ଢେଙ୍କାନାଳ ଅଫିସ, ୧୭।୫ – କରୋନା ପ୍ରଭାବିତ ଓଡ଼ିଶାର ଗରିବ ହିତାଧିକାରୀଙ୍କୁ ୩ମାସ ଯାଏ ବିନା ମୂଲ୍ୟରେ ଚାଉଳ ଏବଂ ଡାଲି ଯୋଗାଇ ଦେବାକୁ ରାଜ୍ୟ ସରକାର ଘୋଷଣା କରିଛନ୍ତି। ହେଲେ ଢେଙ୍କାନାଳ ଜିଲାର ଅଧା ହିତାଧିକାରୀଙ୍କ ପାଖରେ ଏଯାଏ ଡାଲି ପହଞ୍ଚତ୍ନାହିଁ। ଯୋଗାଣ ବିଭାଗ ପକ୍ଷରୁ ଦିଆଯାଇଥିବା ଇଣ୍ଡେଣ୍ଟ ଅନୁଯାୟୀ ଡାଲି ଆସି ନ ଥିବାରୁ ଏପରି ସମସ୍ୟା ଉପୁଜିଥିବା ଜଣାପଡ଼ିଛି। ଅନ୍ୟପଟେ ଚାଉଳ ସାଙ୍ଗକୁ ଡାଲି ନ ଥିବାରୁ ହିତାଧିକାରୀମାନେ ସମସ୍ୟା ଭୋଗୁଥିବା ଅଭିଯୋଗ ହୋଇଛି।
କରୋନା କଟକଣା ଲାଗୁ ପରେ ରାଜ୍ୟ ସରକାର ଏପ୍ରିଲ୍ରୁ ୩ମାସ ଯାଏ ରାଜ୍ୟର ରାଶନ କାର୍ଡଧାରୀଙ୍କୁ ଚାଉଳ ଏବଂ ହରଡ଼ ଡାଲି ଦେବାକୁ ଘୋଷଣା କରିଥିଲେ। ରାଶନ କାର୍ଡ ପିଛା ୧ କେଜି ଡାଲି ପ୍ରଦାନ କରିବାକୁ ନିର୍ଦ୍ଦେଶ ଦିଆଯାଇଥିଲା। ମିଳିଥିବା ତଥ୍ୟ ଅନୁଯାୟୀ, ଜିଲାରେ ଜାତୀୟ ଖାଦ୍ୟ ସୁରକ୍ଷା ଆଇନରେ ୨ଲକ୍ଷ ୭୮ହଜାର ୮୦୪ ହିତାଧିକାରୀ ତାଲିକାଭୁକ୍ତ ହୋଇଥିବାବେଳେ ରାଜ୍ୟ ଖାଦ୍ୟ ସୁରକ୍ଷା ଆଇନ ଅନୁଯାୟୀ ୩,୩୨୦ ଜଣ ଅନ୍ତର୍ଭୁକ୍ତ ଅଛନ୍ତି। ତଦନୁଯାୟୀ ମୋଟ୍ ୮୪୮୮.୪୧ କୁଇଣ୍ଟାଲ ଡାଲି ଆବଶ୍ୟକ ଥିବା ଦର୍ଶାଇ ଯୋଗାଣ ପାଇଁ ବିଭାଗ ତରଫରୁ ଇଣ୍ଡେଣ୍ଟ ଦିଆଯାଇଥିଲା। ଏବେସୁଦ୍ଧା ମାତ୍ର ୩୨୨୦.୩୫ କୁଇଣ୍ଟାଲ ଡାଲି ଯୋଗାଣ ହୋଇଛି। ମେ ମାସ ଅଧା ହୋଇଯାଇଥିବାବେଳେ ଜିଲାର ବ୍ଲକ, ଏନ୍ଏସି, ପୌରାଞ୍ଚଳର ହିତାଧିକାରୀମାନେ ଡାଲି ପାଇବାରୁ ବଞ୍ଚତ୍ତ ହୋଇ ରହିଛନ୍ତି। କେତେଜଣ ଏ ନେଇ ଜିଲା ଯୋଗାଣ ବିଭାଗର ଦୃଷ୍ଟି ଆକର୍ଷଣ କରିଥିଲେ। ତେବେ ଜୋନାଲ ସେଣ୍ଟର ସମ୍ବଲପୁରରୁ ବିଳମ୍ବରେ ଡାଲି ଯୋଗାଣ ହେଉଥିବାରୁ ଏପରି ସମସ୍ୟା ଉପୁଜିଥିବା କହି ଅଧିକାରୀ ପ୍ରସଙ୍ଗ ଏଡ଼ାଇ ଯାଇଥିବା ସେମାନେ ଅଭିଯୋଗ କରିଛନ୍ତି। ରାଜ୍ୟ ସରକାର ସୁଷମ ବଣ୍ଟନ ବ୍ୟବସ୍ଥାର ସମୀକ୍ଷା କରୁ ନ ଥିବାରୁ ଏପରି ସମସ୍ୟା ହେଉଥିବା ବୁଦ୍ଧିଜୀବୀମାନେ କହିଛନ୍ତି।
ଏ ନେଇ ଜିଲା ଯୋଗାଣ ଅଧିକାରୀ ସଞ୍ଜୀବ ସାହୁ କୁହନ୍ତି, ଢେଙ୍କାନାଳ ଜିଲାକୁ ଡାଲି ଯୋଗାଣ ପାଇଁ ସମ୍ବଲପୁରରୁ ଜୋନାଲ ଜିଲା କରାଯାଇଛି । ସେଠାରୁ ଢେଙ୍କାନାଳ ସମେତ ଅନ୍ୟ ଜିଲାକୁ ମାଲ୍ ପରିବହନ ଗାଡି ବ୍ୟବସ୍ଥାକୁ ଦେଖି ଡାଲି ଯୋଗାଣ ହେଉଛି। ହେଲେ କିଛି ବ୍ଲକର ଅଧା ହିତାଧିକାରୀଙ୍କୁ ଡାଲି ମିଳିଥିବାବେଳେ ଆଉ କେତେକ ବ୍ଲକରେ ପହଞ୍ଚତ୍ ପାରିନାହିଁ। ଖୁବ୍ଶୀଘ୍ର ସମସ୍ୟା ସମାଧାନ ହେବ ବୋଲି ଯୋଗାଣ ଅଧିକାରୀ ସୂଚନା ଦେଇଛନ୍ତି।
