ତିହିଡ଼ି, ୧୩।୯ (ଡି.ଏନ.ଏ.) – ଦୀର୍ଘ ୪୦ ବର୍ଷ ପରେ ସେ ଘରକୁ ବାହୁଡ଼ିଛନ୍ତି। ଜନ୍ମମାଟିର ମମତା ତାଙ୍କୁ ଗଁାକୁ ଫେରାଇ ଆଣିଛି ବୋଲି ଗୁରୁବାର ଘରକୁ ଫେରିଥିବା ଭଦ୍ରକ ଜିଲା ତିହିଡ଼ି ଥାନା ଅନ୍ତର୍ଗତ ଗୋବିନ୍ଦପୁର ପଞ୍ଚାୟତ କୁଅଁାରଚତର ଗ୍ରାମର ଅପୂର୍ବ ରଞ୍ଜନ ନାୟକ(୬୦) କହିଛନ୍ତି। ଗୁରୁବାର ରାତି ୮ଟାରେ ଅପୂର୍ବ ଗଁା ମାଟିରେ ପାଦ ଦେବା ପରେ ଖୁସିରେ ବିଭୋର ହୋଇଥିଲେ। ଘରର ବଡ଼ପୁଅ ହୋଇଥିବାରୁ ଦୀର୍ଘବର୍ଷ ପରେ ତାଙ୍କୁ ପାଇ ପରିବାର ଲୋକଙ୍କର ଆନନ୍ଦର ସୀମା ରହି ନ ଥିଲା। ଗଁାର ତାଙ୍କ ସାଙ୍ଗ ଏବଂ ଅନ୍ୟ ଲୋକେ ମଧ୍ୟ ଅପୂର୍ବଙ୍କୁ ଦେଖି ବହୁତ ଖୁସି ହୋଇଯାଇଥିଲେ।
ଅପୂର୍ବଙ୍କ ପରିବାର ଲୋକଙ୍କ କହିବା ଅନୁଯାୟୀ, ୧୯୮୦ ମସିହାରେ ୨୦ ବର୍ଷର ହୋଇଥିବା ବେଳେ ଅପୂର୍ବ ଘରେ କାହାକୁ କିଛି ନ କହି କେଉଁଆଡ଼େ ଚାଲିଯାଇଥିଲେ। ପରେ ସେ କଟକରେ ଫଳ ବ୍ୟବସାୟ କରୁଥିବା ସେମାନେ ଜାଣିବାକୁ ପାଇଥିଲେ। ମାତ୍ର ସେ ଆଉ ଗଁାକୁ ଫେରି ନ ଥିଲେ। ପରିବାର ଲୋକେ ବହୁ ଖୋଜାଖୋଜି କରିବା ପରେ ମଧ୍ୟ ତାଙ୍କର ସନ୍ଧାନ ପାଇ ନ ଥିଲେ। ଏହାର ୭/୮ ବର୍ଷ ପରେ ଅପୂର୍ବ ଉତ୍ତରପ୍ରଦେଶ ଚାଲିଯାଇଥିବା ଶୁଣିବାକୁ ମିଳିଥିଲା। କିନ୍ତୁ ଠିକ୍ ସୂଚନା ନ ମିଳିବାରୁ ତାଙ୍କ ପାଖକୁ ଯାଇପାରି ନ ଥିଲେ। ଦୁଇଦିନ ତଳେ ଅପୂର୍ବ ରାଉରକେଲା ଆସିଥିଲେ। ତାଙ୍କର ପରିଚୟପତ୍ର ନ ଥିବାରୁ ସେ କୌଣସି ଲଜ୍ରେ ରହିପାରି ନ ଥିଲେ। ସେ ଏକ ଅଟୋରେ ଯାଉଥିବା ବେଳେ ଗାଡ଼ି ଚାଳକଙ୍କ ସହ ପରିଚିତ ହୋଇଥିଲା। ଅଟୋ ଚାଳକ କୁଅଁାରଚତର ଗ୍ରାମର ଜ୍ୱାଇଁ ହୋଇଥିବାରୁ ସେ ଅପୂର୍ବଙ୍କୁ ଜାଣି ତାଙ୍କ ପରିବାର ଲୋକଙ୍କୁ ଫୋନ କରି ଜଣାଇଥିଲେ। ବୁଧବାର ପରିବାର ଲୋକେ ରାଉରକେଲାରେ ପହଞ୍ଚି ଅପୂର୍ବଙ୍କୁ ଭେଟିଥିଲେ। ଘର ଲୋକଙ୍କୁ ଦେଖିବା ପରେ ଅପୂର୍ବ ଭାବବିହ୍ବଳ ହୋଇ କାନ୍ଦି ପକାଇଥିଲେ। ଗଁା ଲୋକଙ୍କ ସହ ଶେଷ ଜୀବନ କାଟିବାକୁ ଇଚ୍ଛା କରି ସେ ଗୁରୁବାର ଗଁାକୁ ଫେରିଛନ୍ତି। ତେବେ ଅପୂର୍ବ ଏଯାଏ ଅବିବାହିତ ଅଛନ୍ତି। ଉତ୍ତରପ୍ରଦେଶରେ ସେ ହୋଟେଲ ଓ ଷ୍ଟୁଡିଓ ଆଦି ବିଭିନ୍ନ ସ୍ଥାନରେ କାର୍ଯ୍ୟ କରୁଥିଲେ ବୋଲି କହିଛନ୍ତି। ଏପରିକି ବର୍ଷରେ ଥରେ ଦୁଇଥର ସେ ଓଡ଼ିଶା ଆସୁଥିଲେ ମଧ୍ୟ ଘରକୁ ଫେରି ପାରି ନ ଥିଲେ। ଘରକୁ କାହିଁକି ଆସି ନ ଥିଲେ ତା’ର କୌଣସି କାରଣ ସେ ଦର୍ଶାଇ ପାରି ନାହାନ୍ତି। ଏହାମଧ୍ୟରେ ତାଙ୍କ ବାପା ଗଙ୍ଗାଧରଙ୍କ ପରଲୋକ ହୋଇଯାଇଥିବା ଜାଣିବା ପରେ ସେ ଦୁଃଖ ପ୍ରକାଶ କରିଛନ୍ତି।
