ସମ୍ବଲପୁର,୧୭ା୪(ବ୍ୟୁରୋ): ମହାମାରୀ କରୋନା ଯୋଗୁ ସରକାରଙ୍କ କଟକଣା ଓ ଲକ୍ ଡାଉନ୍ ଘୋଷଣା ଅନେକ ଲୋକଙ୍କ ହାତରୁ ରୋଜଗାର ଛଡାଇ ନେଇଛି । ଏଥିରେ ଅଧିକ ପ୍ରଭାବିତ ହୋଇଛନ୍ତି ବୁଣାକାର, ଶିଳ୍ପୀ, ଦିନମଜୁରିଆ, ବାଉଶଁ କାରିଗର ଭଳି କାରିଗର ପରିବାର । ସମ୍ବଲପୁର ଜିଲା ଯୁଯୁମୁରା ବ୍ଲକ୍ ମୁଣ୍ଡେର ଗ୍ରାମର ନୂଆଁପଡା ଓ ତୁରୀପଡାର ୯୦ ବାଉଁଶ କାରିଗର ପରିବାର ଜୀବନ ଦୟନୀୟ ଅବସ୍ଥାକୁ ଠେଲି ହୋଇଯାଇଛି । ଦୁଇ ବେଳା ଖାଇବା ଯୋଗାଡ କରିବା ସେମାନଙ୍କ ପାଇଁ କଷ୍ଟକର ହୋଇପଡିଛି । ପିଲା ଛୁଆକୁ ନେଇ ସେମାନେ ଭୋକ ଉପାସରେ ରହୁଛନ୍ତି । ତେବେ କଟକଣା ଯୋଗୁ ଉଭୟ କେନ୍ଦ୍ର ଓ ରାଜ୍ୟ ସରକାର ସହାୟତା ଦେବା ପାଇଁ ଘୋଷଣା କରିଛନ୍ତି । ହେଲେ ଘୋଷଣାକୁ ଏତେ ଦିନ ବିତିଯାଇଥିଲେ ମଧ୍ୟ ସେମାନଙ୍କ ପାଖରେ ସମସ୍ତ ସରକାରୀ ଯୋଜନା ପହଞ୍ଚି ପାରିନାହିଁ । ଗୁରୁବାର ସକାଳେ କେବଳ ପଞ୍ଚାୟତ ପକ୍ଷରୁ ଅଧିକାରୀମାନେ ଆସି ୧ ହଜାର ଟଙ୍କା ଦେଇଛନ୍ତି ବୋଲି ପଡାବାସୀ ଅଭିଯୋଗ କରିଛନ୍ତି । ତେଣୁ ସରକାରଙ୍କ ସହାୟତା ଉପହାସ ବୋଲି କହିଛନ୍ତି। ପଡାର ପ୍ରଦୀପ ବାଗ କହିଛନ୍ତି ଯେ, ଆମ ପାଇଁ ପ୍ରଥମେ ଚାଉଳ ଦରକାର । ସରକାର ୩ ମାସର ଚାଉଳ ଦେବା ପାଇଁ ଘୋଷଣା କରିଛନ୍ତି। ପଞ୍ଚାୟତରେ ମଧ୍ୟ ବଣ୍ଟା ଆରମ୍ଭ ହୋଇଛି। ହେଲେ ଆମ ପାଖରେ ନ ପହଞ୍ଚତ୍ବାରୁ ଭୋକ ଉପାସରେ ରହିବାକୁ ପଡୁଛି। ପଡାର ସମସ୍ତେ ବାଉଶଁ କାମ କରି ପରିବାର ପ୍ରତିପୋଷଣ କରନ୍ତି। ଏବେ ଆମ ବ୍ୟବସାୟ ଲକ୍ଡାଉନ୍ ହୋଇଯାଇଛି। କଟକଣା ଯୋଗୁ ବାଉଶଁ ତିଆରି ସାମଗ୍ରୀ ବିକ୍ରି