ରାଇକିଆ,୬ା୨(ଡ଼ି.ଏନ.ଏ)-ଗତ ଜାନୁୟାରୀ ୧୫ରୁ ନିଖୋଜ ଥିବା ରାଇକିଆ କନ୍ୟାଶ୍ରମ ସାହିର ଶୁଭେନ୍ଦୁ ମଲିକଙ୍କ ମୃତଦେହ ଗୁରୁବାର ଡଲାମାହା ପାହାଡ଼ରୁ ଠାବ କରାଯାଇଛି। ତାଙ୍କୁ ହତ୍ୟା କରାଯାଇଥିବା ଓ ଅଭିଯୁକ୍ତଙ୍କୁ ଗିରଫ ଦାବି ନେଇ ପରିବାର ଲୋକେ ମୃତଦେହ ବ୍ୟବଚ୍ଛେଦ ନିମନ୍ତେ ଛାଡ଼ି ନ ଥିଲେ। ପ୍ରାୟ ୮ ଘଣ୍ଟା ପରେ ଦାବି ପୂରଣ ନେଇ ପ୍ରତିଶ୍ରୁତି ମିଳିବାରୁ ବ୍ୟବଚ୍ଛେଦ ନିମନ୍ତେ ଛାଡ଼ିଥିଲେ।
ଶୁଭେନ୍ଦୁ ୨୨ ଦିନ ହେଲା ନିଖୋଜ ଥିଲେ ମଧ୍ୟ ତାଙ୍କର କୌଣସି ପତ୍ତା ମିଳି ପାରୁ ନ ଥିଲା । ଏପରିକି ପୋଲିସରେ ମଧ୍ୟ ହୋଇଥିଲା । ଶୁଭେନ୍ଦୁଙ୍କୁ ହତ୍ୟା କରାଯାଇଥିବା ସନ୍ଦେହ କରି କେତେକ ସୂଚନା ଦିଆଯାଇଥିଲେ ମଧ୍ୟ ପୋଲିସ ତାକୁ ଗ୍ରହଣ କରି ନ ଥିଲା ବୋଲି ମୃତକଙ୍କ ଭାଇ ଉତ୍ତମ ମଲିକ କହିଛନ୍ତି। ପୋଲିସ ତଦନ୍ତର ବିଳମ୍ବ ପ୍ରତିବାଦରେ ସୋମବାର ପରିବାର ଲୋକେ ଏବଂ ସାହି ବାସିନ୍ଦା ରାଇକିଆ-ଜି.ଉଦୟଗିରି-ବାଲିଗୁଡ଼ା ମୁଖ୍ୟରାସ୍ତା ଅବରୋଧ କରିଥିଲେ । ଏଥିରେ ଆଇନ ଶୃଙ୍ଖଳା ଭାଙ୍ଗ ହେଉଥିବା ଦର୍ଶାଇ ପୋଲିସ ୨୩ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଥିଲା। ବୁଧବାର ସେମାନେ ଜାମିନରେ ମୁକୁଳିଥିଲେ। ଗୁରୁବାର ଡଲାମାହା ପାହାଡ଼ ନିକଟରେ ଏକ ଗଳିତ ମୃତଦେହ ପଡ଼ିଥିବା କୌଣସି ସୂତ୍ରରୁ ପୋଲିସ ଖବର ପାଇ ଶୁଭେନ୍ଦୁଙ୍କ ପରବାରବର୍ଗଙ୍କୁ ଜଣାଇଥିଲା। ପରିବାର ଲୋକେ ପହଞ୍ଚି ଶୁଭେନ୍ଦୁଙ୍କ ମୃତଦେହ ଚିହ୍ନଟ କରିଥିଲେ। ସକାଳ ୯ଟାରୁ ସନ୍ଧ୍ୟା ସେମାନେ ମୃତଦେହ ପକାଇ ରଖି ବ୍ୟବଚ୍ଛେଦ ନିମନ୍ତେ ପୋଲିସକୁ ଦେଇ ନ ଥିଲେ। ରାଇକିଆ ବିଡ଼ିଓ ପ୍ରବୀଣ କୁମାର ବାଣୁଆ ଓ ତହସିଲଦାର ଶାରଦା କାନ୍ତି ଦଳେଇ ପହଞ୍ଚି ପରିବାର ଲୋକ ଏବଂ ସାହିବାସିନ୍ଦାଙ୍କକୁ ବୁଝାଶୁଝା କରିବା ସହ ବିଭିନ୍ନ ଦାବି ପୂରଣ ପାଇଁ ପ୍ରତିଶ୍ରୁତି ଦେବା ପରେ ସନ୍ଧ୍ୟା ପ୍ରାୟ ୫ଟାରେ ମୃତଦେହକୁ ଛାଡ଼ିଥିଲେ । ଏକ ଜମିଜମାକୁ କେନ୍ଦ୍ର କରି ଶୁଭେନ୍ଦୁଙ୍କୁ ହତ୍ୟା କରାଯାଇଥିବା ପରିବା ଲୋକେ ଅଭିଯୋଗ କରିଛନ୍ତି। ଏହାକୁ ନେଇ ତଦନ୍ତ ଆରମ୍ଭ ହୋଇଛି । ଏହି ଘଟଣାରେ ଜଣଙ୍କୁ ଅଟକ ରଖାଯାଇଛି । ପୂର୍ବରୁ ରୁଜୁ ହୋଇଥିବା ନିଖୋଜ ମାମଲା ନଂ.୧୧/୨୦ ହତ୍ୟା ମାମଲା ହୋଇଛି। ଅଭିଯୁକ୍ତଙ୍କୁ ତୁରନ୍ତ ଗିରଫ କରାଯିବ ବୋଲି ଏସଡ଼ିପିଓ ଜୟକୃଷ୍ଣ ବେହେରା କହିଛନ୍ତି।
