ନୂଆଦିଲ୍ଲୀ,୨୯।୫: କରୋନା ଭାଇରସ୍ ଲକ୍ଡାଉନ ଲାଗି ଭାରତର ଅର୍ଥ ବ୍ୟବସ୍ଥା ଗଭୀର ଭାବେ କ୍ଷତିଗ୍ରସ୍ତ ହୋଇଛି। କରୋନା ଯୋଗୁ ସାରା ବିଶ୍ୱରେ ପ୍ରାୟ ୪.୯ କୋଟି ଲୋକ ଉତ୍କଟ ଦାରିଦ୍ର୍ୟକୁ ଚାଲିଯିବେ ବୋଲି ଆଶଙ୍କା କରାଯାଇଛି। ସେହିଭଳି ଭାରତରେ ୧.୨ କୋଟି ଲୋକ ଏଭଳି ସମସ୍ୟା ସାମ୍ନା କରିବେ ବୋଲି ବିଶ୍ୱବ୍ୟାଙ୍କ ପକ୍ଷରୁ ଏକ ରିପୋର୍ଟରେ ପ୍ରକାଶ ପାଇଛି। ଭାରତରେ ୧୨.୨ କୋଟି ଲୋକଙ୍କ ଜୀବିକା ସଙ୍କଟ ସ୍ଥିତିକୁ ଚାଲିଯିବ ବୋଲି ସେଣ୍ଟର ଫର୍ ମନିଟରିଂ ଇଣ୍ଡିଆନ୍ ଇକୋନୋମି ନାମକ ଥିଙ୍କଟ୍ୟାଙ୍କ ପ୍ରକାଶ କରିଛି। ଦିନ ମଜୁରିଆ ଏବଂ କ୍ଷୁଦ୍ର ବାଣିଜ୍ୟଗୁଡିକ ସବୁଠାରୁ ବେଶି କ୍ଷତିଗ୍ରସ୍ତ ହେବେ। ହକର, ରାସ୍ତାକଡ଼ ଭେଣ୍ଡର, ନିର୍ମାଣ ଶିଳ୍ପଗୁଡିକରେ କାମ କରୁଥିବା ଶ୍ରମିକଙ୍କ ସମେତ ଅନ୍ୟ କ୍ଷେତ୍ରଗୁଡିକର ଶ୍ରମିକ ଏହାଦ୍ୱାରା କ୍ଷତିଗ୍ରସ୍ତ ହୋଇଛନ୍ତି।
କାରବାର କ୍ଷତିଗ୍ରସ୍ତ ସ୍ଥିତିରେ ରହିଥିବାରୁ ଲୋକଙ୍କ ନିଯୁକ୍ତି ଉପରେ ଗଭୀର ପ୍ରଭାବ ରହିବ। ଲକ୍ଡାଉନ ବଢ଼ିବା ଯୋଗୁ ସହରରେ ପ୍ରବାସୀ ଶ୍ରମିକଙ୍କ ଦୁର୍ଦ୍ଦଶା ବଢିଛି। ଏହା ଯୋଗୁ ଲୋକମାନେ ଅନେକ ସଂଖ୍ୟାରେ ରାସ୍ତାରେ ଚାଲିଥିବା ନଜରକୁ ଆସିଛି। ଲକ୍ଡାଉନ ଦ୍ୱାରା ୮୦% ଗ୍ରାମାଞ୍ଚଳ ପରିବାରର ଆୟ କ୍ଷତିଗ୍ରସ୍ତ ହୋଇଛି। ଚଳିତ ବର୍ଷ ଭାରତୀୟ ଅର୍ଥ ବ୍ୟବସ୍ଥା ସବୁଠାରୁ ନିମ୍ନ ସ୍ତରକୁ ଖସିଯିବ ବୋଲି ପୂର୍ବାନୁମାନ କରାଯାଇଛି। ମାନ୍ଦାବସ୍ଥା ସହ ଲଡୁଥିବା ଅର୍ଥ ବ୍ୟବସ୍ଥା କରୋନା ଚାପରେ ଆସିବା ଯୋଗୁ ବେହାଲ ହୋଇପଡିଛି। ଅର୍ଥ ବ୍ୟବସ୍ଥାରେ ବର୍ତ୍ତମାନ ଚାହିଦା ନ ରହିବା ଯୋଗୁ ଏହା ପରଫରମାନ୍ସ ୪ ଦଶନ୍ଧିର ସବୁଠାରୁ ଖରାପ ସ୍ତରରେ ରହିବା ନେଇ ଆକଳନ କରାଯାଇଛି।
କ୍ଷତିଗ୍ରସ୍ତ ଅର୍ଥ ବ୍ୟବସ୍ଥାକୁ ସୁଧାରିବା ଲାଗି ସରକାର ମୋଟ ଜିଡିପିର ୧୦% ବା ୨୦ ଲକ୍ଷ କୋଟି ଟଙ୍କାର ପ୍ୟାକେଜ ଘୋଷଣା କରିଛନ୍ତି। ଏହା ଦ୍ୱାରା ଅର୍ଥ ବ୍ୟବସ୍ଥା ଉପରେ ବିଶେଷ ପ୍ରଭାବ ପଡିବ ନାହିଁ ବୋଲି ବିଶ୍ୱ ସ୍ତରର ବିଭିନ୍ନ ଏଜେନ୍ସି ଆକଳନ କରିଛନ୍ତି। କାରଣ ପ୍ରକୃତ ପକ୍ଷେ ଏହା ୧% ହିଁ ହେବ। ସରକାର ଯେଉଁଭଳି ଭାବେ ବିତ୍ତୀୟ ସହାୟତା ପ୍ରଦାନ କରିବା କଥା ସେଭଳି କିଛି ପ୍ରଦାନ କଲେ ନାହିଁ। ଅର୍ଥ ବ୍ୟବସ୍ଥାକୁ ଯେଉଁ ଭଳି ଭାବେ ସହାୟତା ଲୋଡା ପଡିଥିଲା ତାହା ହେଲା ନାହିଁ। ସେହିଭଳି ଶିଳ୍ପଗୁଡିକର କାର୍ଯ୍ୟକଳାପକୁ ଟ୍ରାକ୍କୁ ଆଣିବା ବର୍ତ୍ତମାନ ତ୍ୱରିତ ଭିତ୍ତିରେ ଅସୁବିଧା ହେବ। କାରଣ ଶ୍ରମିକମାନେ ବର୍ତ୍ତମାନ ଘରକୁ ଫେରିଯାଇଛନ୍ତି।
