ଡବଲିନ(ଆୟର୍ଲାଣ୍ଡ),୨୯।୫(ପିଟି)- ଶର୍ମିଲା ଦେବୀଙ୍କ ଗୋଲ ସତ୍ତ୍ୱେ ଭାରତୀୟ ମହିଳା ଜୁନିୟର ହକି ଦଳ ୧-୪ ଗୋଲର ପରାଜୟ ସହ ଆୟର୍ଲାଣ୍ଡ ଅଭିଯାନ ଆରମ୍ଭ କରିଛି। ହେଲେ ଭାରତୀୟ ଜୁନିୟର ମହିଳା ଦଳକୁ ପରାସ୍ତ କରିଛି ବିଶ୍ୱକପ୍ରେ ରୌପ୍ୟ ହାସଲ କରିଥିବା ଆୟର୍ଲାଣ୍ଡର ସିନିୟର ଦଳ। ମ୍ୟାଚ୍ର ପ୍ରଥମ କ୍ୱାର୍ଟର ସଂଘର୍ଷପୂର୍ଣ୍ଣ ହୋଇଥିଲା। ମ୍ୟାଚ୍ର ୭ମ ମିନିଟ୍ରେ ଘରୋଇ ଦଳ ଖାତା ଖୋଲିଥିଲା। ଦ୍ୱିତୀୟ କ୍ୱାର୍ଟରରେ ଆୟର୍ଲାଣ୍ଡ ଦଳକୁ ପେନାଲ୍ଟି କର୍ନର ମିଳିଥିଲା। କିନ୍ତୁ ବିଚୁ ଦେବୀ ଚମତ୍କାର ସେଭ୍ କରିଥିଲେ। ଫଳରେ ପ୍ରଥମାର୍ଦ୍ଧ ସୁଦ୍ଧା ଆୟୋଜକ ଦଳ ୧-୦ ଗୋଲରେ ଆଗୁଆ ରହିଥିଲା। ତୃତୀୟ କ୍ୱାର୍ଟରରେ ଶର୍ମିଲାଙ୍କ ଜରିଆରେ ଭାରତ ମ୍ୟାଚ୍କୁ ବରାବର ସ୍ଥିତିକୁ ଆଣିଥିଲା। ଏହା ପରେ ଆୟର୍ଲାଣ୍ଡ ଦଳ କ୍ରମାଗତ ବ୍ୟବଧାନରେ ୩ ଗୋଲ ସ୍କୋର କରି ମ୍ୟାଚ୍କୁ ଜିତି ନେଇଥିଲା। ଗୁରୁବାର ଭାରତୀୟ ମହିଳା ଜୁନିୟର ହକି ଦଳ ତା’ର ପରବର୍ତ୍ତୀ ମ୍ୟାଚ୍ରେ କାନାଡାର ଜୁନିୟର ଦଳକୁ ଭେଟିବ।
