ଭୁବନେଶ୍ୱର, ୨୧।୨ (ସ୍ପୋର୍ଟ୍ସ ବ୍ୟୁରୋ)- ଓଡ଼ିଶା ମାଇନିଂ କର୍ପୋରେଶନ ପକ୍ଷରୁ ସ୍ଥାନୀୟ ଭଞ୍ଜକଳା ମଣ୍ଡପଠାରେ ଆୟୋଜିତ ୧୭ତମ ରାଜ୍ୟ ସିନିୟର ସୁନ୍ଦର ସ୍ବାସ୍ଥ୍ୟ ପ୍ରତିଯୋଗିତାର ‘ମିଷ୍ଟର ଓଡ଼ିଶା’ ସହ ପୁରୁଷ ଫିଜିକ୍ ଫିଟ୍ନେସ ଓ ମହିଳା ମଡେଲ ଫିଟ୍ନେସ ଉଦ୍ଯାପିତ ହୋଇଯାଇଛି। ଏଥିରେ ରାଜ୍ୟର ୨୫୦ ପ୍ରତିଯୋଗୀ ଅଂଶଗ୍ରହଣ କରିଥିବାବେଳେ ୯ଟି ଓଜନ ବର୍ଗରେ ପ୍ରତିଯୋଗିତା ଅନୁଷ୍ଠିତ ହୋଇଥିଲା। ପୁରୀର ଅନିଲ ଗୋଚ୍ଛିକାର ସମସ୍ତଙ୍କୁ ପଛରେ ପକାଇ ‘ମିଷ୍ଟର ଓଡ଼ିଶା-୨୦୨୦’ ଟାଇଟଲ୍ ଜିତିଛନ୍ତି। ସେହିଭଳି ବିଭିନ୍ନ ଓଜନ ବର୍ଗରେ ପୁରୀର କୁମାର ସିଦ୍ଧାର୍ଥ (୫୫ କିଗ୍ରା), ବଲାଙ୍ଗୀରର ସଂଗ୍ରାମ ମୁଣ୍ଡା (୬୦ କିଗ୍ରା), ପୁରୀର ବିଜୟ ସାହୁ (୬୫ କିଗ୍ରା), ଭୁବନେଶ୍ୱରର ଜଗନ୍ନାଥ ଖୁଣ୍ଟିଆ (୭୦ କିଗ୍ରା), ଅନିଲ ଗୋଚ୍ଛିକାର (୭୫ କିଗ୍ରା), ସୌମ୍ୟରଞ୍ଜନ ସେଠୀ (୮୦ କିଗ୍ରା), ଭୁବନେଶ୍ୱରର ରଶ୍ଚିରଞ୍ଜନ ସାହୁ (୮୫ କିଗ୍ରା), ଭୁବନେଶ୍ୱରର କୁମାର ଭରତ (୯୦ କିଗ୍ରା) ଓ କଟକର ସୁଜିତ କୁମାର ଯେନା (୯୦ କିଗ୍ରାରୁ ଊର୍ଦ୍ଧ୍ୱ) ପ୍ରଥମ ସ୍ଥାନ ହାସଲ କରିଥିଲେ। ସେହିଭଳି ପୁରୁଷ ଫିଜିକ୍ ଫିଟ୍ନେସରେ ରମଣ ରତନ ରାଉତ ଏବଂ ମହିଳା ମଡେଲ ଫିଟ୍ନେସରେ ସୁଶ୍ରୀ ଶିବାନୀ ଦାସ ପ୍ରଥମ ସ୍ଥାନରେ ରହିଥିଲେ।
ମିଷ୍ଟର ୟୁନିଭର୍ସ ତଥା ଜାତୀୟ ସୁନ୍ଦର ସ୍ବାସ୍ଥ୍ୟ ସଂଘର ସଭାପତି ପଦ୍ମଶ୍ରୀ ପ୍ରେମଚାନ୍ଦ ଡେଗ୍ରା, ପୋଲିସ ମହାନିର୍ଦ୍ଦେଶକ (ଇଣ୍ଟେଲିଜେନ୍ସି) ସତ୍ୟଜିତ୍ ମହାନ୍ତି, ବିଧାୟକ ଅନନ୍ତ ନାରାୟଣ ଜେନା ଅତିଥିଭାବେ ଯୋଗଦେଇ ପୁରସ୍କାର ପ୍ରଦାନ କରିଥିଲେ। ରାଜ୍ୟ ସୁନ୍ଦର ସ୍ବାସ୍ଥ୍ୟ ସଂଘର ସଭାନେତ୍ରୀ ସୁମିତ୍ରା ତ୍ରିପାଠୀ,ସାଧାରଣ ସମ୍ପାଦକ ପ୍ରସନ୍ନ ମହାସୁଆର, ଯୁଗ୍ମ ସମ୍ପାଦକ ପ୍ରଫୁଲ ଗୁରୁଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଏହା ଅନୁଷ୍ଠିତ ହୋଇଥିଲା।
