ନେଇ ଗୁଟେ ବଇଠକ୍ ବସିଥିଲା। ବଇଠକ୍ରେ ଗୁଟେ ରିଜୋଲୁଶନ କରି ଜିଲା ଶିକ୍ଷା ଅଧ୍କାରୀ, ଡିପିସି, ଖପ୍ରାଖୋଲ ବିଦ୍ୟୁତ ବିଭାଗ ସେକ୍ସନାଲ ଅଫିସର, ଥାନୀୟ ସରପଁଚ୍କୁଁ ସମସିଆର ସମାଧାନ ଲାଗି କମିଟି ଲିଖିତ ଜନେଇଥିଲା। ହେଲେ ଆଏଜ୍ତକ କେହେନ୍ସି ଗୁଟେ ବି ଅଧ୍କାରୀ ସମସିଆର ସମାଧାନ ଦିଗେ ପଦକ୍ଷେପ ନାଇଁ ନେଇ। ଶେଷେ ସ୍କୁଲ କତୁରପକ୍ଷ ଉପେ ଶୂଇନ୍ ହେଇ ସୋମବାର ଥାନୀୟ ସରପଁଚ୍, ପରିଚାଲନା କମିଟି ସଭାପତି, ସିଆରସିସି, ଅଭିଭାବିକା ଅଭିଭାବକମାନକୁ ନେଇ ଗୁଟେ ବଇଠକ୍ ଡାକିଥିଲେ। ବଇଠକ୍ରେ ସ୍କୁଲର ଭିନେ ଭିନେ ସମସିଆ ବାବ୍ଦେ ଆଲୋଚନା ହେଇଥିଲା। ସେନ୍ତା ସ୍କୁଲ ସମସିଆର ସମାଧାନ ଦିଗେ କେହି ପଦକ୍ଷେପ ନାଇଁ ନେଉଥିଲାବେଲେ ଯଦି ସ୍କୁଲ ସମିଆରେ କେହେନ୍ସି ଅଘଟନ ଘଟବା ସେଥିରଲାଗି କିଏ ଦାୟୀ ରହିବା ବଲି ବଇଠକ୍ରେ କେତେ ଅଭିଭାବକ ପ୍ରଶ୍ନ କରିଥିଲେ। ଜିଲା ପରଶାସନ ଇ ଦିଗେ ଦୁରୁଷ୍ଟି ଦେଇ ପଦକ୍ଷେପ ନେବାକେ ଅଭିଭାବକ ମହଲରେ ଦାବି ହେଉଛେ।
