ମୁମ୍ବାଇ,୯।୫: ଦେଶରେ କରୋନା ଭାଇରସକୁ ନେଇ ଚାଲିଥିବା ଲକ୍ଡାଉନ ସମୟରେ ମଦ ବିକ୍ରିକୁ ସରକାର ଅନୁମତି ଦେବା ପରେ ଏବେ ଏହାକୁ ନେଇ ବିଭିନ୍ନ ପ୍ରତିକ୍ରିୟା ଦେଖିବାକୁ ମିଳିଛି। ଶନିବାର ଶିବସନା ନେତା ସଞ୍ଜୟ ରାଉତ ଟୁଇଟ୍ କରି କହିଛନ୍ତି, ଅନ୍ତେଷ୍ଟିକ୍ରିୟାରେ ଯୋଗଦେବେ ମାତ୍ର ୨୦ ଜଣ ହେଲେ ମଦ ଦୋକାନ ସାମ୍ନାରେ ୧୦୦୦ ଲୋକ ରୁଣ୍ଡ ହୋଇପାରିବେ। ଏହାସହ ସେ ଟୁଇଟ୍ କରିଛନ୍ତି, ଅନ୍ତେଷ୍ଟିକ୍ରିୟାରେ ୨୦ ଜଣ ଯୋଗ ଦେବାର କାରଣ ସମସ୍ତଙ୍କୁ ଜଣା ମୃତ ଶରୀରରୁ ସ୍ପିରିଟ ବାହାରି ଯାଇଛି। ହେଲେ ମଦ ଦୋକାନ ସାମ୍ନାରେ ୧୦୦୦ ଲୋକ ରୁଣ୍ଡ ହେବାର କାରଣ ହେଉଛି ଦୋକାନ ଭିତରେ ହିଁ ସ୍ପିରିଟ ରହିଛି ବୋଲି ସମସ୍ତଙ୍କୁ ଜଣାଅଛି। ସଞ୍ଜୟଙ୍କ ଏହି ଟୁଇଟକୁ ନେଇ ଏବେ ଚର୍ଚ୍ଚା ଆରମ୍ଭ ହୋଇଛି। ସୂଚନାଯୋଗ୍ୟ, ମେ’ ୫ରେ ସ୍ବରାଷ୍ଟ୍ର ମନ୍ତ୍ରଣାଳୟର ଯୁଗ୍ମ ସଚିବ ପୂର୍ଣ୍ଣ ସଲିଳା ଶ୍ରୀବାସ୍ତବ କହିଥିଲେ କରୋନା ଭାଇରସକୁ ନେଇ ଚାଲିଥିବା ଲକ୍ଡାଉନ ସମୟ ମଧ୍ୟରେ ଅନ୍ତେଷ୍ଟିକ୍ରିୟାରେ ୨୦ରୁ ଉର୍ଦ୍ଧ୍ୱ ଓ ବିବାହ କାର୍ଯ୍ୟରେ ୫୦ରୁ ଊର୍ଦ୍ଧ୍ୱ ଲୋକ ଯୋଗଦେଇ ପାରିବେ ନାହିଁ।
