ଭୁବନେଶ୍ୱର,୨।୫(ବ୍ୟୁରୋ): ସ୍ବାସ୍ଥ୍ୟସେବା ନିର୍ଦ୍ଦେଶାଳୟ ପକ୍ଷରୁ ଶନିବାର ଘରୋଇ ହସ୍ପିଟାଲଗୁଡ଼ିକୁ କଡ଼ା ନିର୍ଦ୍ଦେଶ ଦିଆଯାଇଛି । ବିଭିନ୍ନ ରୋଗରେ ଆକ୍ରାନ୍ତ ରୋଗୀଙ୍କୁ ସେବା ଯୋଗାଇଦେବାରେ କିଛି ହସ୍ପିଟାଲ ଦ୍ୱିଧା ପ୍ରକାଶ କରୁଛନ୍ତି। ଏନେଇ ଅଭିଯୋଗ ଆସିବା ପରେ ରାଜ୍ୟର ବିଭିନ୍ନ ହସ୍ପିଟାଲ ପାଇଁ ସ୍ବାସ୍ଥ୍ୟସେବା ନିର୍ଦ୍ଦେଶାଳୟ ପକ୍ଷରୁ ଗାଇଡ୍ଲାଇନ୍ ଜାରି କରାଯାଇଛି। ସେଗୁଡ଼ିକୁ ସବୁ ସମୟରେ ସେବା ଯୋଗାଇଦେବାକୁ ଏଥିରେ ନିର୍ଦ୍ଦେଶ ରହିଛି। ବିଶେଷକରି ଡାଇଲେସିସ୍, ରକ୍ତ ସଂକ୍ରମଣ, କେମୋଥେରାପି ରୋଗୀଙ୍କୁ ଫେରାଇବା ଲାଗି ବାରଣ କରାଯାଇଛି। ଏଥିସହ ୫ ବର୍ଷରୁ କମ୍ ଶିଶୁ, ସଂକ୍ରମଣ ରୋଗୀଙ୍କୁ ନ ଫେରାଇବାକୁ ଏଥିରେ ନିର୍ଦ୍ଦେଶ ରହିଛି। ନିର୍ଦ୍ଦେଶ ଖିଲାପ କଲେ ଆଇନ ଅନୁସାରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କୁହାଯାଇଛି। ଏପରିକି ସମ୍ପୃକ୍ତ ହସ୍ପିଟାଲ କିମ୍ବା ନର୍ସିଂହୋମ୍ର ରେଜିଷ୍ଟ୍ରେଶନ ରଦ୍ଦ କରାଯିବ ବୋଲି ସ୍ପଷ୍ଟ କରାଯାଇଛି।
