ପାଟଣା,୨।୯(ସ୍ବ.ପ୍ର.)-କେନ୍ଦୁଝର ଜିଲା ପାଟଣା ବ୍ଲକ ମୁଖ୍ୟାଳୟଠାରୁ ମାତ୍ର ୩ କି.ମି. ଦୂରରେ ଥିବା ଦୁର୍ଗାଦେଇପୁରର ବେହେରା ସାହି ଓ ଟାଇଁଶିରା ବେହେରା ସାହିର ଲୋକେ ଆଜି ବି ପାରମ୍ପରିକ ବୃତ୍ତି ଆପଣାଇ ବାଉଁଶରୁ ବିଭିନ୍ନ ସାମଗ୍ରୀ ତିଆରି କରି ଜୀବିକା ନିର୍ବାହ କରୁଛନ୍ତି। ସେମାନେ ମୁଖ୍ୟତଃ କୁଲା ,ଡଲା, ପାଛିଆ,ଠେକା,ପସରା, ବିଞ୍ଚଣା ଓ ଫୁଲଚାଙ୍ଗୁଡ଼ି ତିଆରି କରି ବିକିଥାନ୍ତି। ସମୟର ପରିବର୍ତ୍ତନ ସାଙ୍ଗକୁ କଞ୍ଚାମାଲ ଓ ବଜାର ସୁବିଧାର ଅଭାବ ସେମାନଙ୍କ ଦାନାପାଣିରେ ବାଧକ ସାଜିଛି। କୌଣସି ସ୍ତରରୁ ସେମାନେ ପ୍ରୋତ୍ସାହନ ନ ପାଇ ଏବେ ଘୋର ଦୁର୍ଦ୍ଦିନରେ ଦିନ ବିତାଉଛନ୍ତି। ଅର୍ଥନୈତିକ କ୍ଷେତ୍ରରେ ପଛୁଆ ତଥା ଅବହେଳିତ ଏହି ଜନଜାତି ସମ୍ପ୍ରଦାୟର ଲୋକେ ଏବେ ବୃତ୍ତିହରା ହୋଇ ବଞ୍ଚିବା ଲାଗି ସଂଘର୍ଷ କରୁଛନ୍ତି।
ବେହେରା ସାହି ଓ ଟାଇଁଶିରା ବେହେରା ସାହିରେ ଏହି ସମ୍ପ୍ରଦାୟର ୧୫ ରୁ ଊଦ୍ଧର୍ବ ପରିବାର ବସବାସ କରୁଛନ୍ତି । ସେମାନଙ୍କ ନିକଟରେ କୌଣସି ସରକାରୀ ଯୋଜନାର ସୁଫଳ ପହଞ୍ଚି ପାରି ନାହିଁ ା ବ୍ଲକ କାର୍ଯ୍ୟାଳୟର ଅନତି ଦୂରରେ ଥିବା ଏହି ଅଞ୍ଚଳରେ ମଧ୍ୟ ବିକାଶଧାରା ପହଞ୍ଚି ପାରି ନାହିଁ ା ଦ୍ବୀପ ତଳ ଅନ୍ଧାର ଭଳି ସେମାନଙ୍କ ଅବସ୍ଥା ହୋଇଥିବା ଗ୍ରାମବାସୀ କହିଛନ୍ତି । ଏହି ଗ୍ରାମର ସ୍ବାମୀ ପରିତ୍ୟକ୍ତା ରୁନି ଓ ଅବିବାହିତା ସୂର୍ଯ୍ୟଙ୍କ ଭଳି ଅସହାୟ ମହିଳା ଭଙ୍ଗା କୁଡ଼ିଆରେ ପଲିଥିନ ଟାଣି କାଳାତିପାତ କରୁଛନ୍ତି। ଆବାସ ଯୋଜନାରେ ଘର ପାଇବାକୁ ଆଶଶା ରଖି ଦୟନୀୟ ସ୍ଥିତିରେ ଦିନ ବିତାଉଛନ୍ତି। ସେମାନେ ପାରମ୍ପରିକ ବୃତ୍ତିରେ ଧୂରନ୍ଧରା ହୋଇ ଥିଲେ ବି ବଜାର ସୁବିଧା ଅଭାବରୁ ବାଉଁଶରୁ ସାମଗ୍ରୀ ତିଆରି କରିବା ଏକପ୍ରକାର ବନ୍ଦ କରି ଦେଇଛନ୍ତି। ଏହି ବ୍ଲକର କେନ୍ଦେଇ ପଶି,ଏରେଣ୍ଡେଇ,କଣ୍ଟିଆପଡା,ଜଡିଚାତର,ଚିଲିଦା ,ପଲାଣିଘାଟି, ଓ ଚିନାବାଳିପଶି ଗ୍ରାମରେ ଏହି ସମ୍ପ୍ରଦାୟର ଅବହେଳିତ ଲୋକେ ମଧ୍ୟ ଅସାସ୍ଥ୍ୟକର ପରିବେଶରେ ଜୀବନ ବିତାଉଛନ୍ତି। ଶିକ୍ଷା ଭଳି ମୌଳିକ ସୁବିଧା ସୁଯୋଗରୁ ସେମାନେ ମଧ୍ୟ ବଞ୍ଚିତ ହେଉଛନ୍ତି। ଏହି ସମ୍ପ୍ରଦାୟର ପୁରୁଖା ଲେଶକେ କହିଛନ୍ତି, ଚାଷ ଜମି ନ ଥିବାରୁ ଆମ ଜନଜାତିର ଲେକେ ବାଉଁଶରୁ ବିଭିନ୍ନ ସାମଗ୍ରୀ ତିଆରି ରି ପେଟ ପୋଷୁଥିଲେ। ବର୍ତ୍ତମାନ ପ୍ଲାଷ୍ଟିକ ସାମଗ୍ରୀର ବହୁଳ ବ୍ୟବହାର ବୃଦ୍ଧି ଯୋଗୁଁ ବାଉଁଶ ତିଆରି ସାମଗ୍ରୀର ଚାହିଦା ହ୍ରାସ ପାଇବାରେ ଲାଗିଛି। ପ୍ରୋତ୍ସାହନ ଅଭାବରୁ ଏହି ହାତ ତିଆରି କୁଟୀର ଶିଳ୍ପ ରୁଗଣ ହୋଇ ପଡ଼ିଲାଣି। ଏହି ଜନଜାତିର ଲୋକେ ପୂର୍ବରୁ ବିବାହ, ବ୍ରତଘର, ଯାନିଯାତ୍ରା ଓ ଶୋଭାଯାତ୍ରାରେ ଢୋଲ ବଜାଇ ସେଥିରୁ ଯେଉଁ ଦୁଇ ପଇସା ପାଉଥିଲେ, ଗୁଜୁରାଣ ମେଣ୍ଟାଉଥିଲେ। ଦିନକୁ ଦିନ ପାରମ୍ପରିକ ବାଦ୍ୟର ଚାହିଦା କମୁଥିବାରୁ ଏହି ବେପାରରେ ମାନ୍ଦା ଅବସ୍ଥା ଦେଖାଦେଇଛି। ଏଭଳି ସ୍ଥିତିରେ କୌଳିକ ବୃତ୍ତି ହରାଇ ସେମାନେ ଦୁଃଖରେ ରହିଛନ୍ତି।
