ରଘୁନାଥପୁର,୧୪ା୧(ଡି.ଏନ୍.ଏ.):ରଘୁନାଥପୁର ବ୍ଲକ କେରକେରାସ୍ଥିତ ପ୍ରଭୁ ଗୋରେଖନାଥ ପୀଠ ରୋଷଘରେ ତାଲା ପଡିବା ଓ ପ୍ରସାଦ ବ୍ୟବସ୍ଥା ବନ୍ଦ କରାଯିବା ନେଇ ପୂଜକ ଓ ମ୍ୟାନେଜିଂ ଟ୍ରଷ୍ଟିଙ୍କ ମଧ୍ୟରେ ଲାଗିଥିବା ବିବାଦ ସୋମବାର ସମାଧାନ ହୋଇଛି। ଆସନ୍ତା ୧୫ ତାରିଖ ତଥା ମକର ସଂକ୍ରାନ୍ତି ଠାରୁ ପ୍ରସାଦ ପ୍ରସ୍ତୁତ ବ୍ୟବସ୍ଥା ଆରମ୍ଭ ହେବ ବୋଲି ଟ୍ରଷ୍ଟବୋର୍ଡ ସଭ୍ୟ ଜୀବନ ବଲ୍ଲଭ ମହାନ୍ତି କହିଛନ୍ତି। ସୂଚନା ଅନୁଯାୟୀ, ସୋମବାର ସନ୍ଧ୍ୟାରେ ଜଗତ୍ସିଂପୁରସ୍ଥିତ ସବକଲେକ୍ଟରଙ୍କ କାର୍ଯ୍ୟାଳୟରେ ଗତ ୨ତାରିଖରୁ ଗୋରେଖନାଥ ପୀଠରେ ବନ୍ଦ ଥିବା ପ୍ରସାଦ ବ୍ୟବସ୍ଥାକୁ ନେଇ ଏକ ବୈଠକ ବସିଥିଲା। ଏଥିରେ ପୂଜକ ରମେଶ ଚନ୍ଦ୍ର ପଣ୍ଡା, ଦିଲ୍ଲୀପ ପଣ୍ଡା, ଜ୍ଞାନରଞ୍ଜନ ପଣ୍ଡା, ସୁଦର୍ଶନ ଦାଶ, ବୀରବର ଦାଶ, ଛପଡ଼ା ସରପଞ୍ଚ ବିଜୟ ସ୍ବାଇଁ, ଟ୍ରଷ୍ଟ ବୋର୍ଡ ସଭ୍ୟ ପ୍ରଦୀପ୍ତ ମହାନ୍ତି, କ୍ଷୀରୋଦ ମହାନ୍ତି, ସୁଶାନ୍ତ ଦାଶ, ଆଇନଜୀବୀ ଜୀବନବଲ୍ଳଭ ମହାନ୍ତି ଓ ସୂର୍ଯ୍ୟ ନାରାୟଣ ପଣ୍ଡା, ମ୍ୟାନେଜିଂ ଟ୍ରଷ୍ଟି ମହେନ୍ଦ୍ର ପ୍ରସାଦ ମହାନ୍ତି, ରେଭିନ୍ୟୁ ଅଫିସର ପ୍ରମୋଦ ମହାପାତ୍ର ପ୍ରମୁଖ ଉପସ୍ଥିତ ଥିଲେ।
ପୂର୍ବରୁ ପ୍ରସ୍ତୁତି ନିମନ୍ତେ ଟ୍ରଷ୍ଟବୋର୍ଡ ପକ୍ଷରୁ ଧାର୍ଯ୍ୟ ହୋଇଥିବା ୩ଲକ୍ଷ ଟଙ୍କା ପରିବର୍ତ୍ତେ ୨ଲକ୍ଷ ୫୦ହଜାର ଟଙ୍କା ଦେୟ ଦେବାକୁ ସ୍ଥିର ହୋଇଥିଲା। ମାର୍ଚ୍ଚ ୩୧ ପର୍ଯ୍ୟନ୍ତ ୬୨ହଜାର ଟଙ୍କା ଟ୍ରଷ୍ଟବୋର୍ଡରେ ଜମା କରିବା ପାଇଁ ପୂଜକମାନଙ୍କୁ ନିର୍ଦ୍ଦେଶ ରହିଥିଲା। ମାନସିକ ରୋଷେଇ ବାବଦ ଜଣକ ପିଛା ୧ଟଙ୍କା ଜମା କରିବା ପାଇଁ ସ୍ଥିର ହୋଇଥିଲା। ପୂଜକଙ୍କ ପକ୍ଷରୁ ପ୍ରସ୍ତୁତ ପ୍ରସାଦର ମୂଲ୍ୟ ୬୦ଟଙ୍କା ରଖାଯିବା ପାଇଁ ସ୍ଥିର ହୋଇଛି। ପ୍ରଭୁଙ୍କ ମହିମାକୁ ଅକ୍ଷୁର୍ଣ୍ଣ ରଖିବା ପାଇଁ ପୂଜକମାନେ ନିଷ୍ପତ୍ତିକୁ ସ୍ବାଗତ କରିଥିବା ଜଞାନରଞ୍ଜନ ପଣ୍ଡା କହିଛନ୍ତି।