ହୋଇପାରୁନାହିଁ। ସହରରେ ବଜାର ପୂରା ବନ୍ଦ। ଲକ୍ଡାଉନ ଯୋଗଁୁ ଗାଁଗହଳିକୁ ଯାଇ ହେଉନାହିଁ । ଏ ସମୟରେ କୌଣସି ଦୋକାନ ଓ କାହା ପାଖରୁ ଧାର କରଜ ମିଳୁନାହିଁ । ତେଣୁ ସରକାରଙ୍କ ଯୋଜନା ପହଞ୍ଚାଉଥିବା ଅଧିକାରୀ ଓ କର୍ମଚାରୀମାନେ ଏଥିପ୍ରତି ଦୃଷ୍ଟିଦେବାକୁ ସେ ଅନୁରୋଧ କରୁଛନ୍ତି । ସେହିପରି ପଡାର ବିଧବା ମହିଳା ବାସନ୍ତି ନାଏକଙ୍କ ଲକ୍ଡାଉନ ଯୋଗୁ ଜୀବନରେ ସଂଘର୍ଷ ବଢିଯାଇଛି। ମାନସିକ ଭାରସାମ୍ୟ ହରାଇଥିବା ପୁଅ ଓ ବୋହୂକୁ ନେଇ ପରିବାର । ସରକାରୀ ସହାୟତା ରାଶି ୧ ହଜାର ଟଙ୍କା ତାଙ୍କ ପାଖରେ ପହଞ୍ଚି ପାରିନାହିଁ । ଅନ୍ୟପଟେ ପିଡିଏସ ସାମଗ୍ରୀ ମଧ୍ୟ ସେ ପାଇ ନାହାନ୍ତି । ୧ ବର୍ଷତଳେ ସ୍ବାମୀ କୃଷ୍ଣଙ୍କ ମୃତ୍ୟୁ ଘଟିଥିଲା । ସେ ସମୟରେ ବାସନ୍ତୀ ଭତ୍ତା ପାଇଁ ଆବେଦନ କରିଛନ୍ତି। ହେଲେ ବିଧବା ଭତ୍ତା ତାଙ୍କୁ ଏ ପର୍ଯ୍ୟନ୍ତ ମିଳି ପାରିନାହିଁ। ଆବଶ୍ୟକ କାଗଜପତ୍ର ସହ ଆବେଦନ କରିଥିବା ବାସନ୍ତୀ କହିଛନ୍ତି । ପରିବାର ଏବେ ୪ ଜଣ ଅଛନ୍ତି । ହେଲେ ବୋହୂର ଆଧାର ଲିଙ୍କ ନ ହେବାରୁ ଆଜି ପର୍ଯ୍ୟନ୍ତ ଚାଉଳ ମିଳି ପାରିନାହିଁ ବୋଲି ସେ କହିଛନ୍ତି । ତେବେ ଏ ସମ୍ପର୍କରେ ଯୁଯୁମୁରା ବିଡିଓ ସରୋଜ ବିଶ୍ୱାଳଙ୍କୁ ପଚାରିବାରୁ ଉକ୍ତ ପଞ୍ଚାୟତର ଯୋଗାଣ ସହାୟକ ନାମରେ ଅଭିଯୋଗ ଆସିବାରୁ ପିଡିଏସ ସାମଗ୍ରୀ ବଣ୍ଟନ କରିବା ସ୍ଥଗିତ କରାଯାଇଥିଲା । ଦୁଇଦିନ ଭିତରେ ସମସ୍ତଙ୍କୁ ଚାଉଳ ଯୋଗାଇ ଦିଆଯିବ। ବାସନ୍ତୀଙ୍କ ଭତ୍ତା ଓ ସହାୟତା ରାଶି କେଉଁ କାରଣରୁ ମିଳୁନାହିିଁ ତାହାର ତଦନ୍ତ କରି ସମାଧାନ କରାଯିବ ବୋଲି କହିଛନ୍ତି।
