ଖୋର୍ଦ୍ଧା ଅଫିସ, ୨୬ା୮:ଖୋର୍ଦ୍ଧା ଟାଉନ ଥାନା ଅନ୍ତର୍ଗତ ପୁବୁସାହିର ଯୁବକ ବାସୁଦେବ ପ୍ରଧାନଙ୍କ ନିଖୋଜ ଘଟଣା ନୂଆମୋଡ଼ ନେଇଛି। ବାସୁଦେବଙ୍କୁ ଅଭିଯୁକ୍ତ କବାଡ଼ିଆ ମାଲିକ ରବୀନ୍ଦ୍ର ମୁଦୁଲି ହତ୍ୟା କରି ବୋଲେରୋରେ ମୃତଦେହ ନେଇ ନୟାଗଡ଼ ଜିଲା ଖଣ୍ଡପଡ଼ା ଥାନା କଣ୍ଟିଲୋ ଫାଣ୍ଡି ଅଧୀନ ସିଦ୍ଧମୂଳ ବ୍ରିଜ ଉପରୁ ମହାନଦୀରେ ଫିଙ୍ଗିଦେଇଥିବା ପୋଲିସ ତଦନ୍ତରୁ ଜାଣିବାକୁ ପାଇଛି। ଅଭିଯୁକ୍ତ କବାଡ଼ିଆ ମାଲିକ ରବୀନ୍ଦ୍ର ମଧ୍ୟ ଏହି କଥା ସ୍ବୀକାର କରିଥିବା ଟାଉନ ଥାନା ଅଧିକାରୀ ସଞ୍ଜୟ ପଟ୍ଟନାୟକ କହିଛନ୍ତି। ଗୁରୁବାର ପୂର୍ବାହ୍ନରେ ପୋଲିସ ଡଗ୍ ସ୍କାଡ୍ ସହ ରବୀନ୍ଦ୍ରଙ୍କ ଗୋଦାମରେ ପହଞ୍ଚି ଯାଞ୍ଚ କରିଥିଲା। ସେଠାରୁ ବ୍ୟବହୃତ ବୋଲେରୋ, ମୃତକ ବ୍ୟବହାର କରୁଥିବା ଗାମୁଛା, ପ୍ୟାଣ୍ଟଶାର୍ଟ ଜବତ କରାଯାଇଛି। ସମ୍ପୃକ୍ତ ବୋଲେରୋରେ ରକ୍ତଛିଟା ଲାଗିଥିବା ପୋଲିସ ଦେଖିବାକୁ ପାଇଛି। ଏ ନେଇ ପୋଲିସ ଏକ କେସ୍ (ନଂ. ୪୦୦/୨୨) ରୁଜୁ କରି ତଦନ୍ତ ଜାରି ରହିଛି।
ପରେ ଓଡ୍ରାଫ ଟିମ୍ ଓ ପୁବୁସାହି ଗ୍ରାମର କେତେଜଣ ବ୍ୟକ୍ତିଙ୍କୁ ନେଇ ମୃତଦେହ ଫିଙ୍ଗାଯାଇଥିବା ସ୍ଥାନରେ ପୋଲିସ ପହଞ୍ଚି ଅନୁସନ୍ଧାନ କରିଥିଲା। ଓଡ୍ରାଫ ଟିମ୍ ସେଠାରେ ଦୀର୍ଘ ସମୟ ଧରି ନଦୀରେ ଖୋଜାଖୋଜି ସତ୍ତ୍ୱେ କୌଣସି ସନ୍ଧାନ ନ ପାଇ ଫେରିଥିଲେ। ଏନେଇ ପୋଲିସ ସମସ୍ତ ଥାନାକୁ ଖବର ଦେଇଥିଲା। କଟକ ଜଗତପୁରସ୍ଥିତ ମହାନଦୀରେ ଭାସୁଥିବା ଏକ ମୃତଦେହକୁ ସ୍ଥାନୀୟ ପୋଲିସ ଗୁରୁବାର ଜବତ କରିଛି। ତାହା ବାସୁଦେବଙ୍କ ମୃତଦେହ ବୋଲି ଅନୁସନ୍ଧାନରୁ ଜଣାପଡ଼ିଛି। ଶୁକ୍ରବାର ଖୋର୍ଦ୍ଧା ଟାଉନଥାନା ପୋଲିସର ଏକ ଟିମ୍ ସେଠାକୁ ଯାଇ ତଦନ୍ତ ପ୍ରକ୍ରିୟା ତ୍ୱରାନ୍ବିତ କରିବା ସହ ପରବର୍ତ୍ତୀ ପଦକ୍ଷେପ ନିଆଯିବ ବୋଲି ଥାନାଧିକାରୀ ପଟ୍ଟନାୟକ କହିଛନ୍ତି। ଏହି ହତ୍ୟାକାଣ୍ଡରେ ୩ରୁ ୪ଜଣ ସଂପୃକ୍ତ ଥିବା ଜଣାପଡ଼ିଛି। ଏ ନେଇ ଅଭିଯୁକ୍ତ ରବୀନ୍ଦ୍ରଙ୍କ ସମେତ ପୁବୁସାହି ଅଞ୍ଚଳର ୩ଜଣଙ୍କୁ ଥାନାରେ ଅଟକ ରଖି ପୋଲିସ ପଚରାଉଚୁରା କରୁଥିବା ସୂଚନା ମିଳିଛି।
